རིག་པ་བགྲང་ཡས་པ་བྱུང་ཡོད་ལ།    ནད་རིགས་དེ་རྣམས་འཇོམས་བྱེད་ཀྱི་ཐབས་གཉེན་པོ་བཞི་ལྡན་གྱིས་བཅོས་དགོས་ཚུལ་

ཙམ་དུ་མ་ཟད་མི་ན་བ་ཡུན་རིང་གནས་ཐབས་དང་ན་བ་ཉིད་སྔོན་འགོགས་བྱ་ཐབས་ཀྱི་རིག་པའང་མ་མཐར་ལོ་ངོ་སྟོང་ཕྲག་དུ་མའི་གོང་གི་ལོ་རྒྱུས་ཡོད་པ་ད་ལྟའི་བར་རྙེད་པའི་གནའ་རྫས་ཡིག་རྙིང་སོགས་ནས་ར་སྤྲོད་ནུས།།

ང་ཚོར་གསོ་རིག་གི་གཞུང་ཆེན་མང་པོ་ཡོད་ཀྱང་དེ་དག་ཀུན་གྱི་ནང་ནས་རིག་གཞུང་གི་མ་ལག་ཆ་ཚང་ཤོས་དང་ནད་ཐོག་ལག་ལེན་གྱི་མྱོང་བ་ཕུན་སུམ་ཚོགས་ཤོས་ནི་བོད་ལུགས་གསོ་རིག་ལ་འཇུག་མཁན་རྣམས་ཀྱི་ལག་ཏུ་འཛིན་བཞིན་

པའི་གཞུང་ཆེན་འབུམ་རྒྱུད་བཞི་འདི་ཉིད་ལས་ལྷག་པ་ནི་སུ་གང་ལའང་མེད་ཀྱང་།     དེར་འཇུག་བདག་འདྲའི་མཁྱུད་དཔྱད་པ་ཚོས་ནད་ཐོག་ལག་ལེན་གྱི་གོམས་པ་དང་གཞུང་དོན་སྙིང་པོ་དག་དེ་ཙམ་གྱི་གཅེས་སུ་མི་འཛིན་ཞིང་ཡིག་ཚད་ལོན་ཙམ་གྱི་ཆེད་དུ་རིག་པ་དཔེ་ཐོག་ཏུ་ལུས་པའི་མིང་སྨན་པའམ་དོན་དུ་ཕན་པ་འཇུག་སའི་ཡུལ་རང་ཉིད་ཀྱི་ལྟོ་རྒྱབ་ཙམ་ལས་མི་འདུག་པའི་རིག་པ་འདི་ཚོ་འཛིན་མཁན་ནི་སྨན་པའི་རྒྱུ་དྲུག་མ་ཚོགས་པ་སྟེ་དཔེར་ན་ཞིང་པས་སོ་ནམ་དུས་བཞིར་བཙའ་ཤེས་ཀྱང་ས་

གཤིས་ངན་ན་འབྲས་བུ་བཟང་པོ་ཞིག་སྐྱེ་མི་སྲིད་པ་ལྟར་སེམས་ཅན་གཞན་ལ་ཕན་ཐོག་ཆུང་ཞིང་ནད་པའི་སྲོག་ལའང་འཚེ་ཆེ་བའི་གནད་ཡིན་པའི་ཕྱིར་བདག་གིས་བལྟས་ན་ང་ཚོ་སྨན་པ་ཞེས་པའི་མིང་ཙམ་ལ་ཆགས་པ་མ་ཡིན་པ་དོན་ལ་གཅེས་སུ་

བཟུངས་ནས་བདག་གཞན་གཉིས་བདེའི་དོན་དུ་དམིགས་ནས་ཕན་པ་བསྒྲུབ་ཅིང་གཞི་སྙིང་རྗེ་བྱང་ཆུབ་སེམས་ཀྱིས་བསྐྱེད་ཅིང་

དངོས་བྱམས་པ་ཉམས་ཐག་ནད་པ་རྣམས་ལ་རང་གིས་བུ་དང་ཚ་བོ་ལྟར་དུ་བསྐྱོང་ནས་ཁ་ཞེ་གཉིས་མེད་ཀྱི་ནད་པའི་དོན་དུ་འབད་དགོས།།

ང་ཚོ་ནས་ནད་ཐོག་ལག་ལེན་དངོས་ལ་འཇུག་སྐབས་གོམས་པ་བཅུ་དང་ལྟར་སྣང་ལྔ་ཕྲུགས་ཀྱི་ཐབས་ལ་བརྟེན་བྱས་ནས་ནད་རིགས་རྣམས་འཁྲུལ་མེད་ངོས་འཛིན་ཐུབ་པ་དགོས་པ་ལས་རྩ་ལ་བལྟ་ཙམ་དང་ཆུ་ལ་དཀྲུགས་ཙམ་བྱས་ན་ནམ་ཡང་ནད་

ངོས་ཟིན་པ་དཀའ་བ་དང་ནད་སྟོབས་ཆེ་ཆུང་དང་ཟུངས་བཟང་ངན་ལ་དཔྱད་ནས་གསོ་ཚུལ་དགུ་པོའི་ཐབས་ལ་བརྟེན་བྱས་ནས་

གཉེན་པོ་བཞི་ཚོགས་ཀྱི་སྒོ་ནས་བཅོས་པར་བྱ་དགོས་ལ་།ལྷག་ཏུ་རྒྱུད་ཀྱི་ལེའུ་སོ་སོའི་གོ་རིམ་བཞིན་བསྟན་དོན་སྙིང་པོ་ངེས་ཅན་ཡོད་ཕྱིར་ལག་ལེན་དངོས་ནང་ངེས་པར་སྤྱོད་ཐུབ་པ་བྱ་དགོས་པ་ནི་ང་ཚོའི་གྲོགས་དང་།    དེ་མིན་རང་འདོད་གང་དྲན་གྱིས་

ནད་པར་སྨན་བཅོས་བྱས་ན་ནམ་ཞིག་རང་གཞན་གཉིས་ཕུངས་ཀྱི་རྐྱེན་དུ་འགྱུར་ངེས་པ་དཔེར་ན་གསོ་བྱ་ནད་པ་ཞིག་ལ་རྐྱེན་གང་རུང་ཞིག་གིས་ཐོག་མར་མ་སྨིན་ཚད་པའི་རྟགས་ཐོན་པ་དེར་ནད་གཞི་ཚ་བར་འཛིན་ཞིང་བསིལ་སྨན་ག་བུར་སོགས་ཀྱིས་བཅོས་བྱས་ན་མ་སྨིན་ཚ་བ་ཉིད་སྨིན་དུ་མི་འདོད་པ་སྨིན་བསྡུ་ལོག་ནས་ལུས་ཀུན་ལ་འཐོར་ཅིང་བྱེར་ལ་ཕྱིས་སུ་སྨན་བཅོས་ཇི་ལྟར་བྱས་རུང་ཚ་བ་ཉིད་གཏིང་འདོན་དཀའ་བའི་གསོ་དཀའི་ནད་དུ་འགྱུར་ཉེན་ཆེ་བ་སོགས་ལ་གཞིགས་ན་རྒྱུད་ནང་ཞི་བྱེད་

ཀུན་གྱི་ཐོག་མར་ཐང་བསྟེན་དགོས་པར་གསུངས་པ་ནི་ནད་གཞི་ཕལ་མོ་ཆེར་ཐོག་མར་སྨིན་བསྡུ་འབྱེད་བྱེད་ཀྱིས་ཐང་བསྟེན་ན་ཚད་པ་འཐོར་ཉེན་སྲུང་ཞིང་གཞི་ནས་གནས་ངེས་པ་ཅན་དེར་དངོས་གཞི་གསོད་སྦྱོང་བྱས་ན་གཅིག་ནས་ནད་གཉའ་གཅོག་པ་དང་གཞན་དུ་ཡང་ནད་རོ་འདོན་ནུས་པའི་དགེ་མཚན་ལྡན།། 

ནད་ཐོག་ལག་ལེན་བྱ་རིང་གཞུང་ལ་ཚད་མར་མི་འཛིན་ཅིང་སྟབས་ཅི་བདེ་རུ་ནད་པར་སྨན་སྤྲད་པ་དང་རང་ཉིད་ནས་གོམས་པ་མེད་བཞིན་དུ་ནད་པར་སྲོག་ཉན་ཤོར་ཉེན་ཆེ་བའི་སྨན་རིགས་སྤྲད་པ་དང་ལྟོ་ངོ་རྒྱབ་ངོ་ཆེ་ཆུང་གིས་ནད་པར་རྫས་ངོ་ཆེ་ཆུང་བྱེད་པ། ནད་པར་ཟས་སྤྱོད་ཀྱི་སྤང་བླང་གསལ་པོ་མི་བསླབ་པ།    སྨན་རིགས་འཐུ་བསྒྲུབ་སྦྱོར་བཟོ་དུག་འདོན་གྱི་ལག་ལེན་

མི་ནུས་པ་སོགས་ཀྱི་དབང་དུ་ཤོར་ན་མུན་ཁང་འབེན་ལ་བརྡེག་པ་དང་ཁྱད་པར་ཅི།     

གོང་གསལ་དེ་ལྟར་དུ་འགྱུར་ཉེན་ཆེ་བས་ང་ཚོ་ནས་དུས་རྟག་ཏུ་སྨན་པའི་ཀུན་སྤྱོད་དག་རང་ཉིད་ཀྱི་མིག་ཟུང་ལྟར་དུ་གཅེས་སུ་འཛིན་ཅིང་དུས་དང་རྣམ་པ་ཀུན་དུའང་འགྲོ་བ་ཉམས་ཐག་ནད་པའི་ལུས་སེམས་གཉིས་ཀྱི་སྡུག་བསྔལ་སྐད་ཅིག་ཙམ་ཡང་སེལ་ཐབས་ཀྱི་ཀུན་སློང་ཡང་དག་སྒོ་ནས་གསོ་བར་འཇུག་དགོས།       

རྒྱུད་ལས།  མཐར་ཐུག་འབྲས་བུ་གཡོ་སྒྱུ་འདོད་པ་རྣམས།

སྤང་ནས་ནད་པ་གསོ་བ་ལ་འཇུག་པ།

བླ་མེད་སངས་རྒྱས་ས་ལ་བགྲོད་འགྱུར་ཅེས།   

                           འཚོ་བྱེད་སྨན་པའི་རྒྱལ་པོས་བཤད་པ་ཡིན།

ཞེས་གསུངས་པ་ལྟར་སླད་མར་ཡང་གསོ་བ་རིག་པ་འཛིན་པ་ཀུན་ཚིག་དུམ་འདི་ཉིད་ཀྱིས་ནད་ཐོག་སྨན་འཁེལ་དང་བཀྲེས་དུས་ཟས་འཁེལ་ལྟར་དུ་མ་གྱུར་ཀྱང་དོན་གནད་མ་གྲོས་རང་མཐུན་གྱི་དམིགས་ཡུལ་ཉམས་ཐག་ནད་པའི་སྡུག་བསྔལ་སེལ་ཆེད་ཡིན་པའི་ཕྱིར་དཔྱོད་ལྡན་རྣམས་ཀྱི་དཔྱད་ཅིང་བསྒྲུབ་ན་འགྲོ་བ་ཉམས་ཐག་ནད་པ་ཟུག་རྔུ་ནད་ལས་གྲོལ་ནས་ཁམས་དྭངས་བདེ་ལེགས་སུ་འགྱུར་བར་སྨོན།།                  

སྟེང་ཆེན་རྫོང་སློབ་འབྲིང་ལས་སློབ་འཛིན་གྲྭའི་དགེ་མིང་ཙམ་འཛིན་པ་བསམ་གཏན་ནོར་བུ་ནས༎

སྤྱི་ལོ་༢༠༡༣ལོའི་ཟླ་ཚེས་འབྱུང་འཕྲོད་དུས་བཟང་ཉིན་བྲིས་༎