ངའི་སྙིང་གི་ཚིལ་ལུ།
ཨ་ཕའི་དུས་ཆེན་ལ་ཕུལ།
ཉིན་འགའི་སྔོན་ནས་དེ་རིང་ནི་འཛམ་གླིང་ཨ་ཕའི་དུས་ཆེན་རེད་ཟེར་འཕྲིན་ཕྲན་དང་།
པོད་ཕྲན་སོགས་ནས་རང་ཉིད་ཕ་རྒན་ལ་བཀའ་དྲིན་མཚོན་བྱེད་ཀྱི་ཡིག་ཕྲེང་གང་མང་སྤེལ་ཡོང་གིན། ངས་ཀྱང་ཨ་ཕ་ལགས་ཁྱེད་ཉིད་ཁམས་བཟང་ཞེས་པས་མདུན་བསུས་ཏེ་ཁ་མིན་སེམས་གཏིང་ནས་སྨོན་ཚིག་དང་བསམ་ཚུལ་འགའ་འབྲི་བར་འདོད།
རེད་ཡཱ།
ལོ་ཁ་ཤས་སྔོན་ནས་བཟུང་ཤོག་དཀར་གྲུ་བཞིའི་ངོས་སུ་སེམས་ནང་གི་དགའ་སྐྱོ་ཆགས་སྡང་དག་དཔག་ཚོད་ཀྱིས་ཕབ་གང་ཐུབ་བྱས།
འོན་ཀྱང་།
དམིགས་བསལ་གྱི་ཨ་ཕ་ཁྱེད་ཉིད་ལ་བྲིས་པ་ཞིག་ད་ལྟའི་བར་མི་འདུག
དེ་ནི་ཁྱེད་ཉིད་ངའི་སེམས་ནང་ནས་བོར་བ་མིན་ལ།
བརྩི་བཀུར་མེད་པ་ཞིག་དེ་བས་མིན། ཕ་མ་གཉིས་ལ་བརྩི་བ་ཆེ་ཆུང་གི་ལྷག་ཏུ་མིན།
ཕ་མ་ཁྱེད་གཉིས་ནི་ངའི་མིག་ཟུང་ལྟར་གཅེས་ཤིང་སྙིང་ལྟར་བསྲུང་ཡོད།
འོ་རེད། སློབ་ཆེན་དུ་བསྡད་རིང་བྲིས་པའི་རྩོམ་རིང་༼ཁྲེལ་མེད་བུ་ཕྲུག་ཞིག་གི་ཕྱིར་མིག༽ དེར་ཁྱེད་རང་ཅུང་ཙམ་གླེང་འདུག ཨ་ཕ་ལགས།
བར་ཆད་ཞིག་གིས་ཁྱེད་དང་ངེད་གཉིས་ཁྱིམ་ཚང་གཅིག་གི་ནང་ཕ་བུའི་བརྩེ་དུང་མངར་མོ་དེ་ལོངས་སུ་སྤྱོད་རྒྱུ་མ་བྱུང་རུང་།
ཁྱེད་ཀྱིས་ང་ལ་བཅངས་པའི་བྱམས་བརྩེ་དྲོན་མོ་དེ་སེམས་ཀྱིས་ཚོར་ཡོད་ལུས་ཀྱིས་མྱོང་ཡོད།
ད་དུང་བུ་ང་ལ་ད་ལྟ་ཤེས་ཡོན་དང་བསམ་ཤེས་ནུས་པ་ཅུང་ཙམ་ཡོད་པ་དེ་ཚོ་ཁྱེད་ཚོའི་ལམ་སྟོན་གྱི་སློབ་གསོ་ལས་བྱུང་བ་བཀའ་དྲིན་དུ་སྒོམ་ཡོད།
ངས་ཀྱང་ཁྱེད་རང་གི་བདེ་སྡུག་དག་མིག་གིས་འཚོས་ཡོད་རྣ་བས་ཉན་ཡོད།
ང་རང་ཉིད་ཀྱི་ལུས་པོ་འདི་ས་རུ་མ་འཐིམ་བར་ཁྱེད་དང་ང་ཚོ་ཡི་འཚོ་བའི་དོན་ལ་རིག་པ་སྒྲིམ་ཡོང་བསམ་གཞིགས་ལོས་བྱེད།
སྔར་ནས་ད་བར་ངའི་གཡང་ཁྱིམ་ཚང་གི་ཨ་མྱེ་ཡང་མྱེ་དག་གིས་མཆོག་གསུམ་གོང་དུ་བཀུར་ཞིང་།
ལས་རྒྱུ་འབྲས་མིག་ལྟར་གཅེས་པའི་དན་རྟགས་སུ་མི་ལ་ན་ནད་ཉུང་ཞིང་།ཕྱུག་ལ་འཕེལ་ཁ་ལེགས་པ་འདི་དག་ཕ་ནོར་བུ་ལ་སྤྲད་པའི་དགོས་འདོད་ཀུན་འབྱུང་གི་ནོར་བུ་ཞིག་སེམས་ཡོད།།
ལོ་དེའི་རིང་ང་རང་སློབ་སྦྱོང་ལ་བྲེལ་བས་དངོས་ཤུགས་བརྒྱུད་གསུམ་ནས་ཕན་གང་ཡང་མ་ཐོག་ལ། ལས་ཀར་ཞུགས་ནས་ལོ་འདི་དག་རིང་དེ་བས་ཀྱང་གང་ཡང་བྱུང་མ་སོང་བས་སེམས་ལ་རྨ་ཁ་ཆེན་པོ་ཞིག་གིས་མནར་བྱུང་།
ཤེས་རིག་གི་ལང་ཚོའི་ཁོ་ལག་རྒྱས་མ་ཐུབ་པའི་ཁོ་བོས་ད་དུང་ཁྱེད་ལ་ཕན་པའི་ལས་དོན་སྒྲུབ་མ་ཐུབ་དུས་དགོངས་དག་ཞུ་ཅེས་ཡི་གེ་འདི་བྲིས།
ད་དུང་སྡེ་མི་གྲོང་རོགས་ཚོས་ཟེར་སྲོལ་ཁྱེད་ཚོའི་འཚོ་བ་སྔར་ལས་རྒྱས་ཤིང་ནང་མི་
འཆམ་མཐུན་ལྡན་འདུག་ཅེས་པའི་སྐད་ཆ་ཐོས་དུས་ངའི་ཡ་ཆུང་སེམས་ལ་དྲོད་ཁལ་རྒྱས་
བྱུང་ལ་ཧ་ཅང་དགའ་ཡོད།
ན་
ནིང་ལ་ཁྱེད་ཀྱིས་ང་ལ་གནང་བའི་དངུལ་གྱི་མཛུབ་དཀྲིས་དེ་སྤྲད་སྐབས་དེ་དུས་
སེམས་ཚོར་གང་ཡང་མ་བྱུང་།
ད་ལྟ་ཞིབ་ཏུ་བསམ་ན་མཛུབ་དཀྲིས་དེ་འཇིག་རྟེན་སྟེང་ཆེས་དཀོན་པའི་ལག་རྟགས་དེ་
ཡིན་པ་ཤེས།
དཱ་
མང་པོ་མི་བཤད།
ཁྱེད་ཀྱི་བཀའ་དྲིན་དག་ངའི་ཡ་ཆུང་སེམས་ཀྱི་གཏིང་རུམ་ལ་རྡོ་བརྐོས་རི་མོ་ལྟར་
གནས་ཡོད། ཁྱེད་ཀྱི་ངའི་བྱ་སྤྱོད་ལ་སེམས་ཁྲལ་མང་པོ་མ་བྱེད། ངས་གང་ཐུབ་ཀྱིས་
ཡ་རབས་སྐྱེས་བུ་ལ་མིག་དཔེ་བལྟ་བཞིན་མདུན་བསྐྱོད་ཀྱི་གོམ་པ་སྤོ་ཡོང་།
མཐར་
ཁྱེད་ཉིད་སྐུ་ལུས་ན་ནད་མེད་ཅིང་། སེམས་ལ་སྡུག་བསྔལ་མི་ཡོང་བའི་རེ་སྨོན་དང་།
ནམ་ཡང་ཨ་ཕ་ལགས་ཞེས་འབོད་སའི་སྐུ་ཚེ་མཐའ་རུ་ཕྱིན་པར་སྨོན།
༢༠༡༣་ལོའི་༥་ཚེས་༡༦་ཉིན།
