གངས་ལ་བཏབ་པའི་སེམས་གཞས།།

       ངས་གནས་ལུགས་ཀྱི་ངོ་གདོང་འཚོལ་ཞིང་།།

ངས་བདེན་དོན་ལ་ཁ་ཡ་བྱེད་འདོད།།

གནས་ལུགས་ལ་ནི་དྲང་བདེན་ལྡན་ཞིང་།།

དྲང་བདེན་གྱིས་ཐམས་ཅད་འདྲ་མཉམ་གཟིགས།།

ངས་ཡིད་ཆེས་ལ་གློ་སྙིང་ཁེན་ཞིང་།།

ངས་མཐུན་སྒྲིལ་དང་དཔུང་རྡང་སྦྲེལ་འདོད།།

ཡིད་ཆེས་ཀྱིས་ནི་འཆམ་མཐུན་བསྐྲུན་ཞིང་།།

མཐུན་སྒྲིལ་གྱིས་ཀུན་ལ་བྱམས་བརྩེ་གནང་།།

ངས་ལ་རྒྱ་ལ་ཡིད་རང་སྒོམ་ཞིང་།།

ངས་རིགས་ཞེན་ལ་ངོ་སོ་བསྟོད་འདོད།།

ལ་རྒྱ་ཡིས་བདེན་དོན་ལ་རྩོད་ཞིང་།།

རིགས་ཞེན་གྱིས་ང་ལ་སྙིང་སྟོབས་སྩལ།།

ངས་མཆོག་གསུམ་ལ་སྐྱབས་གནས་འཛིན་ཤིང་།།

ངས་ལས་འབྲས་ལ་བློ་མིག་བལྟ་འདོད།།

དཀོན་མཆོག་གིས་འདི་ཕྱི་ཀུན་སྐྱོབ་ཅིང་།།

ལས་འབྲས་ཀྱིས་ངར་ལམ་སྟོན་མཛད་ངེས།།

ངས་གངས་རི་ལ་སེམས་པ་གླན་ཞིང་།།

ངས་གཙང་ཆབ་ལ་སེམས་གཞས་ལེན་འདོད།།

གངས་རི་ནི་ངའི་བླ་སྲོག་ཡིན་ཞིང་།།

གཙང་བོ་ནི་ཟུངས་ཁྲག་བཞུར་རྒྱུན་ཡིན།།

ངས་གངས་རི་བར་རེ་བ་ཟབ་ཅིང་།།

ངས་མཐོ་སྒང་བ་ལ་རེ་སྨོན་བཏབ།།

གངས་རི་བ་ཡི་བསྟན་པ་དར་ཞིང་།།

མཐོ་སྒང་བའི་སྐུ་ཚེ་ཁྲི་ལོ་ཤོག།

༢༠༡༢/༡༢/༨ ཉིན་སི་བོད་སློབ་གླིང་ནས་ཞང༧གངས་སྲས་ཀྱིས།།