སྲོང་བཙན་གོང་དུ་བོད་ཡིག་ཡོད་པའི་བདེན་དཔང་།    འོས་སྦྱོར།

གཉའ་ཁྲི་ཡབ་སྲས་རྒྱུད་པར་བཅས་ལ་གུས་པས་འདུད།

སྲོང་བཙན་གོང་དུ་བོད་ཡིག་ཡོད་པའི་བདེན་དཔང་འཚོལ་བ་ལ།

ཞང་ཞུང་སྨར་ཆེན་ལ་དཔེ་བླང་ནས་འབྲུ་མ་དང་སྨར་ཆུང་ལ་དཔེ་བླང་ནས་དབུ་ཅན་དུ་ཞང་བོད་མཁས་པ་མི་བཞིའི་ཞང་བོད་སྒྲ་བསྒྱུར་མཛད་པས་སྐོར་ནས་འབྲི་སྲོལ་བྱུང་ཅེས་པ་སོགས་བཤད་སྲོལ་འདུག་ལ་གཡུང་དྲུང་བོན་གྱི་ལོ་རྒྱུས་ཁག་ལས་ཡིག་གཟུག་འདྲ་མིན་གང་ལྟར་ཡང་འཕྲུལ་ཡིག་བཞི་བཅུ་ནི་སྟོན་པ་གཤེན་རབ་དུས་ནས་ཡོད་པ་དང་བོད་དུ་གཉའ་ཁྲི་དང་མུ་ཁྲིའི་དུས་ནས་བོན་དར་བ་དང་ལྷན་དུ་དར་བར་འདོད། དེ་ལ་བོན་པོ་སྤྱི་དང་གཟུར་གནས་མཁས་པ་མང་པོའི་བདེན་དོན་ལོ་རྒྱུས་ལ་ཐེ་ཚོམ་སྐྱེ་མི་སྲིད་ཀྱང་། གཞན་སྡེའི་སྔ་ཕྱིའི་མཁས་པ་མང་པོས་ལྷོ་བལ་གྱི་ཆོས་ལ་བསྟོད་འདོད་ནས་ བོད་ཀྱི་ལོ་རྒྱུས་འཆད་ཁུལ་ཀྱི་བོད་མི་རིགས་རང་ཉིད་ཀྱི་རིགས་གནས་ལོ་རྒྱུས་ཀྱི་ ཕུག་ལྷོ་བལ་རྒྱ་གར་གྱི་ཡུལ་དུ་གཏུག་མཁན་ཕྱོགས་ལྷུང་ཅན་ཁ་ཤས་གྱིས་ སྲོང་བཙན་གོང་དུ་བོད་མུན་པའི་གླིང་ཞེས་རིག་གནས་ཐམས་ཅད་ཀྱི་རྩ་བ་ཡི་གེ་སོགས་རིག་གནས་སོགས་གང་ཡང་མེད་པར་སྒྲུབ་མཁན་རྣམས་ལ་བོན་གྱི་ལོ་རྒྱུས་གྱི་བདེན་པ་ར་སྤྲོད་ག་ཚད་བྱས་ཀྱང་ཡི་རང་མི་བྱེད་པར་འདུག་པས་ཆོས་འབྱུང་དང་རྒྱལ་རབས་ལོ་རྒྱུས་རྙིང་པ་ཁག་གཅིག་ལས་སྲོང་བཙན་གོང་དུ་བོད་ལ་ཡིག་གེ་མེད་ཅེས་བཙན་གྱིས་བཤད་ཀྱང་ལོ་རྒྱུས་ཀྱི་བར་གསེང་ནས་སྲོང་བཙན་གོང་དུ་བོད་ལ་ཡི་གེ་ཡོད་པའི་རྒྱུ་མཚན་དང་བདེན་དཔང་ཡང་ཁ་ཤས་མཐོང་རྒྱུ་ཡོད་འདུག་པ་ལས།   སྤྱི་ལོའི་དུས་རབས་བརྒྱད་པའི་ཁྲི་སྲོང་ལྡེ་བཙན་སྐབས་སུ་བྲིས་པར་གྲགས་པའི་དབའ་བཞེད་ལས་བོད་ཁམས་སུ་དང་པོ་དམ་པའི་བཙན་པོ་ལྷ་ཐོ་དོ་རེ་སྙན་བཙན་གྱི་སྐུ་རིང་ལ་དབུ་བརྙེས་པ་རྒྱ་གར་གྱི་ཡི་གེ་དྲུག་པ་མ་ཎི་པད་མེ་གསེར་ལས་བྲིས་པ་སྒྲོམ་བུར་བཅུག་ནས་ནམ་མཁའ་ལས་མངའ་བདག་གི་དྲུང་དུ་བབས་པ་ཆོས་དང་བོན་དུ་ངོ་མ་ཤེས་ཏེ་དེ་ལ་གཉན་པོ་གསང་བ་ཞེས་མིང་བཏགས་ཏེ་གཡུ་མངོན་དང་གསེར་སྐྱེམས་ཀྱིས་མཆོད་ཅེས་པ་ལས་མ་ཎི་གསེར་གྱི་བྲིས་པ་དེ་རྒྱ་གར་གྱི་ཡི་གེ་ཡིན་རྐྱེན་ཆོས་ཡིན་པ་དང་ བོན་ཡིན་པ་ངོ་མ་ཤེས་ཞེས་པ་ལས་དེ་དུས་བོན་ཆོས་ཡི་གེ་རིས་སུ་ཡོད་པ་གསལ་བཤད་བྱས། ཡང་སྤྱི་ལོ་༡༡༥༠ སྐོར་རྩོམ་པའི་ཉང་གི་ཆོས་འབྱུང་ལས་ མཚན་ཡང་ལྷ་ཐོ་ཐོ་རི་སྙན་ཤལ་དུ་གྲགས་པའོ་བོན་པོ་ཅོ་་བོན་གསང་སྐྱེས་ཀྱིས་བསྲུང་སོ་རྒྱལ་པོ་དེའི་སྐུ་རིང་ལ་དམ་པའི་ཆོས་ཀྱི་དབུ་བརྙེས་པ་ལགས་ཏེ་ཕོ་བྲང་ཡུན་བུ་ལྷ་སྒང་གི་སྐུ་མཁར་གྱི་སྟེང་ན་དགུང་ལོ་དྲུག་བཅུ་བཞེས་པ་མུ་འགྲམ་སོ་སོང་བ་ཞིག་བཞུགས་པ་ལ་ནམ་མཁའ་ནས་ཚུར་ལ་ཉི་མའི་ཟེར་དང་འགྲོགས་ནས་འོད་ཟེར་སྣ་ལྔའི་སྣ་ལ་རིན་པོ་ཆེའི་ཟ་མ་ཏོག་གི་ནང་དུ་གསེར་གྱི་གླེགས་བམ་མུ་ཏྲའི་ཕྱག་རྒྱ་དང་བཅས་པ་ཞིག་འདུག་སྟེ་དེ་ཆོས་དང་བོན་གང་ཡིན་ངོ་མ་ཤེས་ཀྱང་ངོ་མཚར་ཆེ་བ་ཞིག་འདུག་གོ་ཞེས་དང་ཡང་དེ་དང་མཐུན་པར་མ་ཎི་བཀའ་འབུམ་ལས་བོད་གློ་བུར་གྱི་རྒྱལ་པོ་ལྷ་ཐོ་ཐོ་རི་སྙན་ཤལ་བྱ་བ་ཕོ་བྲང་ཡུམ་བུ་བླ་སྒང་སྙན་གྱི་རྩེ་ན་བཞུག་པའི་སུས་ན་ཐུགས་རྗེ་ཆེན་པོའི་་སྤྱན་རས་གཟིགས་ཀྱི་ཐུགས་ཀ་ནས་འོད་ཟེར་རྣམ་པ་ལྔ་འཕྲོས་པའི་སྣ་ལ་རིན་པོ་ཆེ་ཟ་མ་ཏོག་གི་ནང་ནས་གསེར་གྱི་གླེགས་བམ་ལ་ལ་བེེ་ཌྰུརྱ་ཞུན་མས་རྒྱ་ཡིག་ཏུ་མདོ་སྡེ་ཟ་མ་ཏོག་བཀོད་པ་དང་སྤང་སྐོང་ཕྱག་རྒྱ་པ་དང་རྟེན་འབྲེལ་བཅུ་གཉིས་ཀྱི་གཟུང་དང་དགེ་བ་བཅུའི་མདོ་དང་བཞི་བཅུག་ནས་ཉི་མའི་ཟེར་དང་འགྲོགས་ཏེ་རྒྱལ་པོའི་ཁང་ཐོག་ཏུ་བབས་པ་ལས་དེ་རྒྱལ་པོའི་ཁ་ཕྱེ་ནས་གཟིགས་པས་ཆོས་ཡིན་ནམ་བོན་ཡིན་ངོ་མ་ཤེས་ཏེ་ངོ་མཚར་ཆེ་བ་ཞིག་འདུག་པར་མཐོང་ཞེས་ གླེགས་བམ་ཞིག་འདུག་སྟེ་ཆོས་དང་བོན་གང་ཡིན་ངོ་མ་ཤེས་ཞེས་པ་ལས་ སྐབས་དེར་བོན་དཔེ་རྣམས་ཀྱང་པོ་ཏི་གླེགས་བམ་གྱི་རྣམ་པ་ཡོད་པའང་ཞོར་ལ་རྟོགས། ཡང་སྲོང་བཙན་གོང་དུ་བོད་ཡིག་ཡོད་པའི་བདེན་དཔང་ནི། བཙན་པོ་ཁྲི་སྲོང་ལྡེ་བཙན་སྐབས་སུ་བྲིས་པར་གྲགས་པའི་རྦ་བཞེད་ལས་ཡང་ཁྲི་སེ་བཙན་པོའི་ཚེ་བོད་གྱི་ཡི་གེ་བྱུང་བ་དང་གྲི་གུམ་བཙན་པོའི་ཚེ་སྟོད་ལ་བོན་པོ་རྫུ་འཕྲུལ་ཅན་གྱིས་བོན་གྱི་དཔེ་ཆ་སྤེལ་བ་དང་ཚེ་སྨད་ལ་འགའ་གྱིམ་ཚ་མེ་ཉག་ལྕེ་ཚ་ཡིན་ནམ་སྙམ་འཆན་ཁྱིམ་ཚ་མེ་སྟག་ལྕེ་ཚ་ལ་སོགས་པས་དེ་དག་གཏེར་དུ་སྦས་པ་དང་གནམ་རི་སྲོང་བཙན་གྱི་ཚེ་བོད་ཀྱི་ཡི་གེ་བྱུང་བ་དང་རྩིས་བསྒྱུར་བར་འཆད་ཡོད་ མོད་ཀྱི་ལོ་ཚ་བ་སམ་བྷོ་ཊའི་གོང་དུ་བོད་ཀྱི་ཡི་གེ་མེད་པར་གླིང་གཞི་ཁུངས་མ་རྣམས་མཐུན་པར་སྣང་ངོ་། ཞེས་ལོ་རྒྱུས་ཁ་ཤས་ནང་གྲི་གུམ་གོང་ནས་བོད་ལ་ཡི་གེ་ཡོད་པའི་སྐོར་འཁོད་པ་གསལ་བཤད་བྱས་འདུག་ལ་གླིང་གཞི་ཁུང་མ་རྣམ་ལས་ཟེར་བ་དེ་ནི་བདེན་པའི་ལོ་རྒྱུས་དེ་གཡོར་བྱེད་དུ་མཐོང་ངོ་། ཡང་ཉང་གི་ཆོས་འབྱུང་ལས་ བོད་ཀྱི་ཡི་གེ་ཡང་སོ་ཁྲིམ་འབུད་བཙན་པོའི་རིང་ལ་བྱུང་བར་འདོད་པའང་ཡོད་དོ། ཞེས་གོང་གི་ཁྲི་སོ་བཙན་པོ་དང་ཁྲིམ་སོ་འབུད་བཙན་པོ་ཞེས་པ་དེ་ བོད་རྒྱལ་བཞི་པ་སོ་ཁྲི་བཙན་པོ་ཡིན་ནམ་སྙམ་མིན་ཀྱང་གྲི་གུམ་གོང་ནས་ཡིན་པ་གསལ་ལ་ཡང་སྲོང་བཙན་གོང་ནས་བོད་ལ་ཡི་གེ་ཡོད་པར་ཤེས་བྱེད་གཅིག་ནི། རྒྱལ་རབས་གསལ་བའི་མེ་ལོང་ལས་རྒྱལ་བློན་འདི་གཉིས་ནི་སྤུ་ལྡེ་གུང་རྒྱལ་དང་རུ་ལས་སྐྱེས་ཀྱི་དུས་སུ་གཡུང་དྲུང་གི་བོན་བྱུང་སྟེ་སྟོན་པ་གཤེན་རབ་མི་བོ་ཆེ་བྱ་བ་སྟག་གཟིག་འོལ་མོ་ལུང་རིང་སུ་སྐུ་འཁྲུངས་ཁམས་ཆེན་པོ་བརྒྱད་ལ་སོགས་པ་བོན་པོའི་ཆོས་ཐམས་ཅད་ཞང་ཞུང་གི་ཡུལ་ནས་བསྒྱུར་ཏེ་དར་ཞིང་རྒྱས་པར་མཛད་བོན་ལ་རིགས་དགུ་རུ་ཕྱེ་སྟེ་རྒྱུའི་བོན་པོ་ལ་རིགས་བཞི་འབྲས་བུས་བོན་ལ་རིགས་ལྔ་ཞེས་པ་ལ་བརྟགས་ན་ཁམས་ཆེན་པོ་བརྒྱད་ཁོ་ནར་པོ་ཏི་གླེགས་བམ་བཅུ་དྲུག་དང་དེ་མིན་རྒྱུ་འབྲས་ཀྱི་བོན་རིགས་དགུ་ཞེས་པ་དེ་རྣམ་རྒྱ་ཆེ་ལ་ཚིག་ཚོགས་ཤིན་ཏུ་མང་བའི་བོན་སྡེའི་རིགས་ཡིན་པའི་དེ་ཀུན་བློ་འཛིན་བྱེད་མི་ཐུབ་པ་ནི་མངོན་སུམ་ཚད་གྲུབ་ཡིན་པས་ཁམས་ཆེན་པོ་བརྒྱད་ལ་སོགས་པ་བོན་པོའི་ཆོས་ཐམས་ཅད་ཞང་ཞུང་གི་ཡུལ་ནས་བསྒྱུར་ཏེ་ཞེས་པའི་ཚིག་སྒྲུབ་འདི་ཁོ་ནས་ཀྱང་དེ་དུས་བོད་ཡིག་ཡོད་པ་གསལ་པོར་ཤེས་རྟོགས་ཐུབ་པ་ཡིན་ནོ། རྦ་བཞེད་ལས་གནམ་རི་སྲོང་བཙན་འདིའི་རིང་ལ་རྒྱ་ནག་ལས་རྩིས་བསྒྱུར་ཞེས་འཁོད་པས་བསྒྱུར་ཞེས་པ་ནི་རྒྱ་ནག་གི་ཡི་གེ་ལས་བོད་ཡིག་ཏུ་བསྒྱུར་བས་དོན་ ལ་གོ་བས་སྐབས་དེར་བོད་ཡིག་ཡོད་པའི་བདེན་དཔང་གཅིག་རེད་སྙམ་ ཡང་བེེ་རོའི་རྣམ་ཐར་འདྲ་འབག་ཆེན་མོ་ལས་ སྲོང་བཙན་སྒོམ་པོའི་སྐུ་དྲིན་ལས་རྒྱ་གར་མཁས་པ་ལི་བྱིན་སྤྱན་དྲངས་མཐོན་མི་མི་ཆུང་སམ་ཊས་ཡིག་གེ་བསྒྱུར་ཙིན་རྡ་མ་ནི་འདུས་པ་རིན་པོ་ཆེའི་ཏོག་དགེ་བ་བཅུའི་མདོ་ལས་སོགས་ཤས་ཙམ་བསྒྱུར་ ཞེས་པས་དེ་སྔོན་བོད་ལ་ཡིག་གེ་ཡོད་ནས་ཐོན་མི་སམ་བྷོ་ཊས་ཡི་གེ་བསྒྱུར་ཞེས་པའི་ཚིག་སྒྲུབ་དེ་བྱུང་བ་ལས་དེ་སྔོན་བོད་ལ་ཡིག་གེ་མེད་པ་ཡིན་ན་ཡི་གེ་བསྒྱུར་ཞེས་པས་ཚིག་སྒྲུབ་དེའི་བསྒྱུར་བྱ་གང་ཡང་འགྲུབ་ཏུ་མེད་དོ། ཡང་དེབ་ཐེར་དམར་པོ་ལས་རྒྱ་གར་གྱི་སློབ་དཔོན་ཀུ་ས་ར་དང་བྲམ་ཟེ་ཤམ་ཀ་ར་དང་བལ་པོའི་སློབ་དཔོན་ཤི་མཉྫུ་དང་ཁ་ཆེའི་སློབ་དཔོན་ཏ་ནུ་ཏ་དང་གྷ་ནུ་ཏ་དང་རྒྱ་གར་གྱི་མཁན་པོ་ལི་བྱིན་དང་ཧ་ཤང་མ་ཧ་དེ་བ་སྤྱན་དྲངས་ནས་ལོ་ཙྰ་བ་ཐོན་མི་སམ་བྷོ་ཊ་དེའི་འཆན་བུ་རྡ་མ་ཀོ་ཤ་དང་ལྷ་ལུང་རྡོ་རྗེ་དཔལ་རྣམ་ཀྱིས་ཆོས་ཅི་རིགས་སུ་བསྒྱུར་ཅིང་གཏན་ལ་ཕབ་ཐོན་མིས་རྒྱ་གར་གྱི་ཡི་གེ་ལ་དཔེ་བྱས་བྱས་ནས་བོད་ཀྱི་ཡི་གེ་བརྩམས་ ཞེས་གསུང་པ་དེ་དཔྱད་ན་ཐོན་མིས་བོད་ཡིག་མ་བརྩམས་པའི་གོང་ནས་རྒྱ་གར་མཁན་པོ་རྣམས་བོད་དུ་སྤྱན་དྲངས་ཤིང་གོང་གསལ་ལོང་ཙྰ་བ་གསུམ་གྱིས་རྒྱ་ཆོས་ཅི་རིགས་ཤིག་བོད་སྐད་དུ་བསྒྱུར་ཅིང་གཏན་ལ་ཕབ་དེ་རྗེས་སུ་ཐོན་མིས་བོད་ཡིག་གསར་དུ་བརྩམས་ཡོད་པ་གོང་དུ་བསྟན་པ་དེ་ལྟར་ན་དེ་སྔོན་བོད་དུ་ཡི་གེ་མེད་པ་ལ་ཆོས་བསྒྱུར་བ་དང་དེ་དག་གཏན་ལ་ཕབ་པའི་ཐབས་ག་ལ་ཡོད་ མཁས་པ་དེ་རྣམས་ཀྱི་དེ་སྔོན་བོད་ལ་ཡོད་པའི་ཡིག་རྙིང་གི་ལུགས་སུ་རྒྱ་ཆོས་ཅི་རིགས་སུ་བསྒྱུར་ནས་གཏན་ལ་ཕབ་པ་དང་དེ་རྗེས་ཐོན་མི་སམ་བྷོ་ཊའི་བོད་ཀྱི་ཡིག་རྙིང་གི་འབྲི་སྟངས་དང་དག་ཆ་ཚིག་འཕྲད་ཀྱི་འགྲོས་སོགས་རྒྱ་གར་གྱི་ཡིག་གེ་ལས་དཔེར་བྱས་ཏེ་འབྲི་སྟངས་བདེ་ཞིང་དབྱངས་གསལ་དང་ཚིག་འཕྲད་སོགས་ཉུང་ལ་བསྡུས་པ་བྱས་ཏེ་སུམ་བཅུ་པ་དང་རྟགས་ཀྱི་འཇུག་པ་སོགས་བརྡ་སྤྲོད་ཀྱི་གཞུང་བྱ་ར་ཎ་སྡེ་བརྒྱད་བཅས་རྩོམ་ནས་བོད་ཀྱི་ཡིག་རྙིང་དེ་ བརྡ་དག་གི་སྒྲིགས་འོག་ཏུ་བཅུག་པ་དེ་ལ་ཐོན་མིས་བོད་ཡིག་གསར་བརྩམས་མཛད་ཅེས་ གྲགས་སམ་སྙམ་དེ་སྔོན་བོད་ལ་ཡིག་གེ་གཏན་ནས་མེད་པ་ཡིན་ན་གོང་གི་ཡི་གེ་བསྒྱུར་ཞེས་པའི་ཚིག་སྒྲུབ་དེའི་བསྒྱུར་བྱ་ཅི་ཡང་མ་གྲུབ་པ་ནི་ཤེས་སླའོ། འདི་དག་དང་པོ་ཡི་གེ་རྩོམས་པ་དང་དེའི་རྗེས་སུ་བསྒྱུར་སྙམ་ན་དེབ་ཐེར་འབྲི་མཁན་གྱི་ ཁ་གསལ་དུ་གསུང་པ་ལ་ཡིད་རྟོན་བྱེད་དགོས་པ་ལས་དེབ་དམར་མཛད་པ་པོ་ཚིག་སྔོན་རྗེས་གྱི་འགྲོས་ཙམ་མི་ཤེས་པ་ཞིག་ག་ལ་ཡིན་སྙམ་མོ།

ཡང་རྒྱ་ཡི་ལོ་རྒྱུས་ཐང་ཧྲུ་བྱ་བ་ལས་བོད་ཀྱི་ལོ་རྒྱུས་བྱུང་བ་དགེ་འདུན་ཆོས་འཕེལ་གྱིས་བཏུས་པ་སྲོང་བཙན་གྱི་ལོ་རྒྱུས་ལས་ རྒྱལ་སྲིད་ཀྱི་ཡིག་མཁན་ཆེ་བ་ལ་ཡུ་ཡི་ཁན་པོ་ཅེ་ཧུ་ཡི་གེ་མཁན་པོ་ཆེན་པོ་ དེའི་གྲོགས་ལ་ཡུ་ཡི་ཁན་པོ་མིན་ལན་ཕྱུ་ཟེར་ ཡིག་མཁན་ཆུང་བ་ལ་  ཡུ་ཡི་མཁན་པོ་ཆུང་ཆུང་དུ་འབོད་ ཅེས་གསལ་བ་ལ་དགེ་འདུན་ཆོས་འཕེལ་མཆོག་གི་ཡིག་མཁན་རྣམས་ལོ་ཙྰ་བྱེད་མཁན་ལ་ཟེར་རམ་སྙམ་ཡང་ན་འདི་བོད་ཀྱི་སྲོལ་སྤྱིར་བཤད་པ་ཙམ་ཡིན་པས་དེ་དུས་བོད་ཡིག་ཡོད་པ་སོགས་མི་དགོས་སྙམ་ཞེས་གསུང་འདུག་ཀྱང་འདིས་སྐབས་དེ་དུས་བོད་ཀྱི་རྒྱལ་བློན་དང་སྒྲིག་གཞི་ཆབ་ཚང་གི་བཤད་པ་བྱུང་བའི་ཡི་གེ་མཁན་པོ་ནི་ཡི་གེ་ཡོད་ནས་ཡིག་མཁན་ཟེར་བ་ལས་མིང་གདགས་གཞི་ཡི་གེ་མེད་ན་ཡི་གེའི་མཁན་པོ་ཟེར་དགོས་དོན་མི་འདུག་སྙམ་འོན་ཀྱང་ཡི་གེ་དེ་དག་བཙན་པོ་རྒྱལ་བློན་དང་བོན་གཤེན་སོགས་བོན་སྒོང་ཞུགས་པས་གང་ཟག་དང་རིམ་པ་མཐོ་གྲས་ལས་བོད་མི་མང་ཆེ་བའི་ཁྲོད་དུ་ཡི་གེ་དེ་དར་ཁྱབ་ཆེན་པོ་མེད་དམ་ཡང་དེ་ལས་ ཡི་གེ་ནི་མེད་ཚོང་སོགས་ཀྱི་སྐབས་ ཤིང་བུ་ལ་རྟགས་འདེབས་པ་དང་ ཐག་པ་ལ་མདུད་པ་བོར་ཏེ་རྩིས་བྱེད་ ཅེས་པའང་འདུག་ཡང་དེ་ལས་ དེའི་འོག་ཏུ་གོང་མ་ལ་ཡི་གེ་འཁྱེར་བའི་ཕོ་ཉ་དང་གསེར་ཁྲབ་ཅིག་སྐྱེས་སུ་བསྐུར་ཏེ་གལ་ཏེ་སྲས་མོ་མ་བྱིན་ན་དམག་བྱེད་པ་ཡིན་ཟེར་བའང་འདུག་ལ་སྲོང་བཙན་གྱི་ཚེ་སྟོད་ནས་གསེར་དངུལ་ཟངས་སོགས་ཀྱི་ཡི་གེ་འབྲི་སྲོལ་ཡོད་པར་མཐོང་ཏེ་ལྡེའུ་ཆོས་འབྱུང་ལས་ རྒྱལ་པོ་དྲུག་བྱུང་སྲོང་བཙན་སྒམ་པོ་ཡིས། ཚེ་སྟོད་རྒྱལ་ཁྲིམས་ཚེ་སྨད་ཆོས་ཁྲིམས་བཅས། རྒྱལ་ཁྲིམས་ཚན་བཅུ་དང་ནི་སྡེ་བཅུ་དང་བཀྲ་དགུ་ཆེ་དགུ་ཁ་བརྒྱད་ལེ་བརྒྱད་དང་། ཆེ་བདུན་དཔོན་བདུན་ན་དྲུག་ནེ་དྲུག་དང་། བླ་ལྔ་ན་ལྔ་བཀའ་བཞི་རྩིས་བཞི་དང་། ཁམས་གསུམ་ཆོས་གསུམ་གཉིས་ཀར་བསྡུ་དང་གཅིག ཅེས་པ་ལས་ན་དྲུག་ནི་ཡི་གེ་ཆེ་བ་དྲུག་སྟེ། གཡུའི་ཡི་གེ་ཆེ་ཆུང་གཉིས། གསེར་ཡིག་ཆེ་ཆུང་གཉིས། འཕྲ་མེན་གྱི་ཡི་གེ་ཆེ་ཆུང་གཉིས་སོ། ནེ་དྲུག་ཡི་གེ་ཆུང་བ་དྲུག་སྟེ། དངུལ་གྱི་ཡི་གེ་དང་།  ར་གན་གྱི་ཡི་གེ་དང་། འཁར་བའི་ཡི་གེ་དང་། ཟངས་ཀྱི་ཡི་གེ་དང་།  དཔལ་ལྕགས་ཀྱི་ཡི་གེ་དང་། ཤིང་སྐྱ་ཆུ་རིས་ཡི་གེ་དང་དྲུག་གོ དགུང་བློན་ཆེ་དགུ་ལ་གཡུ་གསེར་སོགས་ཀྱི་ཡིག་ཚང་ངམ་ཡི་གེ་ཡོད་པར་འདུག་སྟེ། ཡང་དེ་ལས་ དགུང་བློན་ཆེན་པོ་ནི་འགྲན་གྱི་ཟླ་མེད་པ་སྟེ། བསད་ན་སྟོང་ཐང་ཁྲི་ཆིག་སྟོང་ཡོད་དེ་ཆེའོ། ཡིག་ཚང་གཡུའི་ཡི་གེ་ཆེན་པོའོ། དགུང་བློན་འབྲིང་པོ་ནང་བློན་ཆེན་པོ་གཉིས་ནི་སྟོང་ཐང་མཉམ་སྟེ་ཁྲི་ཡོད། ཡིག་ཚང་གཡུའི་ཡི་གེ་ཆུང་བའོ། དགུང་བློན་ཆུང་བ། ནང་བློན་འབྲིང་པོ། བཀའ་ཡོ་འགལ་འཆོས་པ་གསུམ་ནི་སྟོང་ཐང་དགུ་སྟོང་ཡོད་པའོ། ཡིག་ཚང་གསེར་གྱི་ཡི་གེ་ཆེན་པོའོ།ཡང་ཡི་གེ་ཆེ་བ་དྲུག་ལ་སྐུ་ཡི་སྔགས་མཁན་ལ་གཅིག་བཀའ་ཡོ་འགལ་འཆོས་པ་དང་གཉིས། གནས་བརྟན་ཆེན་པོ་ལ་གཅིག་དང་གསུམ། ཆོས་གྲའི་སློབ་དཔོན་ལ་གཅིག་དང་བཞི། སྟོད་སྨད་གཉིས་དབང་བློན་ལ་གཅིག་སྟེ་ལྔ། དབུས་ཀྱི་གུང་བློན་ལ་གཅིག་སྟེ་དྲུག་གོ། ཡི་གེ་འབྲིང་པོ་དྲུག་ལ་སྐུ་འཚོ་བའི་བོན་པོ་ལ་གཅིག སོགས་ཡོད་པར་བཤད་ལ་ཡང་ཁོད་དྲུག་ནི་ དེ་ལས་བོད་ཀྱི་ཁོད་ཤོམ་མ་རར་བྱས་ཁོད་ཤོམ་མཁན་མགར་སྟོང་བཙན་གྱིས་བྱས་ཏེ་ཤིང་བུ་དང་རྡེའུ་ཡན་ཆད་བརྩིས་ནས་ཤོག་བུ་མཛོ་ཁལ་ལོངས་པ་བྲིས་པས་ཁྲིམས་བྱང་མ་ཐེབས་པར་འཁྲུགས་ཏེ་ད་བོད་ཀྱི་ཁོད་སུས་ཤོམ་མམ་སྙམ་ནས་བསམས་པས། ད་རྒྱལ་བྱིས་པ་གཅིག་འཕྲུལ་ཆེ་བར་ཐོས་ནས་བློན་པོ་བཞིས་འཚོལ་དུ་ཕྱིན་པས་བྱིས་པ་དང་འཕྲད་ནས་དྲིས་པ། ན་འདིའི་མཐའ་བསྐོར་རམ་གཞུང་གཅོད་བྱས་པས། བྱིས་པ་དེ་ན་རེ་ རིངས་ན་མཐའ་བསྐོར། མི་རིངས་ན་གཞུང་ཆོད་ཟེར་བས། བྱིས་པ་མིན་ལོག་ཏུ་མཐོང་ནས་གཞུང་བཅད་པས་འདམ་དུ་བྱིང་ངོ་་། དེ་ནས་ཕ་མ་གར་སོང་དྲིས་པས་ཕ་གཏམ་འཚོལ་དུ་སོང་། མ་མིག་འཚོལ་དུ་སོང་ཟེར་བ་ལ་  ཕས་ཆང་ཁྱེར་བྱུང་། མས་མར་ནག་ཁྱེར་བྱུང་དེ་ནས་བློན་པོ་དགའ་ནས། བོད་ཀྱི་ཤོམ་དུ་བཅུག་པས་མ་ཤོམ་ཞེས་འབྱུང་བས་དེ་ལ་དཔྱད་ན་ཤོག་བུ་མཛོ་ཁལ་ལོངས་པ་ལ་བྲིས་ཟེར་བ་བོད་ལ་ཡི་གེ་ཡོད་པ་གསལ་བཤད་བྱས་དེ་དུས་ཐོན་མིས་ཡི་གེ་རྩོམ་ཟིན་སྙམ་ནསྐབས་དེར་ཐོན་མི་སམ་བྷོ་ཊ་ནི་བྱིས་པ་ཡིན་པའི་ཚུལ་ཐོན་མི་སམ་བྷོ་ཊའི་རྣམ་ཐར་ལས་གོང་གི་བྱིས་པ་དེ་ཐོན་མི་སམ་བྷོ་ཊ་ཡིན་ཚུལ་གསལ་དེ་ནས་ཆོས་ཁྲིམས་བཅས་ལུགས་བསྟན་པ་ནི་དེ་ལས་རྒྱ་བོད་བལ་པོ་ཞང་ཞུང་བཞི་དང་གཉེན། ཆོས་ཁྲིམས་སྲོལ་གཏོད་འཁྲུལ་ལ་སོགས་བཞེང་སྟེ། བརྒྱ་རྩ་བརྒྱད་འདེབས་དམ་བཅས་ཉིད་ཀྱིས་ཞེ་གཉིས་བཞེངས། ཞེས་དང་ཡང་དེ་ལས་རྒྱའི་མཁས་པ་ལི་བྱིན་ལ་བོད་ཀྱི་ཐོན་མི་འབྲིང་སྟོ་རེ་ཨ་ནུས་ཡི་གེ་བསླབ་ཞེས་གསལ་ལ་བོད་རྒྱལ་སྲོང་བཙན་གྱིས་དང་པོ་ཁོད་སོགས་བཤམས་དེ་ནས་རྒྱ་བལ་གྱི་བུ་མོ་བཙུན་མོར་བཞེས་དེ་ནས་ལྷ་ཁང་བཞེངས་དེ་ནས་ཐོན་མིས་བོད་ཡིག་བསྒྱུར་བཅོས་བྱས་པས་ཚུལ་ནི་རྦ་བཞེད་ལས། དེ་ནས་འཕྲུལ་གྱི་རྒྱལ་པོ་སྲོང་བཙན་སྒམ་པོའི་རིང་ལ་བོད་དང་ཞང་ཞུང་དང་། སུམ་པ་ལ་སོགས་པའི་ཁོས་ཆེན་པོ་བཤམས་མགར་སྟོང་བཙན་ཡུལ་གཟུངས་ལ་སོགས་པ་ཁད་དཔོན་དུ་བསྐོས། ཁྲི་བཙུན་དང་ཨོང་ཅོང་ཁབ་ཏུ་བཞེས་ ཐུབ་པའི་སྐུ་གཉིས་དང་བྱམས་པ་ཆོས་འཁོར་ལོ་དང་། བཙན་དན་གི་ཇོ་མོ་སྒྲོལ་མ་སྤྱན་དྲངས་རུ་བཞི་གཙུག་ལག་ཁང་བཞི་བཞེངས། པན་ཊི་ཏ་ཁ་ཆེ་ཨ་མོ་ཀ་དང་ཁ་ཆེ་ཨ་ནན་ཏ་ལས་སོགས་པ་སྤྱན་དྲངས་ལོ་ཚ་བ་ཐོན་མི་སམ་བྷོ་ཊས་ཡི་གེ་སུམ་བཅུ་བྱས་ཏེ་མདོ་དཀོོག་སྤྲིན་ལསོགས་པ་བསྒྱུར། ཁྲི་ཙེ་འབུམ་བཞེར་དང་འབུམ་གསེར་ཤ་བ་ཅན་དང་དགེ་བ་བཅུ་ལས་བརྩམས་ནས་ཁྲིམས་ཡིག་ཆེན་པོ་མཛད་དོ། ཞེས་སོགས་དཔྱད་པས་སྒོ་ཙམ་མོ་སྤྱི་ལོ་༢༠༡༢ལོའི་ཟླ་༧་པའི་ཚེས་༡༨ཉིན།།

ཉུངས་དཀར་པས་བྲིས།། །།