གྱེས་གདུང་གི་ངུ་ངག་གཉོམ་པོ།

སེམས་འགྱུ་ཕྲ་མོ་སྐད་ཅིག་གློག་བཞིན་བར་སྣང་སྤྲིན་པའི་གསེབ་ནས་འཁྱུག།

ལ་ལུང་རི་ཆུ་སྟོང་ཕྲག་བརྒལ་ནས་གངས་ཅན་ཕ་མེས་གཞིས་ཁྱིམ་དུ།།

གཉེན་ཉེ་གྲོགས་ཀྱི་བསུ་མ་བྱས་ཀྱང་དྲིན་ཆེན་མ་ལོ་ཕྱི་མར་གཤེགས།།

སེམས་པ་སྐྱ་མོ་སྡུག་གིས་མནར་ཞིང་དབང་མེད་མིག་ཆུའི་ཐིག་ཕྲེང་འཐོར།།#འདིའི་ཡར་སྔོན་མདུན་ངོས་སུ་འཆར་ཐུབ།#

མྱུར་མགྱོགས་རླུང་གི་ཅང་ཤེས་དང་འགྲོག་ངན་སོང་འཕྲང་ལམ་ཧད་ཀྱིས་གཤག།

རྣམ་ཤེས་ཁྱུང་གི་གཤོག་རྩལ་བསྡེབས་ཤིང་མཐོ་རིས་གནས་སུ་དལ་གྱིས་བགྲོད།།

ཚེ་འདིའི་ལུས་བསྐྱེད་དྲིན་ཆེན་མ་ལོ་མ་མཇལ་བདག་སེམས་སྟོང་བར་གྱུར།།

མ་ལོའི་དད་གསུམ་ཨ་ལོང་གོར་མོ་ཐུགས་རྗེའི་ལྕགས་ཀྱུས་མྱུར་དུ་དྲོངས།།

འགྱོད་སེམས་ངུ་ངག་དགུང་དུ་མཆོད་ཀྱང་ཨ་ལན་སྟོང་ཉིད་བྲག་ཆའི་དབྱངས།།

འགྱོད་སེམས་མིག་ལས་གཙང་ཆུ་སྦྱར་ཡང་མ་དང་གྱེས་གདུང་སེལ་མ་ནུས།།

འགྱོད་སེམས་ངང་ནས་མ་ཏྲི་བཟློ་བཞིན་མ་ལོར་ཐར་བའི་ལམ་སྣ་དྲོངས།།

འགྱོད་པའི་ཁུར་བོ་ཐང་དུ་གཡུག་ནས་དག་ཞིང་བགྲོད་པའི་གྲུ་གཟིངས་བསྐྲུན།།

ཨ་མའི་ལང་ཚོའི་ལོ་འདབ་སེར་པོ་སྟོན་རླུང་དྲག་པོའི་ཆར་གྱིས་གཏོར།།

ཨ་མ་ཞེས་པའི་ངུ་ངག་དྭངས་མོ་སྒྲ་བརྒྱ་སྟོང་གི་ཟིལ་གྱིས་མནན།།

ཨ་མའི་རྣམ་ཤེས་ལྔ་ལམ་ཆས་རྗེས་མྱ་ངན་འཁུར་བོ་ཤིན་ཏུ་ལྕི།།

ཨ་མའི་མན་ངག་ཕྱིར་དྲན་ཀློང་ནས་སྐྱོ་གདུང་མཆི་མའི་ཆུ་མིག་བརྡོལ།།

རེ་སྒུག་ལོ་འདབ་ས་ལ་འཐོར་ཞིང་གྱེས་གདུང་མཆི་མས་ཞིང་སར་བརླན།།

བདེ་སྐྱིད་མྱུ་གུ་དྲོད་ཀྱིས་མ་སྨིན་ཀུན་གཞི་ཞིང་ས་འཁྱག་གིས་བསྡམས།།

སྡུག་གི་སྨག་རིམ་སེལ་ཐབས་མ་བྱུང་སྐྱིད་པའི་ཉིན་བྱེད་ནུབ་ཏུ་ཆས།།

གྱེས་གདུང་ངག་གི་དབྱངས་རྟ་གཉོམ་པོས་དྲིན་ཆེན་མ་ལོར་སྐྱེལ་མ་བྱས།།