སེམས་ཀྱི་རྨ་ཁ།
སྨོན་ལམ་འོད་ཟེར། (སུམ་པ)

ཀ་དག་སྟོང་ཉིད་རྩོད་པའི་ལྷ་རམས་ནས། །

ཁ་དག་དཀར་དམར་རྩོད་པའི་བསྡུས་གྲྭ་བ། །

ག་ཡང་ཐེག་ཆེན་གླིང་ནས་ཕྱི་ཕུད་དེ། །

ང་དབང་མེད་པའི་བྱེ་ཐང་ཡུལ་དུ་བསྐྲད། །

ཅ་ཅོ་ལུང་རིགས་དབྱར་སྐྱེས་རྔ་གསང་སྒྲ། །

ཆ་ལུགས་བཅས་ལྡན་འདུལ་འཛིན་འདུས་པའི་སྡེར། །

ཇ་ཡུན་རིང་ལའང་གཡེང་མེད་གཞུང་བརྩོན་དུས། །

ཉ་གང་གཟས་འཛིན་ལྟ་བའི་མུན་པས་བསྒྲིབས། །

ཏ་ཐཱ་ག་ཏཱའི་གསུང་རབ་རྒྱ་མཚོའི་གླིང༌། །

ཐ་དད་བློ་གྲོས་གྲུ་གཟིངས་ལ་བརྟེན་ནས། །

ད་ལྟ་ཉིད་ནས་བསྐྱོད་དེ་འབད་བཞིན་སྐབས། །

ན་ཚའི་སྡུག་ཡུས་ཡུལ་དུ་སྤྱུགས་པ་གང་། །

པ་སངས་གཟས་འཛིན་དབང་མེད་ང་ཅག་ཀུན།

ཕ་མ་སྤུན་མཆེད་མ་ཤེས་བྱེ་ཐང་ན། །

བ་གླང་འཚོ་བ་རོལ་གནས་གོ་མོར་གླིང་། །

མ་རུང་སྡུག་བསྔལ་རྒྱ་མཚོ་སེམས་སུ་འཁྱིལ། །

ཙ་ཏུར་གྲངས་ལྡན་འཁོར་བའི་སྡུག་བསྔལ་གླིང༌། །

ཚ་གྲང་ངེས་མེད་མྱོང་བ་འཇིག་རྟེན་ཆོས། །

ཛ་ཡའི་གསུང་ལས་དུ་མར་གསུང་ནའང༌། །

ཝ་སྐྱེས་རིགས་ངན་ངོ་བོ་དེར་འདས་སྐྱོ། །

ཞྭ་བཞིན་བཀུར་འོས་གངས་ལྗོངས་རིག་གཞུང་རྣམས། །

ཟ་ཟིར་ལྟས་ངན་ཁཱ་ཏའི་རིགས་ཚོགས་ཀྱིས། །

འ་འུར་གྲགས་འགུལ་གང་མེད་བཟོ་འདོད་མོད། །

ཡ་རབས་བདེན་པའི་སྟོབས་ཀྱིས་དེར་རྒོལ་བསྒྲོགས། །

རྭ་བ་གངས་རིས་ཡོངས་བསྐོར་ཆོས་ཀྱི་ཞིང༌། །

ལ་རྒྱ་བདེན་དོན་སྙིང་གི་དཀྱིལ་བཟུང་བའི། །

ཤ་ཁྲག་གཅིག་འདྲིས་ང་ཚོའི་སྤུན་ཟླ་ཀུན། །

ས་གསེར་ལྟ་བུའི་དུས་ཚོད་བརླགས་པར་བྱས། །

ཧ་ཅང་བཟོད་དཀའ་གོར་མོའི་བྱེ་ཐང་ནས། །

ཨ་ར་སྡུག་སྐད་འདོན་བཞིན་འཆར་སྣང་དག །

རྒྱུན་རིང་མཛའ་བརྩེའི་དུངས་སེམས་ཆེས་ཟབ་པའི། །

གྲོགས་མཆོག་བརྗེད་མེད་དྲན་ཐོ་ཕུལ་བའོ། །

༢༠༠༨ལོའི་ཟླ་བ་བརྒྱད་པའི་ཚེས་ཤིག་ལ་ན་གོར་མོ་ནས་གྲོགས་པོ་ཞིག་གིས་དྲན་རྟེན་གྱི་རྩོམ་ཐུང་ཞིག་དགོས་བསྐུལ་བ་ལ་སེམས་ཀྱི་རྨ་ཁ་དེ་བྲིས་པའོ། སླར་༢༠༠༩ལོའི༧ནང་ཅུང་བཟོ་བཅོས་བྱས་པའོ།