ང་ཡིས་རླངས་འཁོར་གཏོང་པའི་སྐྱིད་སྡུག་འདྲེས་མ།

སྣང་བ་རབ་རིབ་འདི་ལ་བདེན་ཁ་གཡར་ཏེ།།

བགྲང་བྱ་གཉིས་ལ་དངུལ་ལོ་བསོག་བསོག་བྱས་ནས།།

གསུམ་ཐིག་མིང་གི་རླངས་འཁོར་ཆུང་ཆུང་ཞིག་ལ།།

ནང་མ་གཅིག་ལ་བརྗེ་ལེན་ཐད་ཀར་བྱས་ཡིན། །

ཐོག་མར་གྲོགས་མཆོག་མཉམ་འཛོམས་དུས་ཚིགས་ཞིག་ལ། །

སྦྲ་ནག་སྟོང་གིས་བརྒྱན་པའི་ཁྱུང་གཉིས་ལ་ལ། །

སྣང་བ་རང་སར་མ་བཞག་བར་སྣང་སྤུར་ནས། །

དགའ་སྐྱིད་གླུ་དབྱངས་ལེན་ཞོར་སྤང་ཐོག་ཆས་ཡིན། །

ཡོད་ཚད་དེ་ལ་སྟོང་བའི་གྲྭ་རྐྱང་ང་རང་། །

འབྲེལ་འདྲིས་མེད་པའི་མི་ཚོགས་ཁྲོད་ལ་སླེབ་སྐབས། །

འབའ་ཁུག་སྔར་ལས་མི་འདྲ་སྲིབ་སྲིབ་ཆག་ཀྱང་།།

རྩལ་འདོན་སྣུམ་རྟགས་ཐུར་མ་དམའ་སར་ལྷུངས་སོང་།།

དབྱར་གྱི་བྱམས་ལྡན་ཕ་མའི་མི་ཚེ་རྫོགས་ནས།།

དགུན་གྱི་སྡང་དགྲས་རླུང་མདའ་ངའི་ཕྱོགས་གཏད་དུས།།

ང་ཡིས་གཅེས་པའི་དྲིན་ཅན་རླངས་འཁོར་དཀར་པོས།།

ཁེར་རྐྱང་དྭ་ཕྲུག་རྣ་རྩར་གྲང་རེག་མ་གཏོང་།།

རང་སེམས་དལ་གྱིས་ཕེབ་ནས་མལ་སར་བསྡད་ཀྱང་།།

མི་ཚེར་རྒྱ་གྲོང་འཁྱམས་པའི་མགོ་རིལ་ཞིག་གིས།།

དེ་གར་བསྡད་དུ་མ་བཅུག་རྫོང་ཐོག་ཁྲིད་དུས།།

ཁ་ལོ་བསྐོར་ཕྱོགས་ནོར་ནས་སྒོར་ཆད་ཕོག་ཐལ།།

ངལ་གསོའི་དུས་ཚིགས་བཟང་པོའི་ཉིན་མོ་ཞིག་ལ།།

བདུན་ཕྲག་མཁོ་དགོས་ཉོ་དུ་རྒྱ་གྲོང་འགྲིམས་སྐབས།།

ཁ་ཆར་ལྷགས་རླུང་གསེང་གི་སྦག་ཞོན་མཐོང་ཚེ།།

རླངས་ཆུང་དཀར་པོའི་བཀའ་དྲིན་ལྷག་པར་དྲན་སོང་།།

ཁ་ལོའི་བདེན་དཔང་པ་སེ་ང་ལ་མེད་པས།།

ལམ་དཀྱིལ་དབྱུག་ཁྲ་འཕྲད་འགེལ་ཝ་ལེར་མཐོང་དུས།།

དམར་ཆུང་སྙིང་ལ་གཟེར་རྒྱབ་ལྟར་བུའི་ན་ཟུག །

མི་འདོད་བཞིན་དུ་ཁུར་དགོས་བྱུང་འདི་སྐྱོ་བ། །

དགའ་བའི་མགྲིན་གླུ་སྙན་མོ་སྔོན་པོས་བྲིས་ཡོད།།

སྡུག་གི་སྐྱོ་གླུ་གཉོམ་པོ་དམར་པོས་འཐེན་ནས།།

སྐྱིད་སྡུག་ཚོར་སྣང་བརྗོད་པའི་བདེན་གཏམ་ཁ་ཤས།།

འོ་ཇ་འཐུང་ཞོར་ཨ་མའི་མདུན་དུ་བྲིས་ཡིན།།

 སྤྱི་ཟླ་་་༨ཚེས་་་་༡༥   དགོང་མོར་བྲིས། །