མ་ཡུམ་སློབ་གླིང་། །
སྙིང་ནས་བརྩེ་བའི་བཤེས་གཉེན་རྣམས་དང་བློས་ཐུབ་གྱི་སློབ་གྲོགས་
འགའ་དྲན་རྟེན་དུ་ཕུལ།
ཀ་མད་སུམ་ཅུ་ཡི་གྱེར་དབྱངས་སྙན་ས། །
མ་ཡུམ་སློབ་གླིང་སྟེ་གསོ་རིག་སློབ་ཆེན། །
ཁ་དོན་ཀུན་མཚུངས་ཀྱི་བཤེས་གཉེན་མང་ས། །
ཤེས་བརྩོན་ཟུང་འབྲེལ་གྱི་བློ་གསར་འདུ་གནས། །
ག་བུར་ལ་སོགས་ཏེ་བཟང་དྲུག་ངོས་འཛིན། །
ནད་ཅན་འགྲོ་བ་ཡི་དཔུང་གཉེན་སྐྱོང་གནས། །
ང་དང་ཁྱོད་ཕྱོགས་ཀྱི་དབྱེ་བ་བྲལ་ཞིང་། །
ཕུགས་འདུན་དམིགས་ཡུལ་གྱིས་རང་གཅེས་གཞན་བཀུར། །
ཅ་ཅོ་ལབ་གླེང་གི་ཉི་མ་མི་བསྐྱལ། །
སྲོལ་རྒྱུན་རིག་གནས་ཀྱི་གཙོ་བོ་འཛིན་ནས།
ཆ་རྐྱེན་གང་འཛོམས་ཀྱི་དེང་རབས་ཟུར་བརྒྱན། །
གནའ་དེང་ཟུང་འབྲེལ་གྱིས་ཕྱུག་པའི་སློབ་གླིང་། །
ཇ་འོ་འདྲེས་པ་ལྟར་དགེ་སློབ་མཐུན་སྒྲིལ། །
རྒན་བཀུར་གཞོན་གཅེས་ཀྱིས་ལམ་བཟང་ཡག་འགི །
ཉ་ཉུང་མཉམ་བསྲེས་ཀྱི་འགོས་ནད་ཉུང་བས། །
རང་སྐད་གཙང་མ་དེ་གོ་དུས་སྙན་བྱུང་། །
ཏ་ཐ་ག་ཏ་ཡི་བསྟན་ལ་དད་ཅིང་། །
འགྲོ་བ་ནད་ཅན་ཚོའི་མགོན་སྐྱབས་འབྱུང་གནས། །
ཐ་ཆད་སྒོ་གསུམ་གྱི་བྱ་སྤྱོད་དབེན་པ། །
སྨན་པའི་རྒྱུ་དྲུག་དེ་སྦྱངས་བའི་གྲུབ་འབྲས། །
ད་རེས་ལུས་རྟེན་འདི་རྙེད་པའི་དགོས་པ། །
འགྲོ་སའི་ཁ་ཕྱོགས་དེ་མ་ནོར་དགའ་ཡོད། །
ན་ཚ་ཟུག་རྔུ་ཡི་སྡུག་ལས་བཀྲོལ་མཁན། །
འཚོ་བྱེད་དུ་མ་ཞིག་གསོ་སྐྱོང་གནང་འདུག། །
པ་ཕ་ལྟ་བུ་ཡི་བཤེས་གཉེན་བསླབ་བྱ། །
སེམས་པའི་གཏིང་རུམ་ན་ནམ་ཡང་ལྷང་ངེར། །
ཕ་ཡུལ་གངས་ལྗོངས་ཀྱི་ཐུན་མིན་རིག་གནས། །
བོད་ལུགས་གསོ་རིག་གི་བསྟན་པ་དར་ས། །
བ་གླང་ལྟ་བུ་ཡི་ཤེས་རྨོངས་ང་ཚོར། །
ཤེས་རིག་བག་མ་དེ་སྤྲད་པ་ཡག་བྱུང་། །
མ་ནོར་ལམ་སྟོན་གྱི་བཀའ་སློབ་རེ་རེས། །
མི་ཚེའི་སྙིང་པོ་ལ་དྲོད་ཀྱིས་ཁེངས་སོང་། །
ཙ་རིའི་གནས་སྐོར་ལྟར་བཟོད་སྲན་སྒོས་ནས། །
ཉིན་མཚན་དབྱེར་མེད་ཀྱིས་ཐོས་བསམ་དུས་འདའ། །
ཚ་གྲང་དབྱེ་འབྱེད་ཀྱི་གདམས་ངག་དག་ནི། །
ནམ་ཡང་བརྗེད་མེད་ཀྱི་གསུངས་བཅུད་དྭངས་མ། །
ཛ་ཡའི་གསུང་རབས་ཀྱི་ནང་དོན་བཀྲོལ་མཁན། །
ཐུན་མིན་རིག་གནས་ཀྱི་རིན་ཐང་ཤེས་ས། །
ཝ་ལེར་རྗེས་རབས་ཚོར་དམིགས་དཔེ་ལྟ་གནས། །
མེས་པོ་དམ་པ་རྣམས་བཀའ་དྲིན་ཆེ་འོ། །
ཞ་བཞིན་སྤྱི་གཙུག་ཏུ་བཀུར་འོས་དགེ་རྒན། །
བྱམས་བརྩེ་འོད་སྟོང་གིས་གང་སར་ཁྱབ་འདུག །
ཟ་རྔམ་འཐུང་རྔམ་གྱི་དྲི་མ་བྲལ་བས། །
སྐྱེ་བོ་གང་མང་གིས་མཐེ་བོང་སྒྲེང་འདུག །
འ་ཅད་འུ་ཐུག་གི་སྐྱེ་བོ་དག་ལ། །
ཁ་མིན་སེམས་གཏིང་གི་རོགས་སྐྱོར་ཡག་འགི །
ཡ་རབས་མེས་པོ་ཡི་སྲོལ་རྒྱུན་རྒྱུད་འཛིན། །
མ་ཉམས་གོང་འཕེལ་དུ་རེམས་པས་དགའ་ཡོད། །
རྭ་ལྟར་གྱོན་པོ་ཡི་གཤིས་སྤྱོད་བྲལ་བས། །
སློབ་གྲོགས་དམ་པ་འགའི་ཀུན་སྤྱོད་བཟང་གི །
ལ་རྒྱའི་སྟོང་གཏམ་དེ་ཁ་ནས་མི་ཤེས། །
དོན་གྱི་དམིགས་ཡུལ་དེ་གཏད་ས་ལེགས་འདུག །
ཤ་ཁྲག་གདོས་བཅས་ཀྱིས་གྲུབ་པའི་ལུས་འདིས། །
ཉེས་པ་འཕེལ་ཟད་ཀྱི་བརྟག་བཅོས་སྦྱོང་གནས། །
ས་སྟེང་སྐྱེ་འགྲོ་ཚོའི་ཟུག་རྔུ་བཀྲོལ་མཁན། །
འཚོ་བྱེད་སྨན་པ་ཞེས་ཐོས་དུས་དགའ་བྱུང་། །
ཧ་ཅང་དུག་རྒྱལ་གྱི་དངུལ་ཆུ་ལྟ་བུ། །
ཚད་ལྡན་སྨན་སྦྱོར་གྱིས་བདུད་རྩི་ངོ་མ། །
ཨ་རོགས་བུ་ཞིག་གིས་རྒྱང་རིང་ཡུལ་ནས། །
བརྩེ་བའི་སློབ་གླིང་དེ་དྲན་པའི་གདུང་བ། །
ཧ་ཅང་བརྡ་དག་དང་སྙན་ངག་དབུལ་རུང་། །
སེམས་ཀྱི་གཏིང་རུམ་ནས་བཞུར་བའི་ཁྲག་ཐིག །
ཨ་ཁུ་ཤེས་ལྡན་ཚོས་སྣ་གཉེར་མ་བྱེད། །
རང་འདྲའི་དྲྭ་འབུ་ཚོས་ཡིག་སྙིགས་མ་སྤུངས། །
༢༠༡༢ལོའི་ཟླ་༦པའི་ཚེས་༢༥ཉིན་ཆབ་མདོ་རུ་བྲིས། །
