གཅེས་པའི་གཡར་ཕུང་།

༧སྲིད་འདིར་རྙེད་རྒྱུ་ཡོད་པའི་རིན་པོ་ཆེ། ཧ་ཅང་རྙེད་པ་དཀའ་བའི་རིན་པོ་ཆེ། རྙེད་ན་དོན་ཡོད་གོ་ཆོད་རིན་པོ་ཆེ། མི་ལུས་རིན་ཆེན་རིན་ཐང་བསམ་མི་ཁྱབ། ཅེས་སྐབས་འདིར་གླེང་བར་བྱ་བ་ལ། མ་རྒྱུད་སྒོམ་འགྲེལ་ལས། ཕྱི་ལུས་ཀྱི་སྲིད་པ་ལྟེ་བ་ནས་ཚུར་ཆགས་ཞེས་པ་དང་། ནང་སེམས་ཀྱི་སྲིད་པ་སྙིང་ནས་ཕར་ཆགས་ཞེས་གསུང་པ་ལ་གཞིག་སྟེ་གཡར་ཕུང་ཆགས་ལུགས་གྲུབ་ཚུལ་ཅུང་ཙམ་འཆད་པ་ལ།  ༡གང་གཡར་བ་དང་། ༢གང་གིས་གཡར། ༣གང་ལས་གཡར། ༤ཇི་ལྟར་གཡར། ༥གཡར་པོ་ཆགས་ལུགས་སོ།  དང་པོ་ནི་འབྱུང་བ་ལྔའོ། །གཉིས་པ་ནི་མ་རིག་པ། གསུམ་པ་ནི་ཡེ་ཤེས་ལྔའམ་འབྱུང་བ་བཞིའོ། བཞི་པ་ནི་བར་དོ་གཉིས་པའི་སྒྲ་འོད་ཟེར་གསུམ་གྱི་སྣང་བ་ངོ་མ་ཤེས་པའི་སྐབས་དེར་རང་རིག་པའི་ཡེ་ཤེས་ཀྱི་རྩལ་ལམ་སྟོང་ཉིད་ཡེ་ཤེས་ཀྱི་རང་མདངས་དཀར་པོ། མཉམ་ཉིད་ཡེ་ཤེས་ཀྱི་རང་མདངས་ལྗང་ཁུ། སོར་རྟོགས་ཡེ་ཤེས་ཀྱི་རང་མདངས་དམར་པོ། མེ་ལོང་ཡེ་ཤེས་ཀྱི་རང་མདངས་སྔོན་པོ། བྱ་གྲུབ་ཡེ་ཤེས་ཀྱི་རང་མདངས་སེར་པོ་བཅས་འོད་ལྔ་ཤར་བ་ལ་གང་གི་མ་རིག་པ་དེས་བཙན་ཤེད་ཀྱིས། སེར་པོ་ལ་ས་དང་། སྔོན་པོར་ཆུ་དམར་པོ་ལ་མེ་སོགས་གཡར་བས། དེའི་འབྲས་བུ་ས་ལས་ཤ་དང་། ཆུ་ལས་ཁྲག མེ་ལས་དྲོད། རླུང་ལས་དབུགས། ནམ་མཁའ་ལས་སེམས་བཅས་མི་གཙང་བའི་ཕུང་པོ། སྡུག་བསྔལ་གྱི་རྟེན་གཞི། འཁོར་བའི་གདོས་ཐག་ངོ་མ་ཞིག་ཁད་ཀྱིས་ཆགས་ཡོང་བ་རེད། ལྔ་པ་གཡར་པོ་ཆགས་ལུགས་ལ་ལྔ། དང་པོ་སྲོག་རྩ་ཆགས་ནས་དེར་སྙིང་རྩ་འདུས་པ་ཡིན་ཏེ། མ་རྒྱུད་འགྲེལ་ལས། དེ་ཡང་སྲོག་རྩ་གུར་གྱི་ཚུགས་ཤིང་དབུ་མའི་ཚུལ་ལ། ཙི་ཏ་ཆོན་ཆེན་གྱི་ཐག་མདུད་བཏབ་པ་བཞིན་དུ་ཡོ་ཀ་འདུས་སོ་ཞེས་གསུངས་སོ། །རྩ་དེའི་ནང་དུ་རླུང་སེམས་རྒྱུ་བས་ས་ཆུ་མེ་རླུང་བཞི་དང་མཐུན་པའི་རྩ་ལྔ་གྱེས། དེ་ཡང་ཕྱོགས་བཞི་ནས་རྩ་བཞི་དང་དབུས་ནས་གཅིག་བཅས་ལྔ་གྱེས། དེའི་རྩ་རེ་རེའི་སྣེ་མོར་ཆོན་ཕུར་བཞིན་དོན་སྙིང་ལྔ་ཐོགས། དོན་སྙིང་ལྔ་ནི་༡སྙིང་། ༢གློ་བ། ༣མཆིན་པ། ༤མཁལ་མ། ༥མཚེར་པའོ།  །དབུས་སྙིང་རྩ་ལས་གྱེན་དུ་ནམ་མཁའི་རླུང་གཡོས་པས། པུ་ཙམ^{པུ་ཙམ་ཞེས་པ་ཞང་སྐད་དུ་སྤྱི་བོ་ལ་གོ་ཟེར།}་གནམ་འཐེན་གྱི་རྩ་གྱེས། ཡན་ལག་གི་གཙོ་བོ་མགོ་དོད། དེ་ལ་གོ་འབྱེད་གསལ་བའི་ཡན་ལག་ཅེས་བྱ། གཉིས་པ་གློ་བ་ལ་རླུང་གི་རླུང་གཡོས། གཡས་ལུང་^{ཞང་སྐད་དུ་ལུང་ནི་གློ་བ་དང་སེག་ནི་དབུགས་ལ་བཤད་དོ།}སེག་གི་རྩ་གྱེས། འགྲོ་བྱེད་རྐང་པ་གཡས་དོད། གསུམ་པ་མཆིན་པ་ལ་མེའི་རླུང་གཡོས། གཡས་ཚངས་སྟང་^{ཞང་སྐད་དུ་ཚངས་སྟང་ཅེས་མེ་ལ་གོ་འདུག}གི་རྩ་གྱེས། ལག་གཡས་པ་དོད། དེའི་གཡས་པ་གཉིས་དྭངས་མའི་འབྱུང་བ་མེ་རླུང་ལས་གྲུབ་པས་སྟོབས་ཆེ་ཞེས་མ་རྒྱུད་འགྲེལ་ལས་གསུངས། བཞི་པ་མཁལ་མ་ལས་ཆུ་ཡི་རླུང་གཡོས། ཏིང་ནམ་^{ཞང་སྐད་དུ་ཏིང་ནམ་ཞེས་པ་ཆུ་ལ་གོ་འདུག}གྱི་རྩ་གྱེས། འགྲོ་བྱེད་རྐང་པ་གཡོན་དོད། ལྔ་པ་མཚེར་པ་ལ་སའི་རླུང་གཡོས། སླན་ཆེན་གྱི་རྩ་གྱེས། ལག་པ་གཡོན་དོད། དེ་ཉིད་ལས། གཡོན་པ་གཉིས་སྙིགས་མའི་འབྱུང་བ་ས་ཆུ་གཉིས་ལས་གྲུབ་པས་སྟོབས་ཆུང་ཞེས་སོ། གོང་གི་མགོ་དོད་བྱེད་ནམ་མཁའི་རླུང་ལས་མཁའ་རླུང་གི་མེ་རླུང་། མཁའ་རླུང་གི་ཆུ་རླུང་། མཁའ་རླུང་གི་ས་རླུང་། མཁའ་རླུང་གི་རླུང་རླུང་། མཁའ་རླུང་གི་མཁའ་རླུང་སོགས་ལྔ་ལས་དབང་རྟེན་ལྔ་ཆགས་སོ། །དེ་ནས་སྙིང་ཁར་ནམ་མཁའི་རླུང་དྭངས་མ་ཤར། དྭངས་མའི་རྩ་སྦུབས་ཕྱེས། མིག་རྩའི་དབང་པོ་དོད། དཔེར་ན་ཟར་མའི་མེ་ཏོག་འདྲ་བ་ཆགས། དབང་པོའི་སྒོའམ་གྱེས་སའི་འབྱུང་བ་གཙོ་བོ་ནམ་མཁའ་ཡིན་པ་ལ་དབང་པོའི་སྒོ་ནམ་མཁའ་ལ་དོད་ཟེར། ཡུལ་དུ་ཚུར་གཟུགས་གསལ་བར་འཆར། རྟགས་མིག་གིས་བཟང་ངན་གང་ལ་བརྟག་ན་སྟོང་ཉིད་སྐྱེ། མུན་མེད་ས་ལེ་སྒྲོན་མ་ཡོད། གློ་བ་ནས་རླུང་གི་རླུང་དྭངས་མ་ཤར། ལི་མུན་གྱི་རྩ་སྦུབས་ཕྱེས། སྣའི་དབང་པོ་དོད། དཔེར་ན་ཟངས་ཀྱི་མོ་ཁབ་ལྟ་བུ་ཆགས། དབང་པོའི་སྒོ་རླུང་ལ་དོད། ཡུལ་དུ་དྲི་གསལ་བར་ཚོར། རྟགས་སྣ་ནས་དབུགས་ཕར་རྒྱུ། དྲི་ཞིམ་གཡུ་བུན་ཡོད། དེ་ནས་མཆིན་པ་ལ་མེའི་རླུང་དྭངས་མ་ཤར། ཚངས་སྟང་གི་རྩ་སྦུབས་ཕྱེས། ལྕེའི་དབང་པོ་དོད། དཔེར་ན་བྱ་ཕོའི་ཟེ་བ་འདྲ་བའམ་ཚེས་བརྒྱད་ཀྱི་ཟླ་བ་ལྟ་བུ་ཆགས། དབང་པོའི་སྒོ་མེ་ལ་དོད། ཡུལ་དུ་རོ་གསལ་བར་མྱོང་། རྟགས་ཁ་ནས་དྲོད་ཕྱུར། ཀུན་གྲགས་བདུད་རྩི་གྲོལ་བ་ཡོད། དེ་ནས་མཁལ་མ་ལས་ཆུའི་རླུང་གི་དྭངས་མ་ཤར། ཏིང་ནམ་གྱི་རྩ་སྦུབས་ཕྱེས། རྣ་བའི་དབང་པོ་གཟུགས་ཅན་པ་དོད། དཔེར་ན་ཟངས་གཟེར་དྲིལ་བའམ་དུང་འཁྱིལ་བ་ལྟ་བུ་ཆགས། དབང་པོའི་ཆུ་ལ་དོད། ཡུལ་དུ་སྒྲ་གསལ་བར་གོ །རྟགས་སུ་ཆུའི་ཟིལ་པ་འདྲ་མོ་རྣ་སྤབ་འབྱང་། འཕྲུལ་གྱི་སྒྲ་འཛིན་རྒྱལ་པོ་ཡོད། དེ་ནས་མཚེར་པ་ལས་སའི་རླུང་གི་དྭངས་མ་ཤར། སྐྱེས་སླས་ཀྱི་རྩ་སྦུབས་ཀྱི་ཕྱེས། ལུས་ཀྱི་དབང་པོ་དོད། དཔེར་ན་བྱ་སྤུ་འཇམ་ལྟ་བུའམ་རྒྱལ་མཚན་གྱི་འཕན་ཤམ་འདྲ་བ་ཆགས། དབང་པོའི་སྒོ་ས་ལ་དོད། ཡུལ་དུ་རེག་བྱ་ཚོར། རྟགས་མཆུ་དང་བ་སྤུའི་རྒྱ་ལོག་ན་འཆི། སའི་དྭངས་མ་འོད་སེར་པོ་བྱིན་ཆེན་རེག་ཚོར་ཡོད། ཡང་དོན་སྙིང་ལྔ་ལས་འབྱུང་བའི་སྙིགས་མ་རླུང་ལྔ་ཤརབ་ཡིན་ཏེ། སྙིང་ལས་ནམ་མཁའི་རླུང་སྙིགས་མའི་རྩ་སྦུབས་ཐུར་དུ་ཕྱེས། དེ་ལས་ནམ་མཁའི་སྣོད་བསམ་སེའུ་ཆགས། དེའི་ནང་ནས་སེམས་ཀྱི་བཅུད་བྱང་སེམས་ཐིག་ལེ་རྒྱུ། རྟགས་ཉོན་མོངས་གཡོ་བས་ཐིག་ལེ་འཆོར། གློ་བ་ལས་རླུང་གི་སྙིགས་མའི་རྩ་སྦུབས་ཐུར་དུ་ཕྱེས། རླུང་གི་སྣོད་དུ་རྒྱུ་ལོང་ཆགས་སོ། །དེའི་ནང་དབུགས་ཀྱི་བཅུད་དྲི་ཆེན་རྒྱུ། རྟགས་རླུང་གི་རྒྱུ་ལྡོག་གིས་གཤང་ལྕི་འབྱིན། མཆིན་པ་ལས་མེའི་རླུང་གི་སྙིགས་མའི་རྩ་སྦུབས་ཐུར་དུ་ཕྱེས། མེ་ཡི་སྣོད་མཁྲིས་པ་ཆགས། དེའི་ནང་དྲོད་ཀྱི་བཅུད་རག་ཏ་རྒྱུ། རྟགས་དྲོད་འཕར་ལྡང་དབང་གིས་ཟླ་མཚན་ཡང་འབྱིན་ནོ། །མཁལ་མ་ལས་ཆུའི་རླུང་གི་སྙིགས་མའི་རྩ་སྦུབས་ཐུར་དུ་ཕྱེས། ཆུའི་སྣོད་ལྒང་བ་ཆགས། དེའི་ནང་རླན་གྱི་བཅུད་དྲི་ཆུ་རྒྱུ། རྟགས་ཆུའི་འཕར་ལྡང་གིས་དྲི་ཆུ་འབྱིན་ནོ། །མཚེར་པ་ལས་སའི་རླུང་གི་སྙིགས་མའི་རྩ་སྦུབས་ཐུར་དུ་ཕྱེས། སའི་སྣོད་ཕོ་བ་ཆགས། དེའི་ནང་ཟས་ཀྱི་བཅུད་ཤ་ཆེན་རྒྱུ། རྟགས་ཟས་ཀྱི་འཕེལ་འགྱུར་གྱིས་ཤ་ཆེན་བསྐྱེད་ཅེས་གསུངས། དེ་ཡང་མདོར་བསྡུས་ན། སྙིང་ནས་ཐུར་དུ་བསམ་སེའུ་ཆགས། གློ་བ་ལས་ཐུར་དུ་རྒྱུ་ལོང་ཆགས། མཆིན་པ་ལས་ཐུར་དུ་མཁྲིས་པ་ཆགས། མཁལ་མ་ལས་ཐུར་དུ་ལྒང་པ་ཆགས། མཚེར་པ་ལས་ཐུར་དུ་ཕོ་བ་ཆགས་སོ། །བསམ་སེའུ་ནང་དུ་ཐིག་ལེ་རྒྱུ། རྒྱུ་ལོང་ནང་དུ་དྲི་ཆེན་རྒྱུ། མཁྲིས་པའི་ནང་དུ་རག་ཏ་རྒྱུ། ལྒང་པའི་ནང་དུ་དྲི་ཆུ་རྒྱུ། ཕོ་བའི་ནང་དུ་ཤ་ཆེན་རྒྱུའོ། །ཡང་སྨན་གཞུང་ནང་དུ་དོན་ལྔ་སྣོད་དྲུག་ཅེས་དོན་ལྔ་ནི། སྙིང་། གློ་བ། མཆིན་པ། མཁལ་མ། མཚེར་པ་བཅས་ལ་ཟེར། སྣོད་དྲུག་ནི། མཁྲིས་པ། ལྒང་པ། རྒྱུ་ལོང་། མཁྲིས་པ། བསམ་སེའུ། ལོང་ག་སོགས་ལ་གོ། མ་རྒྱུད་སངས་རྒྱས་རྒྱུད་གསུམ་གྱི་འགྲེལ་བ་ལྟར་ན་གོང་གི་༼ལོང་ག་༽ཞེས་པ་འདི་དངོས་སུ་བསྟན་མེད་ཀྱང་ཤུགས་ལ་ཕོ་བ་ཞེས་པ་དེར་འདུ་དགོས་སམ་སྙམ། དེ་མིན་ན་དྲུག་གི་རྣམ་བཞག་བཤད་པ་གཙིགས་ཆུང་ངོ་།།