།༢༠༡༢ ལོའི་ཟླ་༣་པའི་ཚེས་གཅིག་ཉིན། དགོན་པ་བཅོས་སྒྲིགས་བྱས་ཏེ། དགོན་པ་དོ་དམ་ཁང་གི། ཀྲུའུ་རིན་ལྷག་པ་དང་། རྒྱུན་ལ་ཀྲུའུ་རིན་གཞོན་པ་ལིད་ཁྲང་ཧྲི། ཀྲུའུ་རིན་གཞོན་པ་ཕྲན།  ཨུ་ཡོན་བསམ་གཏན་དགེ་ལེགས། བདེ་སྲུང་ཁྲིང་ཁྲོར་བཅས་བསྐོ་བཞག་བྱས། ༢༠༡༢ལོའི་ཟླ་༨་པའི་ཚེས་༨་ཉིན་སྒྲུབ་ཁང་དང་། གྲྭ་པ་མང་ཆེ་བ་དགོན་པའི་གྲྭ་ཤག་གསར་པར་སྤོས། ༢༠༡༢ ལོའི་ཟླ་༡༠་པའི་ཚེས་༡༠ ཉིན་སྒྲུབ་གྲྭ་རྣམས་དགོན་པའི་གྲྭ་ཤག་གསར་པར་སྤོས། སྤྱི་ལོ་༢༠༡༠་ལོ་ནས་འགོ་གཙུག་སྟེ། དགོན་པ་འདི་བཞེངས་བྱེད། དཔལ་འབྱོར་མ་རྩ་ནི་ནག་རུ་ལྷ་སྡེའི། བརྟན་རྩ་ཞལ་འདེབས་ཕུལ་བ། ཁྲི་ཉིས་བརྒྱ་ཁ་ལྷག་དེ། གཞིར་བཞག་དེ་སྟེང་ཕྲན་གྱིས་ །ཡོངས་འབེབས་གང་ཡོད་དང་། དེ་མིན་ཕྲན་དང་། གཞན་བླ་གྲྭ་མཁན་སློབ་ཚང་མས་འབུ་ལྡོམ་དངུལ་ཕབ། སྒོར་ཁྲི་སུམ་བཅུ་ལྷག་དང་། ལྡོམ་བུ་དངུལ་སྨར་ཁྱོན་སྒོར་ཁྲི་བཅོ་ལྔ་ལྷག ཕྱོགས་གཞན་གྱི་བརྟན་རྩ་ཞལ་འདེབས་ཕུལ་བ། སྒོར་ཁྲི་ལྔ་ལྷག་བཅས་བྱུང་བ་དང་། ཚུན་དང་ཙུའུ་ཡི་འགོ་ཁྲིད་ཀྱི། སྡེ་མང་ཚོགས་ལ་སློབ་གསོ་དང་སྣེ་ཁྲིད་མཛད་དེ། སྒོར་ཁྲི་བཅུ་ལྷག་གི་རྒྱབ་སྐྱོར་དང་། དེ་བཞིན་ཀྱི་དངོས་ཤུགས་རྒྱུད་གསུམ་ནས། རྒྱབ་སྐྱོར་རོགས་རིམ་ཤུགས་ཆེན་བྱས་པ་རེད།  སླར་ཡང་ཆུ་འབྲུག་ ༢༠༡༣ ཧོར་ཟླ་བཅུ་གཉིས་པའི་ཚེས་གཉིས་ཉིན། གྲུབ་ཆེན་ནམ་མཁའ་རྒྱལ་མཚན་གདན་དྲངས་ཏེ། ཨ་དཀར་བུམ་སྒྲུབ་ཉིན་བདུན་ལ་འཚོགས་ཤིང་། དེའི་རིང་ཐུན་བར་དུ་གྲུབ་ཆེན་མཆོག་ནས། དགེ་སྒྲུབ་སྡིག་སྤངས་དགོས་ལུགས་ཀྱི། བོན་གནང་བས་མ་ཚད། འདི་ལོར་སླར་ཡང་ལྷ་བཞེངས་བྱེད་དང་གསེར་འཕྲུ་བཞེང་བྱེད་ལ། གྲུབ་ཆེན་མཆོག་ནས་དང་པོ། སྒོར་ཁྲི་གཉིས་གནང་བ་དང་། བོན་པོའི་དགོན་སྡེ་ཡོངས་ཀྱི་བསྟན་པ་སྤྱི་དོན་ལ། ལྷག་བསམ་ཤིན་ཏུ་དཀར་བས།  མི་དམངས་མང་ཚོགས་ཀྱི་དབུ་ཁྲིད། ལྷ་མཐོང་ཚུན་གྱི་ཚུན་ཀྲང། བཀྲ་ཤིས་སྐྱིད་གསར་ཚང་གི་ཨ་ར་ནས། དེ་སྔོན་བརྟན་རྩ་དང་ཀ་རིང་ཞལ་འདེབས་ལ། སྒོར་ཁྲི་གསུམ་ལྷག་དགོན་པར་ཕུལ་བ་མ་ཚད། འདི་ལོར་སླར་ཡང་འདུ་ཁང་ནང་ལྷ་བཞེང་བྱེད་དང་། གསེར་ཁྲི་རྒྱ་ཕེགས་བཟོ་བྱེད། སྒོར་ཁྲི་དྲུག་ཐོ་འགོད་མཛད་སོང་ལ་དུས་རྒྱུན། ཁོང་གི་དགོན་པར་འདུ་འཚོགས་ཀྱི་ཆེད་དང་། ལྕི་ཤིང་ཞལ་འདེབས་སོགས། སྣེ་ཁྲིད་དང་སློབ་གསོ་དཔེ་སྟོན་བཅས། མཛད་མཁན་གྱི། མང་ཚོགས་ཀྱི་དབུ་ཁྲིད་འཇོན་ཐང་ཅན་ལགས། དེ་བཞིན་བོན་བསྟན་སྤྱི་ལ་ཕན་སེམས་འཆང་བ་དང་། ལྷ་མཐོང་ཚུན་ཀྱི་ཚུན་ཀྲང་གཞོན་པ་བཤད་སར་ཚང་། བུ་ཡང་ནས་དེ་སྔོན་བསྟན་རྩ་སྒོར་ཁྲི་གཅིག་ཕུལ་ཟིན་པ་དང་། ཁྲི་བཞི་བཅུ་ལྷག་རུ་བའི་ཁང་པ་ཞིག་ཕུལ་བ། དགོན་པར་དེ་སྔོན་འཚོགས་འདུ་བ། ལྕི་ཤིང་ཞལ་འདེབས་སོགས་ཀྱི་སྣེ་ཁྲིད་པ་ལགས། དེ་བཞིན་ཚུན་གྱིས་དབུ་ཁྲིད་རྒན་པ་རྣམ་རྒྱལ་གྱིས། ལོ་མང་ལ་དགོན་པར་རྒྱབ་སྐྱོར་དང་། རོགས་རིམ་བརྟན་རྩ་ཕུལ་ནས། དབུ་ཁྲིད་མཛད་པའི་བཤོ་སྲོལ་ལྟར། ཚུན་གྱི་དབུ་ཁྲིད་གཞོན་པ་བཀྲིས་སོགས། ཚུན་ཙུའུ་དབུ་ཁྲིད་ཚང་མའི་དགོན་པར། བརྟན་རྩ་ཞལ་འདེབས་ཕུལ་བ་དང་། དགོན་པའི་འདུ་འཚོགས་སོགས་ལས་དོན་ཡོངས་ལ། སྣེ་ཁྲིད་བྱས་པ་འབྲི་མི་ལོང་ལ། དེ་བཞིན་དུ་རུ་ཁག་གསུམ་པའི་འགོ་ཁྲིད་བཀྲིས་ཀྱིས། དུས་རྒྱུན་ཕྱོགས་ཀྱི་དགོན་སྡེ་ཁག་སོགས། དགོན་པའི་ལས་དཀའ་དང་། འདུ་འཚོགས་བརྟན་རྩ་ལྕི་ཤིང་སོགས། གང་དགོས་ལ་ཧུར་བརྩོན་ཆེན་པོས། མང་ཚོགས་ལ་སློབ་གསོ་དང་། སྣེ་ཁྲིད། སྔོན་ཐོན་དཔེ་སྟོན་བཅས་མཛད་པ་དང་། འདི་ལོར་སླར་ཡང་བརྟན་རྩ་ཞལ་འདེབས་སྒོར་ཐོ་བཀོད་སོང་ལ། ཁོང་ནི་བོན་པོ་སྤྱི་ཡི་བསྟན་ལ་ལྷག་བསམ་ཤིན་ཏུ་དཀར་བས། དགེ་བའི་སྣ་འདྲེན་ཆེན་མོ་ལགས། དེ་བཞིན་དགོན་པའི་བསྟན་ལ་ལྷག་བསམ་ཤིན་ཏུ་དཀར་བས། འབོ་ནོར་བུ་དང་། དགེ་རྒན་སྐར་མ་འབྲུག་རྒྱལ་ཕ་བུ་གཉིས་ཀྱིས། དུས་དང་རྣམ་པ་ཀུན་ཏུ། དགོན་པ་ཀུན་ལ་ལྷག་བསམ་དཀར་པོས། བརྟན་རྩ་ཞལ་འདེབས་ཕུལ་བ་དང་། རྒྱབ་སྐྱོར་རོགས་རིམ་བྱས་པ་གྲངས་ལས་འདས་སོ། དེ་བཞིན་ཨ་རྔ་ཚང་གི་ཚེ་དབང་གཡུང་དྲུང་ནས། དེ་སྔོན་བརྟན་རྩ་ཁྲི་གཉིས་ཕུལ་བ་དང་།  སྒོར་ཁྲི་གཉིས་ལྷག་རི་བའི། འཁོར་ཆེན་གཅིག་གི། སྦྱིན་བདག་མཛད་པས་མ་ཚད། འདི་ལོ་སླར་ཡང་ཡང་བརྟན་རྩ་སྒོར་ཁྲི་ལྔ་ཐོ་འགོད་མཛད་སོང་། དེ་བཞིན་འབྱོར་ལྡན་མཐོ་པོ་ཚང་ནས། དེ་སྔོན་བརྟན་རྩ་སྒོར་ཁྲི་གཅིག་ཕུལ་བས་མ་ཚད། འདི་ལོར་སླར་ཡང་བརྟན་རྩ་སྒོར་ཁྲི་ལྔ་ཐོ་འགོད་བྱས་སོང་། དེ་ལྟར་དགོན་པའི་སྦྱིན་བདག་ནག་རུ་ལྷ་མཐོང་གི་ མང་ཚོགས་ལྷག་བསམ་ཅན་ཁ་ཤས་ནས། བརྟན་རྩ་ཁྲི་གསུམ་དང་། ཁྲི་གཉིས། ཁྲི་གཅིག་སོགས་ཕུལ་བ། ཁྱོན་བསྡོམས་སྒོར་ཁྲི་གཅིག་བརྒྱ་བཞི་བཅུ་ཞེ་ལྔ། ལྷག་ཐོ་འགོད་མཛད་སོང་བ། དག་གི་མཚན་ཐོ་ཟུར་དུ་བཀོད་པ་གསལ།  དེ་བཞིན་རྗེས་སུ་དགོན་པར། ཞལ་འདེབས་ཕུལ་མཁན་རྣམས་ཀྱི། མཚན་ཐོ་འང་རིམ་བཞིན་འགོད་འཆར་རོ། དེ་རྗེས་འདི་ལྟའི་དགོན་པའི་དཔལ་འབྱོར་ཕྱུག་པ་དེའི་རྐྱེན་བྱས། ཕྲན་གྱི་མིང་དང་གོ་ས་ལ་ཕྲག་དོག་ནས། དེ་དག་འདོད་རྔམས་ཀྱི་ཚོར་བ་དྲག་པོས་བསམ་པའི་ཀུན་ནས་སློང་ཏེ། ཐབས་ཤེས་རྣམ་པ་སྣ་ཚོགས་ཀྱིས། ཕུ་དཀྲུག་མདའ་དཀྲུག་བྱས་པས་མ་ཚད། དཔོན་པོ་ལྷག་པ་སོགས་སྡོང་གྲོགས་ལ་བརྔན། མཁན་པོ་ཡེ་ཤེས་རབ་གསལ་དངོས་ཀྱིས་ཕྲན་ལ་རྡོ་རྒྱོབ་སྟེ། དམག་སྣེ་ཁྲིད་ནས་ཕྲན་བསད་བསམ་ཡང་། དེ་སྔ་ལོ་མང་གཤིབ་པས་མཁན་པོ་ཚུལ་ཁྲིམས་ཉི་མས་གཙོས། གྲྭ་ཐོ་ཡོད་པས་གྲྭ་པ་རྣམས་ཀྱིས། ཕྲན་བསད་མ་བཅུག་ཀྱང་། ད་རུང་སྨན་པར་བརྔན་ནས། ཕྲན་ལ་སྨན་བཅོས་མི་བྱེད་པས་རེ་བ་ཞུས་ཀྱང་། སྨན་པས་མ་ཉན་པས། ཆོས་དོན་ཅུས་ཀྱིས་དཔོན་པོར་བརྔན་ནས། ཕྲན་ལ་སྨན་བཅོས་བྱེད་མི་ཆོག་པས་བཀའ་གནང་བྱུང་། ཕྲན་གྱིས་རེ་བ་ཞུས་ཏེ། སྨན་བཅོས་བྱེད་ས་རྙེད་ཙམ་བྱུང་ནས་དགོན་པར་སྡོད་སྐབས། སྒྲུབ་གྲྭ་དང་གྲྭ་ཤག་ནང་དགོན་པ་དོ་དམ་པ་གདན་དྲངས་ཏེ། ཉིན་ལྟར་སྟོན་མོ་དྲོངས་ནས་གཟི་རྗེས། ཧ་ལམ་ཉིན་ལྟར་ཀྲུའུ་རིན་ལྷག་པས། སློབ་གསོའི་མིང་ཐོག་ནས། ཕྲན་ལ་ཁ་བརྡུང་བཏང་བ་དང་། ཆང་རག་ཁ་ངོར་རྒྱབ་པ། ཁ་སྤར་འཕྲོགས་པ། ཟ་མ་བཟའ་མི་བཅོལ་བ་དང་།སྡེ་ནང་ལ་འདོན་པ་འདོན་མི་སོང་ན། བདེ་སྲུང་བ་མངག་ནས་བཙན་གྱིས་བཀུགས་པ།  ཁ་ལན་སློག་ན་སྒོ་ལྕགས་རྒྱོབ་ནས། ཁང་པར་བཙུད་པ་དང་། བདེ་སྲུང་མི་སྣའི་སྒོ་སྲུང་བཅོལ་ནས། འགྲོ་སྡོད་མི་བཅོལ་སོགས། མི་ཆོས་ལས་འདས་པས་མནར་གཅོད་མ་བཟོད་བྱས་ཏེ། དགོན་པར་ཉིན་གཅིག་ལའང་། བློ་བདེ་བག་ཕེབས་བྱས་ཏེ་སྡོད་མི་བཅོལ་བས། སྲིད་གཞུང་དང་ཚུན་དགོན་པ་། བླ་གྲྭ་བཅས་ལ་དགོངས་ཞུ་ཡི་གེ་ཐེངས་གསུམ་ཕུལ་ཡང་། དགོངས་པ་མ་སྟེར་བས། ཀྲུའུ་རིན་ལྷག་པར་གོང་གཏུགས་བྱས་པ་ཡིན། གོང་གཏུགས་བྱས་ཀྱང་། ཁྲིམས་ཁང་དང་ཆོས་དོན་སུ་ཡིས་བདག་སྤྲོད་མ་བྱས་པས། དྲྭ་ཐོག་ཏུ་ཡི་གེ་སྤེལ་བ་ཡིན་པས། མཐར་དགོངས་ཁྲོལ་བྱུང་སོང་བ་བཅས་སོ།  རྣམ་འདྲེན་བླ་རྒྱུད་བཀའ་དྲིན་དྲན་གསོ་དང་། མ་གྱུར་འགྲོ་བ་ཐར་པའི་ལམ་གྲོགས་སུ། དམིགས་ཏེ་འབད་པས་སྒྲུབ་པའི་རྣམ་དཀར་ཆ། ཡིད་བཞིན་ནོར་ལྟར་འདོད་དོན་འགྲུབ་གྱུར་ཅིག༎ཅེས་པ་འདི་ནི་དགོན་བསམ་གཏན་གླིང་གི་ དགོན་པ་དམངས་གཙོ། བདག་གཉེར་ཚོགས་ཆུང་གིས་མཐའ་ཞུ་བླ་རབས་སོགས། ལོ་རྒྱུས་ཡིག་ཆ་ལ་ཞིབ་པར་དཔྱད་ནས། ཕྱོགས་ཀྱི་མཁས་གྲུབ་མང་པོ་ལ་བཀའ་འདྲི་ཞུས་པ་ཏེ། རྒན་རབས་མྱོང་བ་ཅན་འབོ་ནོར་བུ་དང་། སྔོན་ནག་རུ་དཔོན་གྱི་སྲས་མོ། འཆི་མེད་ཚེ་དཔག་དང་། ནག་རུ་སྲས་པོ་ཨ་སྦོ་སོགས་ལ། ཞུ་འདྲི་བྱས་ཤིང་རང་དགོན་གྱི་བླ་གྲྭ་ལྔ་བཅུ་ལྷག་ཙམ་ལ། བསམ་ཆར་བསྡུ་ལེན་བྱས་པས་ཚང་མས་མོས་མཐུན་ཐོབ་པ་དང་། དགོན་པའི་ལོ་རྒྱུས་དངོས་དང་མཐུན་པར། ཁྱུང་ནག་དགོན་དམངས་གཙོ་བདག་གཉེར་ཨུ་ཡོན་ལྷན་ཁང་གིས། ༢༠༡༠ ལོར་བརྩམ་པ་དང་། གཞིར་བཟུང་ནས་སྤྱི་ལོ་༢༠༡༣་ལོར་མཐའ་ཞུ་འོད་ཟེར་མཐའ་རྒྱས་པས་་བྲིས་པ་དགེའོ༎