རྫི་བོ།

                     རྐྱང་ཚེའི་བུ།_འབྲོག་ཁ་མང་།

མི་ཚོགས་མང་ས་དང་འགྲན་རྩོད་རྒོད་ས་ཤིག་ནས་རྒྱང་རིང་ལ་བལྟས་དུས
ངས་ཕ་ཡུལ་གྱི་རི་བོ་མཐོང་ལ་རི་འདབས་ཀྱི་སྤྲིན་དཀར་མཐོང

སྨུག་སྤྲིན་ལང་ལོང་གསེབ་ནས་རྫི་བོ་ཞིག་ཐོན་འོང་ལ

ལུང་ཁོག་བྲག་ཅ་འཁོར་བའི་རྫི་གླུ་ཞིག་ཀྱང་གྱེར་བཞིན་མཆིས

རི་མཐོ་ས་གཙང་ཞབས་འོག་ཏུ་མནན་ནས

ལ་གླུ་སྙན་མོ་མགྲིན་ཁུག་ཏུ་གྱེར་བའི

རི་འདབས་ཀྱི་རྫི་བོ

རི་ལུང་སྤང་ཐང་གོམས་འགྲོས་ཡིས་ཆོད་ཅིང

སྣ་ཚོགས་ཕྱུགས་ཀྱི་ཕྱོགས་སྟོན་གྱི་འཁོར་ལོ

སྣང་སྐྱིད་ཀྱི་ཕོ་ཉ

ལ་གླུ་དང་བསྡོངས་ནས་ནོར་ལུག་དང་འཚོ་བའི
ཅི་འདྲའི་བག་ཕེབས་ཀྱི་རྫི་བོ་ཞིག་ཨང

ངས་མནོ་བསམ་དང་བསམ་གཞིགས་གང་ཡང་མེད་པར

རྫི་བོ་དེ་ངོ་མ་རང་དབང་ལྡན་འདུག སྣང་བ་སྐྱིད་འདུག་ཟེར་གྱིན་

རབ་རིབ་ཀྱི་མིག་ཟུང་ཨུ་ཚུགས་ཀྱིས་གཅེར་གྱིན

སྙན་འཇེབས་ཀྱི་རྫི་གླུ་རྣ་བས་ཡང་ཡང་བླགས

འོ ངས་ད་དུང་རི་བོ་དེའི་མིང་མ་ཤེས
 རྫི་བོ་དེའི་སེམས་མ་རྟོགས