༧ ཐེངས་བཞི་པའི་ཨ་དཀར་དུང་སྒྲུབ་ཆེན་མོ།
༧ སྒྲུབ་ཞུགས་རྣམས་ནས་བཀའ་སློབ་ཉན་པ།
དེ་ཡང་༧དབང་ལྡན་ཞུ་ཡི་གདན་ས་ཆེན་མོ་དཔལ་ལྡན་སྨིན་གྲོལ་གླིང་དུ་༧རྣམ་འདྲེན་བརྒྱད་པ་རྒྱལ་བ་གཤེན་རབ་མི་བོའི་བསྟན་སྲིད་སྤྱི་དང་ཕྱོགས་བཅུ་རབ་འབྱམས་གང་ན་སུ་བཞུགས་པའི་བསྟན་དང་འགྲོ་བའི་དཔལ་མགོན་རྣམས་ཀྱི་ཞབས་པད་ཡུན་དུ་བརྟན་པ་དང་། ཡངས་པའི་ས་ཆེན་ཀུན་ཏུ་ནད་མུག་དུས་འཁྲུག་སོགས་ཞི་ཞིང་རིས་མེད་ལུས་ཅན་ཡོངས་ཀྱི་འདི་ཕྱི་གཉིས་ཀའི་ལེགས་ཚོགས་ཡོན་ཏན་ཡིད་བཞིན་འགྲུབ་པའི་དགོས་དམིགས་སོགས་ལ་ལྟོས་ཏེ་དགོན་འདིའི་ཐེངས་བཞི་པའི་ཨ་དཀར་དུང་སྒྲུབ་ཆེན་མོའི་སྒྲུབ་པ་དེ་བཞིན་བོད་རབ་མཛོད་ཆུ་སྦྲུལ་ལོའི་དབོ་ཟླའི་ཚེས་༡༨ནས་༢༥བར་དད་ལྡན་ལྷ་སྡེ་སྟོང་ཕྲག་ལྷག་ཙམ་དང་སྤུ་རྒྱལ་རིག་སློབ་ཁང་གི་འདུས་པ་རྒྱ་མཚོ་རྣམས་ལྷན་དུ་འཚོགས།
༧ ཚོགས་ཞུགས་དད་ལྡན་རྣམ་པ།
དེ་ཡང་སྔ་སྲོལ་ལྟར་གྱེར་འདོན་གཅིག་པུ་མ་ཡིན་པར་དུས་བབ་དང་ཁོར་ཡུག་གི་གནས་སྟངས་དང་འབྲེལ་བར་དགོན་གྱི་མཁན་སློབ་རྣམ་པས་ལུགས་གཉིས་དང་འབྲེལ་བའི་བཀའ་སློབ་ཉིན་ལྟར་ཐེངས་གསུམ་རེ་དང་། ཉིན་མཚན་གཉིས་ཆར་བོན་སྒྲ་རྒྱུན་མི་ཆད་པའི་ངན་སོང་དོང་སྤྲུག་དབྱངས་ལ་བསྐྱོན།
༧ རིག་པའི་དགྱེས་མཆོད་བཤམས་པ།
ཟུར་དུ་སྤུ་རྒྱལ་རིག་སློབ་ཁང་གི་བཤད་གྲྭ་བ་རྣམས་ནས་གཞུང་ཆེན་ཁག་ལས་འཕྲོས་པའི་འཆད་རྩོད་རིག་ལམ་གྱི་མཆོད་སྤྲིན་ཟབ་མོ་རྩ་གསུམ་རྒྱལ་བའི་ཚོགས་དང་དད་ལྡན་བསྟན་སྦྱིན་རྣམ་པའི་སྤྱན་ལམ་དུ་བཤམས་པ་བཅས་གནས་བསྡུས་སུ། གནས་ཚུལ་མཁོ་འདོན་པ་སྒྲུབ་པའི་གཙོ་སྐྱོང་མཁན་ཁྱུང་གསེར་ཞུན་ནས།
