༄༅།།   ས་བོན་ཆུང་ཆུང་།།

༡༽ཡམ་ཡོམ་དང་སྒང་གཤོང་མི་སྙོམས་པའི་རི་གྲོང་དུ།

གུ་དོག་དང་འགལ་འདུ་སྣ་ཚོགས་ཀྱི་དཀྱིལ་དུ།

གླེང་ཕྱོགས་དང་འགྱུར་ལྡོག་འདྲ་མིན་གྱི་ཁྲོད་དུ།

ང་རོ་དང་དོགས་གཞི་མི་གཅིག་པའི་གྲོང་དུ།

ལྟ་བ་དང་ཁ་ཕྱོགས་མི་འདྲ་བའི་ཁྲོད་དུ།

འུད་བརྗོད་དང་མཛུབ་མོ་ཀེར་བའི་དབུས་སུ།

ཁོར་ཡུག་དང་གནོན་ཤུགས་མང་པོའི་གསེང་དུ།

 ༢༽དེར་འཚོ་བའི་ཡ་མཚན་གྱི་དངོས་པོ་གང་ཞིག་སྟེ།

རྐང་པ་བརྟན་པོར་མ་ཚུགས་པའི་ས་བོན་ཆུང་ཆུང་ཞིག་དང་།

དྲོད་གཤེར་ཆུ་ལུད་དཀོན་པའི་ས་བོན་ཆུང་ཆུང་།

ཉི་འོད་དྲིན་གྱིས་མ་བསྐྱངས་པའི་ས་བོན་ཆུང་ཆུང་།

གཉོམ་ལག་ཅི་དགར་མ་གྲོལ་བའི་ས་བོན་ཆུང་ཆུང་།

ཡལ་འདབ་གང་བུ་མ་འབྱམས་པའི་ས་བོན་ཆུང་ཆུང་།

ཀྱེ་མ་སྐྱོ་ཐག་ཆོད་པའི་ཤེས་བྱ་ཁྱོད་འདྲ་ངོ་མ་དཀོན་མོ་རེད་ད།  ཨ་ཁ་ཁ་་་་་་་་་་་་་་་་་་་་་

 ༣༽འོན་ཏེ།  ནམ་ཞིག་ཁྱོད་ལ་སྡོང་རྐང་གཡོ་མེད་ཚུགས་པའི་དུས་ཤིག་སྲིད་ལ།

ནམ་ཞིག་ཁྱོད་ལ་དྲོད་གཤེར་མཐུན་རྐྱེན་འཛོམས་པའི་དུས་ཤིག་སྲིད།

ནམ་ཞིག་ཁྱོད་ལ་དྲོད་འཇམ་ཉི་ཟེར་བདལ་བའི་དུས་ཤིག་སྲིད།

ནམ་ཞིག་ཁྱོད་ལ་ཡལ་ག་ལོ་འདབ་རྒྱས་པའི་དུས་ཤིག་སྲིད།

ནམ་ཞིག་ཁྱོད་ལ་འབྲས་བཟང་འབུམ་ཕྲག་འབྱམས་པའི་དུས་ཀྱང་སྲིད་པ་སྟེ།

རྩ་བའི་གསོན་ཉམས་དོད་པའི་ས་བོན་ཉག་གཅིག་ཏུ་གྲུབ་པས་སོ།

ཟུངས་ཁྲག་དྲོད་མོས་སེམས་ཁམས་སུ་རྟགས་ཐམ་བཀོད་པས་སོ།

དྲག་ཏུ་རྒྱུ་བའི་སྙིང་རྩ་འཕར་ལྡིང་མགྱོགས་པས་སོ།

རང་ཚུགས་གཞོམ་གཞིག་བྲལ་བའི་གཤིས་ལུགས་རྫོགས་པ་སོགས་ཀྱིས་ཡིན་ནོ་སྙམ།

༤ཡཱ།   ངོ་མ་བདེན་པ་ཨེ་ཡིན་ནམ།  ་་་་་་་་་་་་་་་་་་་་་་་་་་་་་་་་་་་་་་་་་་་་་