གཡུང་དྲུང་གླིང་དགེ་སློང་ ༧ ཤེས་རབ་བསྟན་འཛིན་རིན་པོ་ཆེའི་རྣམ་ཐར་མདོ་བསྡུས་བདུད་རྩི་ཐིག་པ་བཞུགས། 

ཤེས༵་བྱ་ཀུན་ཁྱེན་རྗེ་བཙུན་སྨན་རི་བའི། །རབ༵་འབྱམས་བྱམས་ཐུགས་འོ་མཚོ་ལས་འཁྲུངས་བཞིན། །བསྟན༵་པའི་སྙིང་པོ་བཤད་སྒྲུབ་རྒྱལ་མཚན་ཆེ། །འཛིན༵་སྐྱོང་སྤེལ་མཁས་ཁྱེད་ལ་གསོལ་བ་འདེབས། ཤེས་བྱའི་གནས་ཀུན་སྒྲིབ་མེད་མཁྱེན་པ་དང་། །རབ་དཀར་བརྩེ་ཆེན་སྙིང་རྗེ་ཟུང་འཇུག་གིས། །བསྟན་དང་འགྲོ་དོན་སྐུ་སྲོག་གཏོང་ཕོད་ཅན། །འཛིན་བྲལ་འཁྲུལ་ཞིག་ཁྱེད་ལ་གསོལ་བ་འདེབས། ཇི་སྲིད་ཉི་ཟླའི་འགྲོས་བར་མ་ཆོད་པར། །དེ་སྲིད་རི་དབང་འཕོ་འགྱུར་མེད་པ་བཞིན། །ཁྱེད་ཀྱི་མི་འགྱུར་གཡུང་དྲུང་ཁམས་བཞུགས་ཏེ། །བདག་སོགས་ཡིད་ཀྱི་རེ་བ་སྐོང་དུ་གསོལ། །ཆུང་ནས་མ་བཅོས་རང་བཞིན་འགྱུར་མེད་གཞིར། །སྐྱོ་ཤེས་ངེས་འབྱུང་དྲོད་གཤེར་རབ་འཛོམས་པས།།འཁོར་བའི་ཉེས་སྐྱོན་འདམ་གྱིས་མ་གོས་པ། །ཚངས་སྤྱོད་པད་མོ་བཞད་ལ་གསོལ་བ་འདེབས། །ཕྱི་ན་མཐུན་རྐྱེན་སྦྱར་བའི་ཕ་མ་བཟང་། །ནང་ནས་བྱམས་བརྩེས་སྐྱོང་བའི་དགེ་རྒན་བཟང་། །བར་ན་རང་ཚུགས་ཐུས་པའི་བློ་ཏིང་བཟང་། །བཟང་གསུམ་རྟེན་འབྲེལ་འགྲིགས་གསོལ་བ་འདེབས། །གོང་ན་བཀུར་ཆོག་མཚན་ལྡན་བླ་མ་དང་། །ཟུར་ནས་ཉན་ཆོག་སློབ་དཔོན་མཁས་པ་དང་། །གཤམས་ནས་སྡོད་ཆོག་སྣོད་ལྡན་སློབ་མ་གསུམ། །ངོ་མཚར་ཆོག་གསུམ་ལྡན་ལ་གསོལ་བ་འདེབས། །གདུང་སེམས་ཆེ་བའི་ཕ་མ་ཁུ་སྤུན་སོགས། །ཡགས་ཉེས་ཅི་འདྲ་བྱུང་ཡང་སྔོན་ལས་སུ། །ཤེས་ཤིང་ལས་འབྲས་ཟབ་མོ་རྒྱུད་སྐུལ་སྟེ། །རྩེ་གཅིག་སྒྲུབ་པ་མཛད་ལ་གསོལ་བ་འདེབས། །རིག་འཛིན་མཁའ་འགྲོ་བྱིན་གྱིས་རླབས་གནས་སུ། །འོལ་གླིང་གཉིས་པ་རིན་སྤུངས་གདན་ས་འདིར། །མཚུངས་སྤྱོད་གྲོགས་རྣམས་མདུང་དང་མདུང་ཁྱིམ་ཚུལ། །གྲོང་སྤོང་རྒྱུན་བཞུགས་མཛད་ལ་གསོལ་བ་འདེབས། །སྙིགས་མའི་དམུ་རྒོད་འགྲོ་ལ་དཔེ་བསྟན་ཕྱིར། །འཇིག་རྟེན་ཆོས་བརྒྱད་མགོ་བོ་རྡོག་པའི་གནོན། །དཀའ་ངལ་མ་འཛེམས་ཉམས་ཆུང་ངན་སློང་ཚུལ། །དགོན་པའི་ཞབས་ཕྱི་སྒྲུབ་ལ་གསོལ་བ་འདེབས། །སྲིད་ན་རྙེད་དཀོན་ཨུ་དུམ་ཝ་ར་བཞིན། །གངས་རིའི་ཁྲོད་ན་བསྟན་པའི་སྙིང་པོ་མཆོག །ཨ་རྫོགས་སྙན་གསུམ་དབང་ལུང་མན་ངག་ཁྲིད། །ལོ་གསུམ་སྒྲུབ་པ་མཛད་ལ་གསོལ་བ་འདེབས། །འཇིག་རྟེན་ཁམས་ན་ཕན་བདེ་ཀུན་གྱི་གཞི། །བསྟན་པའི་གསལ་ཕྱེད་མཁས་པའི་བྱ་བ་གསུམ། །མི་ཉམས་སྲིད་མཐའི་བར་དུ་རྒྱུན་བརྟན་ཕྱིར་། །བཤད་གྲྭའི་སྲོལ་བཟང་ཚུགས་ལ་གསོལ་བ་འདེབསས། །རང་དང་གྲོགས་རྣམས་མཚོ་ཁའི་ངང་བ་བཞིན། །དྲིན་ཆེན་བླ་མ་སློབ་དཔོན་སྤྱི་བོར་བཀུར། །ཐུགས་མཐུན་སྡོམ་གསུམ་རིམ་བཞེས་བཅས་ཁྲིམས་གཙང་། །བསྟན་པའི་མཛེས་རྒྱན་གྱུར་ལ་གསོལ་བ་འདེབས། །སྐབས་ཤིག་རྐྱེན་ངན་ལྕག་གིས་བསྐུལ་བའི་ཚེ། །སེམས་ཉིད་རྟ་ཕོ་ཆིབས་ཀྱི་ཁ་བསྒྱུར་ཏེ། །རྨད་བྱུང་རྒྱལ་བ་གོང་མའི་རྣམ་ཐར་བཞིན། །གཙང་སྟོད་གྲྭ་ས་བྲོས་ལ་གསོལ་བ་འདེབས། །རེ་ཞིག་འདུ་འཛི་དབེན་པའི་གནས་མཆོག་ཏུ། །ཆགས་མེད་ཆོག་ཤེས་བྱ་བྲལ་ཀུན་སྤོང་ཚུལ། །ཐུགས་དམ་གཅིག་པའི་གྲོགས་རྣམས་ལྷན་ཅིག་འདུས། །ཐོས་བསམ་སྒྲོ་འདོག་ཆོད་ལ་གསོལ་བ་འདེབས། །དེའང་ཡུན་དུ་མ་ཐོགས་གློ་བུ་རུ། །མི་རྟག་རྒྱུ་མའི་སློབ་དཔོན་སླེབ་བྱུང་ཚེ། །རྒྱལ་ཁྲིམས་ལྕགས་ཀྱི་ར་བ་བཙོན་ཁང་ནང། །ལོ་བཅུ་དཀའ་ཐུབ་མཛད་ལ་གསོལ་བ་འདེབས། །དེ་ལྟ་ནའང་བླ་མ་མཁས་པའི་དྲིན། །སྡུག་བསྔལ་དང་ལེན་བཟོད་པས་སྐྱོན་གང་བྱུང་། །ཚོགས་སུ་བསྒྱུར་ཏེ་གནས་ལུགས་ངང་སྐྱོང་བས་། །གྲུབ་པའི་རྟགས་མཚན་རྫོགས་ལ་གསོལ་བ་འདེབས། །ཡི་དྭགས་གྲོང་ཁྱེར་ས་སྟེང་ལྷག་པ་བཞིན། །བཀྲེས་སྐོམས་ཡིད་ལ་བཏགས་པའི་ཁྲིམས་རོགས་ལ། །ལྟོ་སྐལ་ཁ་ནས་བྲུས་ཏེ་སྦྱིན་པ་ཐོང་། །སྙིང་རྗེ་མངའ་བདག་ཁྱེད་ལ་གསོལ་བ་འདེབས། །གཞན་གྱི་སྡུག་བསྔལ་རང་གི་སྟེང་དུ་བླང། །རང་གི་བདེ་དགེ་གཞན་ལ་སྦྱིན་པ་སོགས། །སྟོན་པའི་དཀའ་བ་སྤྱོད་བཞིན་གཉིད་སྤང་ཏེ། །བརྩོན་འགྲུས་ཆུ་རྒྱུན་བསྟེན་ལ་གསོལ་བ་འདེབས། །བཙོན་པ་རྣམས་ལ་སྐབས་རེ་ཤ་ཐུབ་ཞེས། །དྲི་ཙམ་བྱུང་ཚེ་ན་ཚའི་ཁག་སྐྲིདས་དེ། །སྙིང་རྗེ་སྲོག་གཅོད་ཤ་ཟ་མ་ཕོད་པས། །ལྷ་མིའི་དྭངས་བ་འདྲེན་ལ་གསོལ་བ་འདེབས། །མདོར་ན་བླ་མ་སློབ་དཔོན་བཀའ་བཞིན་དུ། །ཅི་བྱེད་གང་གནས་སྐྱིད་རུང་སྡུག་བསྔལ་ཡང་། །བླ་མའི་གསོལ་འདེབས་གནས་ལུགས་དོན་ལ་གོམས། །གསུང་བཞིན་ཡིད་ཆེས་བསྐྱེད་ལ་གསོལ་བ་འདེབས། །སླར་ཡང་སྐྱེ་དགུའི་བསོད་ནམས་ཤར་རིའི་རྩེར། །རྒྱལ་བསྟན་ཉི་གཞོན་གསར་བ་འཆར་བའི་ཚེ། །ཚེ་ལུས་ལོངས་སྤྱོད་བསྟན་པའི་ཕྱོགས་ཕུལ་ཏེ། །དཀའ་སྤྱོད་དང་དུ་བླང་ལ་གསོལ་བ་འདེབས། །བསྟན་པ་འཇིག་རྟེན་ཡུན་དུ་གནས་པ་དང་། །བསྟན་སྦྱིན་ཕོ་མོའི་བསོད་ནམས་བསོགས་པའི་རྟེན། །བསྟན་པའི་རྩ་ལག་རྟེན་གསུམ་མང་བཞེངས་ཏེ། །བསྟན་པ་རྗེས་བཞག་མཛད་ལ་གསོལ་བ་འདེབས། །བདག་ཀྱང་འདི་ནས་སྐྱེ་བ་ཐམས་ཅད་དུ། །དམ་པ་ཁྱེད་ཀྱི་བརྩེ་བས་རྗེས་སུ་བཟུང་། །གསང་ཆེན་གཡུང་དྲུང་བོན་དང་འཕྲད་ནས་སུ། །ཚོམས་ཅིག་སྐུ་གསུམ་རྒྱལ་ས་ཟིན་པར་ཤོག དགེའོ། བཀྲ་ཤིས་སོ།