བོན་བརྒྱ་བ།
བོན༵་སྡེ་ཟབ་མོ་འགྲོ་ལ་སྦྱིན་བརྒྱ༵་བ༵།།
བརྒྱ་པའི་མགོན་མཆོག་ཀུན་ལས་རྣམ་རྒྱལ་གྱི།།
གསང་གསུམ་རྒྱུ་འཕྲུལ་སྡེ་བཅུ་གཙང་མའི་བོན།།
ཇི་བཞིན་འདོམས་མཛད་དཔལ་ལྡན་བླ་མར་འདུད།།
འཆད་པ་གཞུང་ལུགས་རྒྱ་མཚོ་དབྱངས་སུ་ལེན།།
རྩོད་པས་རྒོལ་ངན་བྱེ་བའི་སྤོབས་པ་ཆོམས།།
རྩོམ་པ་སྙན་ཞིང་འཇེབས་པའི་རོལ་མཚོ་ཅན།།
མཁས་པའི་བྱ་བ་ཀུན་ཁྱབ་བོན་བརྒྱ་བ།།
ཐོས་བསམ་རྒྱ་མཚོའི་འཇིངས་ལས་ཉེར་འོང་པའི།།
གཞུང་ལུགས་རྒྱ་མཚོར་གཟིགས་པའི་སྤྱན་དཀྱུས་ཅན།།
རྒྱུད་སྡེ་རྒྱ་མཚོའི་དགོངས་པ་དཔྱིས་ཕྱིན་ཞིང་།།
མཁས་དབང་རྒྱ་མཚོའི་སྤྱི་དཔལ་བོན་བརྒྱ་བ།།
དངོས་ཀུན་སྣང་བ་དག་པ་རབ་འབྱམས་གཞིར།།
སྣང་སྲིད་ཞིང་ཁམས་ལྷ་སྐུའི་འཁོར་ལོར་བཞེངས།།
གཡོ་མེད་ཏིང་འཛིན་སྐུ་གསུམ་རབ་འབྱམས་པའི།།
གསང་ཆེན་བསྐྱེད་པའི་མངའ་བདག་བོན་བརྒྱ་བ།།
རླུང་སེམས་དབུ་མར་བརྩེན་པའི་སྒྱུ་འཕྲུལ་གྱིས།།
ཧུཾ་ཡིག་ཞུན་མ་འབབ་པའི་རྩེད་དགའ་ལས།།
སྙོམས་འཇུག་བདེ་བ་ཆེན་པོའི་ཡེ་ཤེས་སྐུ།།
རིམ་གཉིས་རྫོགས་པའི་མངའ་བདག་བོན་བརྒྱ་བ།།
ཟུང་འཇུག་ཕྱག་བརྒྱ་ཆེན་པོའི་དཀྱིལ་འཁོར་ན།།
གསང་ཆེན་རིག་པ་འཛིན་པའི་སྒྱུ་མའི་སྐུ།།
ཡེ་ཤེས་ཐིག་ལེར་བརྩེན་པའི་བཟློས་གར་གྱིས།།
གདོས་ལུས་འོད་སྐུར་བཞེངས་པའི་བོན་བརྒྱ་བ།།
རྒྱལ་ཀུན་མཁྱེན་བརྩེའི་འཇུག་པ་གཅིག་བསྡུས་ཏེ།།
ཐེག་དགུའི་ཡང་རྩེའི་ལྟ་བ་དཔྱིས་ཕྱིན་པ།།
སྨིན་གྲོལ་གདུལ་བྱའི་ཉིན་མོར་བྱེད་པའི་དཔལ།།
གསང་ཆེན་རིག་པ་འཛིན་པའི་བོན་བརྒྱ་བ།།
མཁྱེན་ཡོན་པད་མའི་འདབ་ཕྲེང་གྲོལ་བ་ཡིས།།
མཁས་ཀུན་བུང་བའི་ཡིད་བརྟན་གཅིག་ཏུ་བསྡུས།།
རྒྱལ་བའི་རྗེས་བརྩེའི་སྤྱན་གྱིས་ཟིན་པ་ལ།།
ལེགས་བཤད་ལུང་གིས་བསྔགས་པའི་བོནབརྒྱ་བ།།
རབ་མང་སྐྱེ་འཕྲེང་གསེར་རི་བསྟར་བ་ལས།།
མཁས་དང་གྲུབ་པའི་རོལ་མཚོ་འཁྱིལ་བ་ཡིས།།
སྐལ་བཟང་འགྲོ་ལ་བདུད་རྩི་སྣང་བའི་མཛོད།།
འཛད་མེད་དཔྱིད་དུ་འཇོ་བའི་བོན་བརྒྱ་བ།།
དེ་སྟེའི་གསང་གསུམ་ལྷ་ཡི་རྫིང་བུ་ལས།།
འོང་པའི་མཆོད་ཡོན་སྦྲང་རྩིའི་དོག་པ་ཅན།།
གསུང་སྐྱེས་སྦྲང་མ་བརྩེན་པའི་བཟློས་གར་དུ།།
མཛད་འཕྲིན་ཡིད་འོང་ཚལ་ནས་དཔྱིད་དུ་བསྐྲུན།།
ཀོ་རྒྱལ་བཤད་གྲྭར་བྲིས། ༢༠༡༡*༨*༢༨ལའོ།།
- ཟིན་ཐོ་གོང་མ།སྟོན་པ་གཤེན་རབ་བོད་ཡུལ་དུ་བྱོན་ཚུལ།།
- ཟིན་ཐོ་འོག་མ།མེ་ཏོག་མཆོད་པ།