བཞི་བ།

བཞི་པ་བྲུ་ཡི་རྒྱལ་ཐེབས་ཏེ། །གཡོར་མེ་གྲགས་པའི་དཔལ་ཞེས་བྱ། །མ་འོངས་ལུང་གིས་ཟིན་ཚུལ་ནི། །དབྱིལ་གྱི་ལྡེ་མིག་འབྲིང་བོ་ལས། །ཡར་མེའི་སྐུ་སྐྱེ་ཡིན་གསུངས་པས། །དེ་རྗེས་གཡོར་པོའི་ས་ཆ་རུ། །རུས་མེ་མེ་དཔལ་ཞེས་བྱ་འབྱུང་། །སེམས་ཕྱོགས་གདམས་པའི་འགྲོ་དོན་མཛད། །འགྲོ་བ་ཐར་བར་དེ་ཡིས་འདྲེན་ཞེས་ལུང་གིས་བསྔགས་པ་ལྟར། ཡུལ་གཡོར་བོའི་དོལ་ཞེས་བྱ་བ་གདུང་རུས་མེ་ཡིན་ལ། ཡབ་ཡུམ་མཚན་དང་ལྡན་པའི་སྲས་སུ་ཤིང་སྟག་ལོར་འཁྲུངས། བྲུ་སྟོན་ཉི་རྒྱལ་དང་གཤེན་སྟོན་ནམ་མཁའ་གཉིས་ལས། གཙང་གཙུག་དང་དྲང་སྲོང་བསླབ་པ་རྫོགས་པར་ཞུས་ཤིང་། ཉམས་པའི་དྲི་མ་རྡུལ་ཙམ་ཡང་མ་གོས་པར་ལེགས་པར་སྲུང་། དམ་པ་ཚུལ་ཤེས་ལས་ཐེག་པ་ཆེན་པོའི་ངོ་སྤྲོད་ཞུས་ཤིང་། །མི་གཡོ་རྩེ་གཅིག་ངང་དུ་ཉམས་སུ་བླངས། ཁོང་གིས་མཛད་པའི་ཞལ་གདམས་ལས་ཀྱང་། ཁོ་བོ་གཡོར་བོ་མེད་དཔལ་ངས། །སྤྱིར་བླ་མ་རྣམས་ལ་མོས་གུས་བྱས། །སྒོས་དྲིན་ཅན་གསུམ་ལ་གསོལ་བ་གདབ། །གདམས་ངག་བདུད་རྩིའི་ཆུ་འཐུངས་པས། །ཉམས་མྱོང་རྟོགས་པ་ནང་ནས་ཤར། །ཞེས་གསུངས་ལ། གཞན་སྤྲུལ་སྐུ་ཉི་རྒྱལ་དང་རྨ་སྟོན་སྲོལ་འཛིན་སོགས་དམ་པ་དུ་མའི་ཞབས་ལ་གཏུགས་ཏེ་ཐུགས་བཅུད་ཟམ་མོ་ལ་ཤམ་པོ་སོགས་ནས་རྩེ་གཅིག་ངང་དུ་སྒོམ་སྒྲུབ་མཛད་པས་གྲུབ་པའི་རྟགས་སུ། བུམ་ཆུ་རང་འཁོལ་བྱས་པ། ཡི་དམ་ལྷའི་ཞལ་མངོན་སུམ་གཟིགས་པ། ལྗགས་མཆིལ་བཏབ་པས་སེམས་ཅན་གྱི་ན་ཚ་ཞི་བ་སོགས་གྲུབ་རྟགས་རྫུ་འཕྲུལ་དཔག་མེད་མངའ་ཞིང་། འཆད་རྩོད་རྩོམ་གསུམ་སོགས་བསྟན་པའི་བྱ་བ་རྒྱ་ཆེར་མཛད་པ་ལགས།

ལྔ་པ།

ལྔ་པ་གཡས་རུ་འ་ཞའི་གདུང་། །འགྲོ་མགོན་བློ་གྲོས་རྒྱལ་མཚན་ཞེས། །མ་འོངས་ལུང་གིས་ཟིན་ཚུལ་ནི། །བདེ་བར་གཤེགས་པ་ཕྱི་རབས་འདྲེན་པའི་གཤེན། །བ་གོར་དབེན་ས་བོན་གྱི་འབྱུང་གནས་སུ། །བྱང་ཆུབ་སེམས་དཔའ་ཆེན་པོའི་སྐུར་གྱུར་པ། །སྐྱེ་མེད་ས་གནོན་བློ་གྲོས་རྒྱལ་མཚན་གྱིས། །རིག་པ་རང་ཤར་གླིང་བཞིའི་ཡུལ་ལ་གཟིགས། །རང་རིག་སྒྲིབ་མེད་སྐྱེ་བ་ལྔ་བརྒྱ་གསལ། །གཟི་བརྗིད་གདེང་ལྡན་བདུད་བཞི་ཟིལ་གྱིས་གནོན། །ཕྱི་རབས་འགྲོ་བ་མ་ལུས་དྲན་པས་ཆོག །ཞེས་གསུངས་པ་བཞིན། གཡོར་བོའི་ས་ཆའི་གོང་ཉིད་དུ་འགྲོ་མདོན་བདུད་རྩིའི་སྐུ་མཆེད་ཀྱི་སྲས་སུ་འ་ཞའི་གདུང་འཛིན་དུ། ས་ཕོ་རྟ་ལ་ཡབ་ཡུམ་མཚན་དང་ལྡན་པ་གཉིས་ཀྱི་སྲས་སུ་སྐུ་བལྟམས་པ་དང་། རྒྱལ་བའི་ཡེ་ཤེས་མིའི་གཟུགས་སུ་སྣང་བ། ཕྱི་དར་བསྟན་པའི་རྒྱལ་མཚན་དུ་གྱུར། ཁོང་གིས་འགྲོ་མགོན་བདུད་རྩིའི་རྒྱལ་མཚན་དང་། གཏེར་སྟོན་དཔོན་གསས་ཁྱུང་རྒོད་སོགས་ཚུལ་བཞིན་ལེགས་པར་བསྟེན་ནས། དབལ་ཕུར་གྱི་དབང་ལུང་དང་གཏེར་ཁའི་དབང་ལུང་རྣམས་སྐོམ་པས་ཆུ་འཐུང་བ་བཞིན་རྫོགས་པར་ཞུས་ཤིང་། གཞན་ཡང་གཤེན་སྟོན་ཀླུ་ཡི་དབང་པོ་ཁྱེའུ་གཉེན་འཐིང་དང་། ཁུ་ཚ་ཟླ་འོད་རྗེ་འོར་སྒོམ་སོགས་ཀྱིས་གཏེར་ནས་བཏོན་པའི་བོན་སྡེ་རྣམས་དབང་ལུང་མན་ངག་རྒྱུན་འཐུད་ཅིང་། དེ་དག་གི་བདག་པོར་མངའ་གསོལ། ཁྱད་པར་འགྲོ་མགོན་གྱི་རྗེས་སུ་འབྲངས་ནས། གནས་ལུགས་དོན་གྱི་ངོ་སྤྲོད་ཞུས་ཏེ། གདམས་པ་དམར་ཁྲིད་དང་བཅས་པ་བུམ་པ་གང་བྱོའི་ཚུལ་དུ་གནང་བ་དང་། གཉན་ཆེན་ཐང་ལྷ་སོགས་དབེན་གནས་སུ་ཕྱིན་ཏེ། རྩེ་གཅིག་འབྲལ་བ་མེད་པར་ཉམས་སུ་བླངས་པས་ཉམས་རྟོགས་ཡོན་ཏན་རྒྱ་མཚོ་ཐུགས་ལ་མངའ་ཞིང་། མཁས་དང་གྲུབ་པའི་སྙན་གྲགས་ཕྱོགས་ཀུན་ཁྱབ། ཁོད་སྤུངས་དྲན་པའི་ཞལ་མཇལ་ནས་རྩ་རླུང་དང་འཕོ་ཁྲིད་ཀྱི་གདམས་པ་སྙན་དུ་བརྒྱུད་ཅིང་ཡེ་ཤེས་དབལ་མོས་བསྐྱེད་རྫོགས་གསང་གདམས་གནང་བ། གཞན་ཡང་ཕྱི་ནང་ཡུལ་ཅན་ས་རི་རྡོ་བྲག་ལ་སོགས་གདོས་བཅས་ཀྱི་སྣང་བས་ཆ་ཙམ་ཡང་མ་སྒྲིབ་པ་སོགས་གྲུབ་རྟགས་དཔག་མེད་མངའ་ཞིང་། སྦས་ཚུལ་གྱིས་ཕྱོགས་བཞིའི་བུ་སློབ་མང་དུ་བསྐྱངས། འཆད་རྩོད་རྩོམ་གསུམ་ལ་སྤོབས་པ་ཆེས་ཆེར་རྒྱས་ཤིང་། སྨྲ་བའི་སེང་གེ་དང་གཉིས་སུ་མ་མཆིས་པའི་བོད་ཀྱི་པཎྚི་ཏ་ཞེས་གྲགས་པ་ས་གསུམ་དུ་ཁྱབ་པ། སྡེ་སྣོད་མན་ངག་ཀུན་གྱི་སྒོ་བརྒྱ་འབྱེད་པའི་ལྡེ་མིག་ལྟ་བུ་ལགས།