སྤྱི་བསྒྲགས།
སྒྲིག་འཇུག...
ལི་ཐོ།
སྒྲིག་འཇུག...
ཆེད་སྒྲིག་རྣམ་དབྱེ།
སྒྲིག་འཇུག...
ཟིན་ཐོ་གསར་བ།
སྒྲིག་འཇུག...
དཔྱད་གཏམ་གསར་བ།
སྒྲིག་འཇུག...
ཆེམས་གསར་བ།
སྒྲིག་འཇུག...
པར་མཛོད།
ནང་འཇུག
སྒྲིག་འཇུག...
དྲ་གྲོགས།
སྒྲིག་འཇུག...
སྦྲེལ་མཐུད།
ཟིན་བྲིས་ཆ་འཕྲིན།
སྒྲིག་འཇུག...
ཕ་ཡུལ་ལ་སྤྲིངས་པའི་འཕྲིན་པ། | 2011/7/4 16:04:00
ཕ་ཡུལ་ལ་སྤྲིངས་པའི་འཕྲིན་པ།
ཞུ་ཚིག་སྒྲ་འཛིན་སྙན་པའི་འཕྲིན་པ་ཞིག་མིན་ལ། །
ངག་སྒོ་འབོལ་པོ་གཏོང་བའི་སྙན་ངག་ཞིག་ཀྱང་མིན། །
སེམས་ཀྱི་ཟུག་རྔུ་འབྱིན་པའི་མི་ལྡོག་འདི་ཡི་རིང་། །
སྤྲང་ཆུང་མདོ་སྨད་འཁྱམས་པོས་གླེང་མོལ་ཞིག་འབྲི་ཡ། །
དེང་འདིར་གློག་ཀླད་བྱ་བའི་བྲེལ་འཚུབ་དེ་སྐྱེན་རྐྱེན། །
རང་སེམས་དམར་པོའི་དབུས་ནས་ཡལ་ཐབས་རང་བྲལ་བའི་། །
བཀའ་དྲིན་རྫོགས་མཐའ་བྲལ་བའི་ཕ་ཡུལ་གྱི་གཉེན་ཉེར། །
བདེ་ཞིང་སྐྱིད་པར་གནས་པའི་ཡིད་ཚོད་རང་བྱས་ཡོད། །
བ་གམ་ཁང་བརྩེགས་མཐོན་པོའི་རེ་བཞག་གི་སྤུན་ཆུང་། །
ཁྱོད་བདེ་ང་བདེ་ཀློང་ནས་མི་ཚེ་རང་མ་ཕུད། །
ཚོང་ཟོང་དངོས་པོའི་དོན་དུ་སློབ་སྦྱོང་དེ་མ་ལྷོད། །
རང་མདུན་བསམ་པའི་སེམས་པ་ཁོང་ཁྲོ་ཞིག་སྐྱེས་དགོས། །
བརྩོན་གསུམ་ཆུ་རྒྱུན་རིང་མོས་ངར་ཤུགས་དེ་མེད་ན། །
དཔྱིད་གསུམ་དཔལ་ཡོན་རྒྱས་པའི་སྨྱུ་གུ་ཡི་རྩེ་ལ། །
དབྱར་གསུམ་མེ་ཏོག་བཞད་པའི་གོ་སྐབས་ཙམ་ཡོད་མོད། །
སྟོན་གསུམ་འབྲས་བུ་སྨིན་པའི་དུས་སྐབས་དེ་དབེན་འགྲོ། །
ཀ་མེད་ཁང་བཟང་དཀར་པོའི་སློབ་གྲྭ་ཡི་ཚལ་ནས། །
ཁ་དོག་མིག་ལ་མཛེས་པའི་རྒྱན་ཆ་ལ་མ་དད། །
ག་ས་གང་དུ་བསྡད་ཀྱང་སྨྱུག་ཐོག་ཞིག་བྱས་ན། །
ང་ཡི་སྤུན་ཆུང་བཟང་པོ་དཀའ་ངལ་དེ་དབེན་འགྲོ། །
ཅ་ཅོ་འདུ་འཛིའི་ཀློང་གི་འཁྱམས་པོ་ཡི་ཡར་འཕེལ། །
ཆ་ལུགས་ཟས་གོས་ཁྲོད་ནས་རང་ལུས་ནི་སྐྱིད་ཀྱང་། །
ཇ་ཆང་ལྷ་མོའི་རོལ་བའི་གར་སྟབས་ཀྱི་ཉམས་ཀྱིས། །
ཉ་ལ་ཉོལ་ལེ་ཡོད་ཚད་སྒྱུ་འཕྲུལ་ལ་འཐམས་སོང་། །
ཏ་ལིའི་འདབ་ལྟར་རྒྱས་པའི་སྙིགས་དུས་ཀྱི་ཀློང་འདི། །
ཐ་ཤལ་འཁྱམས་པོ་བསྐལ་བའི་དུས་སྐབས་ནི་མ་རེད། །
ད་ལྟའི་དུས་འདིར་མཁོ་བ་རིག་གནས་རང་ཡིན་པས། །
ན་ཆུང་སློབ་གྲྭར་དཀའ་ཡང་རིག་གནས་ལ་འབད་འདོད། །
པ་པུར་ཉོག་གཏམ་བརྗོད་པའི་ན་གཞོན་གྱི་ང་རང་། །
ཕ་རོལ་རྒྱང་རིང་ཞིག་ནས་འཕྲིན་པ་ཡི་ལམ་འདིར། །
བ་འཇམ་ཚ་རུ་བསྐྱོན་པའི་དྲིན་ལན་ཞིག་ཕར་ཞོག །
མ་ལོའི་སེམས་ཁམས་དཀྲུགས་པས་དགོངས་དག་ཞིག་ཞུའོ་། །
ཙ་ཙིག་དོན་དུ་ཕ་མར་མ་མོག་རང་མ་འདོན། །
ཚ་ཚ་འུར་འུར་ཆེ་བའི་དེངས་སང་གི་དུས་འདིར། །
ཛ་དྲག་སྤྱོད་ངན་གཡོ་འཕྲུལ་འཁོར་ལོ་རང་མྱུར་བས། །
ཝ་མ་ཝོལ་དུ་མ་འདུག་རིག་བཟང་གི་སྤུན་ཆུང་། །
ཞྭ་གོས་ཐད་ནས་ཨ་ཕ་གཅེས་སློང་རང་མ་བྱེད། །
ཟ་མའི་ཐད་ནས་ཨ་མ་སྡང་མིག་དེ་མ་འཕེན། །
འ་ཅག་བོད་ཀྱི་སློབ་མའི་འདུ་ཤེས་ཤིག་བཟུང་ནས། །
ཡ་མ་ཡོལ་དུ་མ་འདུག་སྙིང་ཁོང་གི་སྲིང་ཆུང་། །
ར་བ་གཞི་ཁྱིམ་གཅིག་གི་བརྟན་འཛོམས་དེ་མེད་མོད། །
ལ་ལུང་གང་དུ་འཁྱམས་ཀྱང་སེམས་ཁོང་ནས་མ་ཡལ། །
ཤ་ཚ་སྙིང་ནས་གཅེས་པའི་བཟའ་མི་ཡི་ཡོངས་ལ། །
ས་སྲོད་མཚམས་སྤྲིན་དམར་པོའི་བཀའ་དྲིན་འདི་འབུལ་ལོ། །
ཧ་ཧ་དགོད་སྒྲའི་ཁེངས་པའི་གཏན་འཛོམས་དེ་འབྱུང་བར། །
ཨ་ཁོ་ང་ཡི་སློབ་སྦྱོང་བསྐལ་བ་དེ་མེད་ཀྱང་། །
ཧ་བོ་འགྱོད་པའི་ལག་པས་མགོ་བོ་ནི་མི་བརྡུང་། །
ཨ་ལ་ཁ་མཚར་ཀློང་ནས་བདེ་མོ་རང་འཇོག་རན། །
- ཟིན་ཐོ་གོང་མ།རྡོ་གོར་མོའི་སྙན་རྩོམ།
- ཟིན་ཐོ་འོག་མ།ཧི་བོན་ཇ་ཁང་གླིང་དུ་ཕེབས་པར་དགའ་བསུ་ཞུ།
ཉིད་ཀྱི་ཟིན་བྲིས་ལས་རྩོམ་ཡིག་འདི་ལ་བློ་འཐད་བྱུང་ཡོད། བློ་མིག་གིས།