རྒྱ་བོད་ལ་སོགས་འཛམ་གླིང་རྒྱུ་ནོར་ཀུན།།

མཚོ་ལྟར་འཁྱིལ་ཡང་སྙིང་པོ་མ་གཟིགས་ནས།།

ནོར་གྱི་དམ་པ་འཕག་པའི་ནོར་བདུན་འཛིན།།

བུ་ཡི་རྩེ་མོ་བླ་མར་མགོས་ཕྱག་འཚལ།།

 

ཚུལ་དང་མི་མཐུན་ང་འདྲའི་སློབ་མ་ལ།།

ཁྲིམས་ལྟར་ཕྱག་ལེན་སྙོམས་པར་གནང་ན་འང་།

འབྱུང་འགྱུར་བུ་རྣམས་བརྩེ་བས་བསྐྱོངས་མཁས་པ།།

གནས་ལྔ་རིག་པའི་སློབ་དཔོན་དྲན་ནས་གདུང་།།

 

བློ་ཡི་སྒོ་མོ་གནམ་ལྕགས་ཐ་རམ་འབུམ།།

གྲོལ་ཙམ་མ་གྱུར་བདག་སོགས་སློབ་མ་རྣམས།།

རབ་དཀར་དྲི་མ་མེད་པའི་ལྡེ་མིག་གིས།།

གསལ་མོ་ཧལ་གྱིས་ཕྱེས་པའི་དྲིན་དེ་དྲན།།

 

དྲང་པོ་རྟགས་དང་རྒྱུ་མཚན་སྣ་ཚོགས་ཀྱིས།།

སྲོང་བའི་རིགས་པ་ཚད་མའི་ལམ་འཁྲིད་མཁན།།

རྒྱལ་བས་སློབ་པ་ཇི་བཞིན་བཀའ་དྲིན་ཅན།།

མཚན་མོའི་དཔོན་པོ་རི་བོང་འཛིན་པ་དྲན།།

 

ཁྱད་པར་ཤེས་བྱའི་གནས་ལ་ལྷག་མེད་དུ།།

རབ་ཏུ་སྒྲོ་འདོགས་གཅོད་ལ་བརྩོན་འགྲུས་ཅན།།

འཁྲུལ་ཚབ་ཆེ་བ་ང་དང་ང་འདྲ་ལ།།

མེད་ཐབས་མེད་པའི་གྲོགས་དེ་ཆེས་ཅིག་དྲན།།

 

བསྟན་པའི་ས་བོན་མ་འོངས་སློབ་མ་ལ།།

པ་སངས་ལྟ་བུ་ལྷག་བསམ་དྲི་མེད་ངོར།།

བཀྲ་བའི་རྣམ་དཔྱོད་ཡོངས་པའི་ལེགས་ཚོགས་ཀྱིས།།

ཤིས་པ་ཡང་ཡང་བསྩོལ་བའི་དྲིན་དེ་དྲན།།

 

སློབ་གླིང་ར་བ་པད་དཀར་གཞོན་ནུའི་ཚལ།།

ལྔ་རིག་ཟིལ་མངར་རྩི་གྱིས་ཁུར་དུད་པར།།

ལྐལ་ལྡན་བུང་བའི་མགྲིན་ཆུ་ཆེས་ལྡང་བས།།

སྙན་པའི་བསྟོད་ཚིག་འུར་འུར་བསྒྲོགས་ལ་བྲེལ།།

 

གཏུ་མུག་དྲི་མ་ཚ་དུག་གིས་གདུང་བའི།།

རྨོངས་པའི་མྱལ་ངམ་ཐང་དཀྱིལ་བདག་སོགས་འགྲོར།།

ཐབས་ཤེས་ཆུ་འཛིན་འཁྲིགས་པའི་ལྷ་ལམ་ནས།།

ཐུགས་རྗེའི་གྲིབ་བསིལ་སྙོམས་པའི་སློབ་གླིང་དེར།།

 

ཞལ་གཅིག་འཛུམ་དཀར་འབུམ་གྱིས་རབ་ཕྱུག་ལ།།

ཕྱག་གཉིས་མཉམ་པར་བཞག་པའི་ཞི་བའི་ལྷ།།

སྐུ་གསུམ་གདོད་མའི་ཞིང་ནས་མངའ་མཉེས་པའི།།

མཐའ་བཞི་བྲལ་བ་དེས་ཀྱང་བསྔགས་དབྱངས་འཐེན།།

 

འདོད་དགུའི་དཔལ་གྱིས་ཕྱུག་པའི་བསྟན་རྒྱས་གླིང་།

གླིང་བཞི་འཛིན་མའི་ཁྱིམ་ནས་འཕགས་པའི་སྒྲ།།

སྒྲ་འཛིན་རྣ་བར་འབྱོར་བའི་ལྐལ་བཟང་ལ།།

ལྭ་བ་དམར་སེར་ཅན་རྣམས་དགའ་བས་མྱོས།།

 

རྒྱ་མཚོའི་ནོར་བུ་འོད་ཟེར་བརྒྱ་པའི་མདང།།

སྐལ་ལྡན་པད་མའི་ཚལ་དུ་ཤར་བ་ལ།།

ཕྲག་དོག་ཀུ་ད་ཁྱུ་གཅིག་མ་དགའ་ནས།།

མོས་པའི་ཞལ་ཁ་ཟུམ་པའི་ཚུལ་ཡང་མཐོང་།།

 

ཞེས་ཁྱུང་པོ་སྟེང་ཆེན་དགོན་གྱི་སློབ་གླིང་དང་ཁ་བྲལ་ནས་ཟླ་ཁ་ཤས་སོང་རྗེས་སློབ་གླིང་དེའི་བཀའ་དྲིན་དང་

གྲོགས་རྣམས་ཀྱི་འཛུམ་ཞལ་ཡིད་ལ་དྲན་སྐབས་དྲན་རྟེན་གྱི་ཚུལ་དུ་གཡུང་དྲུང་རྣམ་རྒྱལ་གྱིས་ཚབ་ཚུབ་ངང་

བྲིས།།