ཟིན་བྲིས་ལི་ཐོ།
སྒྲིག་འཇུག...
སྤྱི་བསྒྲགས།
སྒྲིག་འཇུག...
ཆེད་སྒྲིག་རྣམ་དབྱེ།
སྒྲིག་འཇུག...
ཟིན་ཐོ་གསར་བ།
སྒྲིག་འཇུག...
དཔྱད་གཏམ་གསར་བ།
སྒྲིག་འཇུག...
ཆེམས་གསར་བ།
སྒྲིག་འཇུག...
འཚོལ་བཤེར།
སྦྲེལ་མཐུད།
ཐོན་བྲིས་སྤྱི་བསྡོམས།
སྒྲིག་འཇུག...


 
བོན་གྱི་སྲུང་མ་རྣམས་ཀྱི་ངོ་སྤྲོད་དང་བྱུང་རབས།
[ 2014-11-03 13:33:00 | By: ཨ་ཀྲོང་རིན་རྒྱལ། ]
 

བོན་གྱི་སྲུང་མ་རྣམས་ཀྱི་ངོ་སྤྲོད་དང་བྱུང་རབས།

མ་གཅིག་སྲིད་པའི་རྒྱལ་མོ་འགྲན་གྱི་ཟླ་མེད་ནི། 

མཁའ་ཀློང་གསང་བའི་མདོས་ཆེན་ལས། མ་ ཅིག་སྲིད་པའི་རྒྱལ་མོ་ནི། །མ་ཞེས་བྱ་བ་ཀུན་འབྱུང་ཡུམ། །ཅིག་ཞེས་བྱ་བ་ཉག་གཅིག་སེམས། །སྲིད་ཅེས་བྱ་བ་སྣོད་བཅུད་གཞི། །རྒྱལ་ཞེས་བྱ་བ་ཀུན་ལས་འཕགས། །མོ་ཞེས་བ་འབྱུང་བའི་གནས། །ཞེས་སོ། དེ་ ཡང་ཇི་ལྟར་བྱུང་ཚུལ་ནི་ཕྱི་ནང་གསང་གསུམ་གྱི་སྒོ་ནས་འཆད་ཚུལ་དུ་མ་ཞིག་ཡོད་ ཀྱང་།  གསས་མཁར་རིན་པོ་ཆེ་སྤྱི་སྤུངས་ཞི་བ་གཡུང་དྲུང་ཡོངས་སུ་རྫོགས་ཀྱི་ ལུང་ལྟར་འཆད་ན། དང་པོ་ཅིར་ཡང་མ་སྲིད་པའི་ནམ་མཁའ་སྟོང་པའི་ངང་ལས། འོད་ཀྱི་ཆོ་འཕྲུལ་ཅིར་ཡང་མཁྱེན་པར་སྲིད། འོད་ཀྱི་བཅུད་ལས་ཟེར་དང་ཡུད་དུ་སྲིད། ཟེར་དང་ཡུད་ལས་དྲོད་དང་མཉེན་དུ་སྲིད། དྲོད་དང་མཉེན་ལས་གཤེར་དང་རླན་དུ་སྲིད། གཤེར་དང་རླན་ལས་བག་དང་རྡུལ་ཙམ་དུ་སྲིད། བག་དང་རྡུལ་ ཙམ་ལས་རིན་པོ་ཆེ་སྐྱེ་དགུའི་གཏན་གཞིར་སྲིད། ས་རིན་པོ་ཆེའི་དབུས་སུ་གཡུ་ཡི་ རྒྱལ་མཚོ་གླིང་དགུ་པ་གཅིག་སྲིད། དེ་རླུང་གིས་བསྐྱོད་པ་ལས་ལྦུ་བ་གུར་ཙམ་ཞིག་སྲིད། ལྦུ་བ་དེའི་ནང་ནས་སྒོ་ང་འོད་ཀྱིས་བརྒྱན་པ་ཞིག་སྲིད་པ་ལས། སྒོ་ང་རྒྱ་མཚོའི་རླབས་ཀྱིས་བརྡོལ་བའི་ནང་ནས་དབྱལ་གྱི་མི་མོ་ཞིག་བྱུང་སྟེ་ རང་མིང་རང་གིས་གདགས་པས་བཟང་ཟ་རིང་བཙུན་དུ་བཏགས་སོ། ཡེ་སྲིད་ལྷ་ཡི་རྒྱལ་པོས་དབྱིངས་ནས་མཚན་གསོལ་བ། སྲིད་པའི་རྒྱལ་མོ་འགྲན་གྱི་ཟླ་མེད་མར་མཚན་གསོལ་ལོ། སྐུ་ལས་བསྐྱེད་པའི་སྲས་རྣམས་དང་གཤེན་པོ་རྣམས་ཀྱིས་མཚན་གསོལ་བ། ཡུམ་ཆེན་ཐུགས་རྗེ་བྱམས་མར་མཚན་གསོལ་ལོ། མི་ལ་སོགས་པའི་སེམས་ཅན་སླད་ནས་སྐྱེས་པ་རྣམས་ཀྱིས་མཚན་གསོལ་བ། ཕྱི་ཕྱི་གནམ་ཕྱི་གུང་རྒྱལ་དུ་མཚན་གསོལ་ལོ། ཞེས་པ་ལྟར། ཕྱི་ལྟར་བཟང་ཟ་རིན་བཙུན། ནང་ལྟར་ཐུགས་རྗེ་བྱམས་མ། གསང་བ་ལྟར་གནམ་ཕྱི་གུང་རྒྱལ་ལམ་བདེ་འགྲོ་གསང་ཡུམ་སྲིད་པའི་རྒྱལ་མོ་ཞེས་བྱ་ བ་ཡིན་ཏེ། དབལ་མོ་ཕྱི་ནང་གསང་གསུམ་གྱི་ཡང་སྙིང༌། ལོག་ལྟ་བོན་གཤེད་ཐམས་ཅད་ཀྱི་སྲོག་བདག བསྟན་དགྲ་གེ་ཤན་ཐམས་ཅད་ཀྱི་གཉའ་ནོན། གཡུང་དྲུང་བོན་བསྟན་སྐྱོང་བའི་སྲུང་མ། རྒྱུད་འཛིན་གཤེན་པོ་ཡོངས་ཀྱི་སྒྲུབ་སྡེ། བོན་སྐྱོང་ཕྱི་ནང་གསང་གསུམ་གྱི་རྩ་བ། རྩོད་ལྡན་དུས་ཀྱི་རྣལ་འབྱོར་ཡོངས་ཀྱི་སྒྲ་བླ། དྲེགས་པ་ཕོ་རྒྱུད་དང་མོ་རྒྱུད་ཐམས་ཅད་ཀྱི་གཙོ་མོ། མཁའ་འགྱིང་ཡབ་ཡུམ་རོལ་པའི་སྲས་མོ། སྟོང་གསུམ་གཡུལ་ལས་རྒྱལ་བའི་དཔལ་ལྡན། སྐུ་གསུམ་ཁྲོ་རྒྱལ་དགྱེས་པའི་སྦྱོར་ཡུམ། དུས་གསུམ་སྟོན་པ་ཡོངས་ཀྱི་བཀའ་ཉན། སངས་རྒྱས་བསྟན་འཛིན་གཤེན་པོའི་མཚོན་ཆ། མ་མོ་དགུ་ཁྲི་དགུ་འབུམ་གྱི་འ་མོ། བསྟན་སྲུང་དམ་ཅན་རྒྱ་མཚོའི་ནང་ནས་སྐུ་གསུམ་རྒྱལ་བའི་གོ་འཕང་མངོན་དུ་བརྙེས་ པའི་བསྟན་སྲུང་ཡོངས་ཀྱི་གཙོ་མོ་ཡིན་ནོ། 

 མི་བདུད་འབྱམས་པ་ཁྲག་མགོ། 

ལོ་རྒྱུས་དྲ་བ་དམར་ནག་གི་རྒྱུད་དོན་ལྟར་འཆད་པ་ལ། བཞི་བཅུ་རྩ་ལྔ་ཐེག་པའི་ཡང་གོང༌། ས་འོད་དཀར་ལ་ལྗོན་སྟེང་ན། གནས་གསས་དབྱིངས་རུམ་ཐུགས་ཀྱི་སྤྲུལ་པ་ལས། གཡུའི་བྱིལ་བུ་ལུག་རྫི་མོ་གཅིག་གནམ་ནས་ས་ལ་སྤྲུལ་ལོ། དེའི་ཞལ་ནས་ཧ་དང་ཧི་ཞེས་བརྗོད་པས། འབྱུང་བ་ལྔའི་སྙིང་པོ་ལས། གཞའ་དང་སྤྲིན་དུ་བྱུང་བ་དེའི་བཅུད་ལས་རིན་པོ་ཆེ་ཡི་སྒོ་ང་གཅིག་བརྡོལ་བ་ལས། སྟག་བདུད་གེ་ཏ་བྱུང༌། སྟག་བདུད་གེ་ཏའི་རྒྱུད་ལས་བྱུང་བའི་གེ་ཏ་ཁྲི་འདུལ་ཐང་པོ་དང༌། ན་ལྕམ་མགྲིན་རིང་མ་གཉིས་བཤོས་པ་ལས། མི་བདུད་འབྱམས་པ་ཁྲག་མགོ་བྱུང་ངོ༌། དེས་མི་ཡི་སྲོག་ལ་བདུད་དུ་བྱེད། ཕྱུགས་ལ་གཅན་དུ་བྱེད། ཡོད་ཁམས་ཀུན་ལ་གནོད་ཅིང་འཚེ་བར་བྱེད་པའི་གཞི་བླངས་སོ། རུ་བཞི་ལྷའི་སྤྲུལ་པ་ལྷ་བོ་ལྷ་སྲས་ཀྱིས་གཉེར་དུ་གཏད་ནས། བོན་དང་གཤེན་གྱི་སྒྲ་བླར་བསྐོས་སོ། ཧྲིས་པ་གྱེར་མེད་ཀྱིས་དབལ་གསས་རྔམ་པའི་སྐུ་རུ་བཞེངས་ཏེ། བཀའ་སྒོ་དམ་བརྡར་མཛད༌ནས་བསྟན་པ་སྲུང་བའི་དཔལ་མགོན་དུ་མངའ་གསོལ་ལོ།  ཁྱད་པར་དུ་རྒྱལ་བ་གཉིས་པ་མཉམ་མེད་ཆེན་པོའི་སྐྱེས་རབས་དགུ་ཡི་སྲུང་མར་མཛད་ པ་ཡིན་པར་གསུངས། སྒོས་སུ་དཔལ་གཤེན་བསྟན་སྨན་རི་བའི་བསྟན་དང་བསྟན་འཛིན་རྣམས་ཀྱི་འཕྲིན་ལས་ འབད་མེད་དུ་སྒྲུབ་པའི་དམ་བཅས་ནས་བསྟན་པའི་སྲུང་མ་གཙོ་བོར་བསྐོས་པའོ། །

 བཙན་རྒོད་ཧུར་པ་གསོད་རྐྱེན།

དྲ་བ་དམར་ནག་གི་རྒྱུད་དོན་ལྟར། གསས་ཆེན་རུས་བཞིའི་ཐུགས་ཁ་ནས་འོད་ཀྱི་ཡི་གེ་ཧ་བཞི་བྱུང་བ། སྲིད་རྒྱལ་ཐུགས་སྤྲུལ་རིན་པོ་ཆེའི་ཁུ་འཕང་བཞི་ལ་ཐིམ་པས། རིན་པོ་ཆེའི་སྒོ་ང་བཞི་རུ་གྱུར་པའི་ནང་ཚན། ཐ་མ་དེ་ཉིད་བརྡོལ་བ་ལས། བཙན་སྲིད་ཀྱི་རྒྱལ་པོ་ཧུར་པ་གསོད་རྐྱེན་བྱུང་ངོ༌། དེས་འགྲོ་བ་གཞན་གྱི་སྲོག་དང་དབུགས་ལ་ཧུར་ཐུམ་བྱེད་པ་དང༌། ཡེ་འགྲོག་དང་ཐོབ་ཤོར་སློང་བས། ཆེ་མཆོག་དབལ་གསས་ཀྱིས་མཐུ་སྟོབས་དྲག་པོའི་རྩལ་བསྐྱེད་དེ། དབང་དུ་བསྡུས་ནས་བསྟན་པའི་སྲུང་མར་བསྐོས་སོ། ཡ་ཐོག་བསྐལ་པའི་དང་པོ་སྟོན་པ་གཤེན་རབ་མི་བོ་དང༌། གཉན་བོན་ཐང་ཐང་ཁྲོལ་བ༌། བདུན་བོན་ཁ་སྟ་འགྲེང་ཡུག བཙན་བོན་དུམ་པ་མཚལ་ལྕགས་དང་བཅས་པའི་གཤེན་བོན་དེ་རྣམས་ཀྱི་སྒྲ་བླ་ཡིན་པ་མ་ ཟད། བར་གྱི་སྲིད་པ་དབུ་མ་ལ་ཞང་ཞུང་ཧྲིས་པ་གྱེར་མེད། ཝེར་གེ་སྟག་ལོ་གཤེན་གསུམ༌། ཕ་ངལ་ཡང་གསང་གཤེན་གསུམ༌། ཡ་ངལ་ཀུ་རུབ་གཤེན་གསུམ། སྣ་རོ་དབང་གི་གཤེན་གསུམ་བཅས་ཀྱི་སྒྲ་བླ་དང༌། དུས་ཀྱི་སྲིད་པ་ཐ་མ་ལ་སྙིགས་དུས་ཀྱི་འདྲེན་པ་ཡོངས་ཀྱི་ཐུ་བོ་རྒྱལ་བ་མཉམ་ མེད་ཆེན་པོས་བསྟན་པ་འཛིན་སྐྱོང་སྤེལ་གསུམ་གྱི་ལས་ལ་མཐུ་སྟོབས་ནུས་པ་གཅིག་ ཏུ་བསྒྲིལ་བའི་དཔུང་གཉེན་གྱི་མཆོག་ཏུ་གྱུར་པའོ། །

 བསྟན་སྲུང་ཨ་བསྭེ་བྲག་བཙན་གཡུང་དྲུང་དགྲ་འདུལ་རྩལ།

འཛམ་གླིང་ཉི་མའི་དབུས་དཀྱིལ་གྱི་གངས་ དཀར་ཏི་སེའི་བྱང་ཤར་ཕྱོགས། བལ་མོན་བོད་ཀྱི་སོ་མཚམས་འཕྱོ་བ་བཙན་གྱི་ཡུལ། དུག་མཚོ་མེར་བའི་འགྲམ་ཤེད། རིན་ཆེན་བྲག་དམར་ཟང་ཡག་ལ། རིན་ཆེན་བསེ་མཁར་སྨུག་པོའི་དབུས། ཡབ་ཨ་བསེ་རྒྱལ་བ་དང༌། ཡུམ་ས་སྲིན་མ་མོ་གཉིས་ཐབས་ཀྱི་རྫུ་འཕྲུལ་བརྡེབས་པ་ལས་སྤྲུལ་པའི་སྲས། ཟངས་ཀྱི་སྒོ་ང་གཅིག་ཏུ་བྱུང༌། བཙན་བོན་རོལ་པོ་མཐུ་ཆེན་གྱིས་ཁྱུང་གི་རྔ་མགོས་སྒོ་ང་བརྟོལ་བ་ལས། སྒོ་ང་དེའི་ནང་ཤེད་ན། འཇིགས་པའི་མི་དམར་མདུང་ཙམ་ཞིག་སྟོང་ཁམས་ཉུལ་ཞིང་གླིང་བཞི་བསྐོར་བ་ཞིག་བྱུང་ ངོ༌། བྲག་བཙན་འདི་ཉིད་དབང་དུ་བསྡུས་ཤིང་བསྟན་པ་སྲུང་བའི་ལས་ལ་བཀོལ་བའི་ཆེད། སྔོན་གྱི་བསྐལ་པ་དང་པོར་རི་རབ་ལྷུན་པོའི་ཕྱི་རོལ། ཉ་མེད་འོད་ཆགས་མཚོ་འགྲམ་གྱི་ནམ་མཁའ་མཛོད་ཀྱི་བྲག་ཕུག་ཏུ། འཆི་མེད་གཙུག་ཕུད་ཀྱི་ཐུགས་སྲས་གཤེན་གསང་བ་འདུས་པ་ཡིས། དབལ་གསས་རྔམ་པའི་སྐུར་བཞེངས་ནས། དྲེགས་པ་བཙན་ཁམས་དམ་ལ་བཏགས་པའི་དུས། རང་གི་སྲོག་སྙིང་ཕུལ་ཏེ་བསྟན་པ་སྲུང་བར་ཁས་བླངས། མཚན་ཡང་ལྷ་བཙན་ནེ་ཝེར་རྒྱལ་ཞེས་སུ་གྲགས། དབལ་གསས་ཐུགས་ཀྱི་བཀའ་སྡོད་ལགས་སོ། དེ་ནས་སྟོན་པ་གཤེན་རབ་མི་བོ་དང༌། བཙན་བོན་རོལ་པོ་མཐུ་ཆེན་གྱི་སྤྱན་སྔར་བསྟན་སྲུང་ཁས་བླང་དམ་བཅའ་ཕུལ་བས། མཚན་ཡང་ཐོག་མེད་དགྲ་འདུལ་རྩལ་དུ་གསོལ། གཤེན་རབ་སྐུ་ཡི་བཀའ་སྡོད་ལགས་སོ། བར་གྱི་བསྐལ་པ་དབུས་མ་ལ། གནམ་མཚོ་ཕྱུག་མོའི་དོ་རིང་དུ། ཞང་ཞུང་སྟོང་རྒྱུང་མཐུ་ཆེན་དྲུང༌། བསྟན་པ་སྲུང་བའི་གཡར་དམ་བཅའ་བས། མཚན་ཡང་ཨ་བསྭེ་མྱུར་མགྱོགས་རྩལ་དུ་གྲགས། སྟོང་རྒྱུང་གསུང་གི་བཀའ་སྡོད་ལགས་སོ། དུས་ཀྱི་བསྐལ་པ་ཐ་མ་ལ། སྐྱིད་མཁར་སྔོ་ཕུག་གི་སྒྲུབ་གནས་སུ། ཞུ་ཡས་ལེགས་པོའི་བཀའ་ཉན་ཞིང་སྒྲུབ་རྒྱུད་བསྟན་པ་སྲུང་བའི་གཉེར་བཞེས་པའོ། དུས་མཐར་རྒྱལ་ཁྱུང་མི་ཡི་དབང་པོ་བཙན་རྒྱལ་གྲགས་པ་ཡབ་སྲས་དང༌། སྙིགས་མའི་སྔགས་འཆང་དབལ་འབར་སྟག་སླག་ལགས་སོགས་ཀྱིས་ལས་ཀྱི་སྲུང་མར་བསྟེན་པ་ ནས་བཟུང༌། དབྲ་རིགས་ཁྱུང་པོའི་ཕོ་ལྷ་རུ་གྲགས་པའོ། །

འཛམ་སྔོན།

བདག་ཅག་གི་སྟོན་པས་སྔོན་བསགས་བསོད་ནམས་ཕུང་པོའི་དཔལ་ལས་རྒྱལ་བསྟན་རིན་པོ་ ཆེ་ཞབས་ནས་འདེགས་པའི་ཆ་རྐྱེན་དུ། གསས་མཁར་ཤམ་པོ་ལྷ་རྩེའི་བྱང་ཕྱོགས་སུ་དམུ་རྒྱལ་གཤེན་གྱི་དཀོར་མཛོད་ལ་དབང་ བསྒྱུར་ཞིང་རང་འབྱུང་རྫུས་སྐྱེས་ཀྱི་ཚུལ་དུ་བཞུགས་པའོ། ཡང་ན་གདུང་རྒྱུད་ཀྱི་རྒྱལ་པོ་སྡེ་དྲུག་གི་ནང་ཚན་དམུ་རྒྱལ་གཤེན་གྱི་གདུང་ འཛིན་ཡབ་རྒྱལ་བོན་ཐོད་དཀར་དེ་ཉིད་ཀྱིས་སྔོན་བསགས་སྨོན་ལམ་གྱི་མཐུ་བཙན་པ་ལས་ གྲུབ་པར་མངོན་ཏེ། མཛད་མདོ་འབྲིང་པོ་ལས། ང་ནི་ནོར་གྱི་ལྷ་ཨར་ཡ་འཛམ་བྷ་ལ་བྱ་བ་ཡིན་ཏེ། སྲིད་པ་གསུམ་གྱི་ནོར་འབྱིན། བསྐལ་པ་གསུམ་གྱི་དབང་བསྐུར། འབྱུང་བ་བཞིའི་གཏེར་བསྲུང་བ་ཞིག་ལགས་ན། རྒྱལ་པོའི་བཀའ་ཡིས་བཅད་ན་བདག་ལ་དབང་མ་མཆིས། བདག་ཀྱང་རྒྱལ་པོའི་སྨོན་ལམ་མཐུ་ཡི་སྐུ་རྐྱེན་ཡིན། ཞེས་གསུངས་སོ། འདི་ལ་ཞི་བའི་དབང་དུ་བྱས་ན་དཀར་པོ་དང༌། རྒྱས་པའི་དབང་དུ་བྱས་ན་སྔོན་པོ། དབང་གི་དབང་དུ་བྱས་ན་སེར་པོ། དྲག་པོའི་དབང་དུ་བྱས་ན་ནག་པོ་ཞེས་ལྷ་བོན་ཡོངས་སུ་དག་པས་སྒྲུབ་ཐབས་བཞི་རུ་ གསུངས་ཚུལ་འདུག་ཀྱང༌། ད་ལན་འདིར་རྒྱས་པའི་དབང་དུ་བྱས་པའི་ནོར་སྲུང་ཆེན་པོ་དེ་ཉིད་ཀྱི་སྐུ་མདོག་ མཐིང་སྔོན་ནམ་མཁའི་གཟི་མདངས་དང་ལྡན་པ། ཞལ་གཅིག་ཕྱག་གཉིས་ཁྲོ་འཛུམ་གྱིས་གཤེན་ལ་གཟིགས་པའི་ཚུལ་སྟོན་པ་ཞིག་ཡོད། སྔོན་ཚེ་སངས་རྒྱས་སྤྱན་སྔར་ཁས་བླངས་པ་ཇི་བཞིན། སྣང་སྲིད་འབྱུང་བའི་ཚེ་བཀྲག་མདངས་གསུམ་བསྡུས་ནས། སྒྲུབ་གཤེན་གྱི་ཕྱྭ་ཚེ་བསྲིངས་བ་དང༌། ཟད་མེད་གཏེར་གྱི་དངོས་གྲུབ་ཀྱིས་རྒྱལ་བསྟན་ཡུན་དུ་འཚོ་བའི་ཆ་རྐྱེན་དུ་ བཞུགས་པ་ལགས་སོ། །

 རྒྱལ་ཆེན་ཤེལ་ཁྲབ།

ཁུངས་བཙུན་པའི་ཕྱིར་སྔོན་བྱུང་ལོ་རྒྱུས་ཀྱི་ཁོག་དབུབ་སྟེ་འཆད་པ་ལ། སྔོན་གྱི་བསྐལ་པ་དང་པོ་ལ། སྟོན་པ་འཆི་མེད་གཙུག་ཕུད་ཀྱིས་རི་རབ་རི་ཡི་རྩེ་མོ་རུ། དབལ་གསས་རྔམ་པར་སྤྲུལ་ནས་འཇིག་རྟེན་ཁམས་ཀྱི་ལྷ་སྲིན་སྡེ་བརྒྱད་ཐམས་ཅད་དམ་ལ་ བཏགས་ནས་སྲོགསྙིང་ཕུལ་བའི་དུས་སུ། རྒྱལ་ཆེན་ཤེལ་ཁྲབ་ཅན་ནི་སྟོབས་ཆེ་ལ་རྩལ་དྲག་པ་ཞིག་བྱུང་བས། གཡུང་དྲུང་བོན་ཕྱི་ནང་གསང་གསུམ་གྱི་བསྟན་པ་སྲུང་བའི་དབང་བསྐུར་ཞིང༌། གསང་མཚན་ཤར་ཕྱོགས་རྒྱལ་པོ་ཤེལ་དཀར་འོད་དུ་གསོལ། དེ་ནས་བླ་ཆེན་ཡབ་སྲས་ཡན་ཆད་གཡུང་དྲུང་བོན་ཕྱི་ནང་གསང་གསུམ་གྱི་བསྟན་པ་སྲོག་ ལྟར་བསྲུངས་ཤིང་སྒྲུབ་གཤེན་ཀུན་གྱིས་གང་བཅོལ་ལས་རྣམས་གྲུབ་པར་མཛད་དོ། མཚན་ཡང་ཤར་ཕྱོགས་ཡ་ཅོ་རྒྱལ་པོར་གསོལ། བོད་རྒྱལ་ཁྲི་སྲོང་རིང་གཡུང་དྲུང་བོན་གྱི་བསྟན་པ་ཅུང་ཟད་བསྣུབས་པར་གྱུར་ པའི་སྐབས། རྒྱ་གར་གཙུག་ལག་ན་ལེན་ཏྲ་ཡི་སྲུང་མ་མཛད། དེ་རྗེས་བསམ་ཡས་སུ་དྲངས་ཏེ་བསམ་ཡས་ཀྱི་དཀོར་བདག་ཏུ་མངའ་གསོལ། དེ་ནས་རིག་འཛིན་གོང་མ་རྣམས་ཀྱི་སྨོན་ལམ་བཟང་པོའི་སྟོབས་ཀྱིས་བོན་བསྟན་ཕྱི་ དར་གྱི་སྒྲོན་བསྐལ་ཤར་བའི་ཚེ། བྲུ་བདག་ཉིད་རྗེ་བཙུན་སྟེ་བྲུ་རྗེ་གཡུང་དྲུང་བླ་མས་དམ་རྫས་དམ་ཆུ་བླུད་དེ་ གཡས་རུ་དབེན་ས་ཁའི་བསྟན་སྐྱོང་གི་སྲུང་མ་མཛད་དོ། གསང་མཚན་རྒྱལ་ཆེན་ཤེལ་ཁྲབ་འབར་བ་ཞེས་གསོལ། དེ་རྗེས་རྗེ་མཉམ་མེད་ཆེན་པོའི་དྲུང་ནས་གདན་ས་༧སྨན་རི་བའི་བསྟན་དང་བསྟན་ འཛིན་ཡོངས་ཀྱི་མགོན་མཛད་ཀྱི་གཉེར་བཞེས་པ་ནས་བཟུང༌། བསྟན་འཛིན་སྐྱེས་བུ་ཀུན་ལ་སྡོང་གྲོགས་རྒྱ་ཆེན་པོར་མཛད་ཅིང༌། ཁྱད་པར་དུ་མཉམ་མེད་འགྲོ་བའི་མགོན་པོ་ཤེས་རབ་རྒྱལ་མཚན་གྱི་རྗེས་སུ་འཇུག་པའི་ བསྟན་འཛིན་གྱི་སྐྱེས་བུ་རྣམས་ལ་ལུས་དང་གྲིབ་མ་བཞིན་དུ་འཁོར་ཞིང་བསྟན་དགྲ་ ཐམས་ཅད་ཚར་གཅོད་ཅིང་བསམ་དོན་རྣམས་མྱུར་དུ་འགྲུབ་པར་མཛད་པ་རྗེ་རིན་པོ་ཆེའི་ སྤྱན་སྔར་ཁས་བླངས་ཤིང་དམ་བཅས་པའོ། །

 རྒྱལ་པོ་ཆེན་པོ་ཉི་པང་སད།

སྙན་རྒྱུད་བོན་གྱི་བཀའ་སྐྱོང་རྒྱལ་པོ་ཉི་པང་སད་ཀྱི་བསྐང་བའི་དབུས་ཕྱོགས་ལས་ གསལ་བ་ལྟར། རྒྱལ་པོ་འདི་ཉིད་ཀྱི་བྱུང་རབས་ལོ་རྒྱུས་གླེང་བ་ལ། ཡབ་གནམ་ལྷ་ཐོག་གི་རྗེ། མཚན་གཞན་གནམ་རྗེ་སྨོན་ཐང༌། ལྷ་རྒོད་ཐོག་པ་དང་གནམ་ཕྱི་གུང་རྒྱལ་གཉིས་ཡིད་ཀྱི་བཤོས་པ་ལས་བྱུང་བའི་ཡུམ་ས་ ཀླུ་མ་མོ། མཚན་གཞན་གནམ་གྱི་བྱིན་ཏེ་ལྷ་མོ་ཐང༌། ཡབ་ཡུམ་དེ་གཉིས་ཀྱི་ཐབས་ཤེས་སྤྲུལ་པ་ལས་དུང་སྒོང་དཀར་པོ་གཅིག་ནས་འཁྲུངས། སྔོན་གྱི་བསྐལ་པ་དང་པོ་ལ། ཝེར་རོ་རྒྱལ་པོ་འདི་ཉིད། སྟོན་པ་གཤེན་རབ་མི་བོའི་དྲུང༌དུ་བསྟན་པ་སྲུང་བར་དམ་དུ་བཅས་པས།  ལི་བྱིན་ཧར་དུ་མཚན་ཡང་གསོལ། དེ་ནས་གསང་བ་འདུས་པ་ཡི། གེ་ཁོད་གཉེན་ལུང་ཡང་དབེན་དུ། དབལ་གསས་རྔམ་པའི་སྐུར་སྤྲུལ་ནས། སྐུ་རྫོགས་དྲག་པོའི་ཏིང་འཛིན་གྱིས། སྒྲུབ་གཤེན་གྱེར་གྱི་བསྟན་པ་བསྲུང་བར་ཞལ་གྱི་བཞེས། སྣང་སྲིད་ཕོ་རིགས་ཀུན་གྱི་རྗེ་བོར་གྱུར་པའི་རྒྱལ་ཆེན་འདི་ནི། རྗུ་འཕྲུལ་གྱི་ལྷ་ཆེན་ཀུ་བྱི་མང་རྐེ་དེ་ཉིད་སྤྲུལ་པའི་ལྷ་ཆེན་དབལ་ཆེན་གེ་ ཁོད་དུ་སྐུ་སྤྲུལ་ནས་སྡེ་བརྒྱད་ལྷ་སྲིན་དབང་དུ་བསྡུས་པའི་དུས། རྒྱལ་པོ་འོང་དུ་མ་འདོད་པ་ལ། ཛྭ་དམར་དྲག་པོའི་སྔགས་ཀྱི་གཟིར་ནས། འོད་ཟེར་ལྕགས་ཀྱུས་སྲོག་སྙིང་བཀུག་པས། རང་དབང་མེད་པར་མདུན་དུ་འོང་ནས་རང་སྲོག་གསང་བའི་སྙིང་པར་ཕུལ་ནས་བསྟན་པ་སྲུང་ བའི་དམ་འབུལ་ཞུས། མཚན་ཡང་ཉི་པང་སད་དུ་གསོལ། དུས་ཀྱི་བསྐལ་པ་ཐ་མ་སྤྱི་ལོའི་དུས་རབས་བརྒྱད་པ་བོད་རྒྱལ་ཁྲི་སྲོང་ལྡེའུ་ བཙན་རིང་གྱེར་སྤུངས་སྣང་བཞེར་ལོད་པོ་ཡིས། སྙན་རྒྱུད་ཟབ་མོ་འདི་ནུབ་ཏུ་ཕངས་ནས་དུས་མིན་འགལ་རྐྱེན་གྱི་དབང་དུ་མ་ཤོར་ བའི་ཆེད་བཀའ་སྲུང་ཞིག་བཙལ་ནས། དེ་དུས་སྣང་སྲིད་ཀྱི་སྡེ་བརྒྱད་ཕོ་རིགས་ཡོངས་ལས་ཤིན་ཏུ་གཏུམ་ལ་དྲག་རྩལ་ཆེ་ བ་དབང་ཆེན་གྱི་རྒྱལ་པོ་ཉི་པང་སད་ཀྱིས་སྲོག་སྙིང་ཕུལ་ཏེ། གྱེར་སྤྲུངས་རྣམས་ཀྱིས་མ་བསྒྲུབས་པར་ལས་བྱེད་ཅིང༌བསྟན་པ་སྲུང་བར་ཁས་བླངས་ སོ། ། 

 

རྒྱལ་ཆེན་གྲགས་པ་སེང་གེ།

རྒྱལ་ཆེན་གྲགས་པ་སེང་གེ་འདིའི་བྱུང་ཁུངས་ཀྱི་ལོ་རྒྱུས་ནི། སྔོན་ཚེ་རྣམ་མཁྱེན་རྒྱལ་བའི་སྤྱན་སྔ་རུ་གཤེན་ཆུང་གོ་བོ། དེ་རྗེས་བཅོམ་ལྡན་འདས་ཀྱི་སྤྱན་སྔར་གྲགས་པ་སེང་གེ། གླིང་གི་སེང་ཆེན་རྒྱལ་པོའི་སྤྱན་སྔར་ཧོར་གྱི་བླ་མ་འོད་དཀར། དེ་རྗེས་སྐྱེ་ཕྲེང་རིམ་པར་བརྒྱུད་དེ་ནད་མུག་མཚོན་གསུམ་གྱི་བདག་པོ་ཆེན་པོར་ གྱུར་ཞིང་འཛམ་གླིང་སེམས་ཅན་ཀུན་གྱི་སྲོག་བདག་རྒྱལ་པོར་གྱུར། དུས་ཕྱིས་བོན་གྱི་གདན་ས་གོང་མ་ྋདཔལ་ལྡན་སྨན་རིའི་མཁན་རབས་ཉེར་གཉིས་པ་སྐུ་ མདུན་ཤེས་རབ་དགོངས་རྒྱལ་གྱིས་བཀའ་དམ་དུ་བཅུག  དེ་རྗེས་བོན་གྱི་གདན་ས་འོག་མ་རབ་ལེགས་གཡུང་དྲུང་གླིང་དུ་སྐྱབས་མགོན་ཟླ་བ་ རྒྱལ་མཚན་མཆོག་ནས་བཀའ་སྲུང་གི་གྲལ་དུ་བཞེས། དེ་ནས་སྐྱབས་མགོན་མཆོག་གིས་དོན་ཆེད་དུ་མ་ལ་གཟིགས་ཏེ་ཁྱུང་པོ་སྟེང་ཆེན་དགོན་ གྱི་སྒེར་སྲུང་དུ་མངགས་པར་མཛད་ནས་བོན་བསྟན་སྲུང་བའི་དམ་བཅས་པའོ། །

དེ་བཞིན་གོང་ཞུས་ལྟར་ཡུལ་ལུང་དང་དགོན་གནས་བྱེ་བྲག་པའི་སྒེར་སྲུང་དང་སྔོན་ བྱོན་སྐྱེན་ཆེན་རྣམས་པས་བཀའ་འོག་ཏུ་བཞག་པའི་བསྟན་སྲུང་ཡུལ་རི་གཞི་བདག་མཐུ་ སྟོབས་ཅན་དེ་འདྲའང་ཡོད་ཀྱང་། ད་ལན་བོན་པོ་ཡོངས་ཀྱིས་མཆོད་ཅིང་བསྐུལ་བའི་བསྟན་སྲུང་གཙོ་བོ་རྣམས་ཀྱི་བྱུང་ རབས་ལོ་རྒྱུས་འདི་དག་(གཡུང་དྲུང་བོན་གྱི་དྲ་རྒྱ་)ལས་བཏུས་ཏེ་སྟབས་བདེར་ བཀོད་ཡོད། །

 
 
Re:བོན་གྱི་སྲུང་མ་རྣམས་ཀྱི་ངོ་སྤྲོད་དང་བྱུང་རབས།
[ 2014-11-20 13:15:06 | By: སྐུ་མགྲོན་G30Nf6(སྐུ་མགྲོན) ]
 
སྐུ་མགྲོན་G30Nf6(སྐུ་མགྲོན)བཀའ་དྲིན་ཆེ་ཨ་ཀྲོང་ལགས།ད་དུང་ཡེ་ཤེས་དབལ་མོ་དང་ རྨ་ཆེན་པོམ་ར་ སྒྲ་བླའི་རྒྱལ་མོ་ དགྲ་ལྷ་ལམ་ལྷ།རྒྱལ་པོ་ཤེལ་ཁྲབ་ཅན་སོགས་ཁ་ཤས་བཀོད་ན་ཡག་པོ་འདུག གཙང་ཚས་བསམ་ཚུལ་ཙམ་ཡིན།
 
 
Re:བོན་གྱི་སྲུང་མ་རྣམས་ཀྱི་ངོ་སྤྲོད་དང་བྱུང་རབས།
[ 2014-12-22 10:30:50 | By: སྐུ་མགྲོན་0g8JBn(སྐུ་མགྲོན) ]
 
སྐུ་མགྲོན་0g8JBn(སྐུ་མགྲོན)གྲགས་སེང་སྐྱེ་བ་གོང་མའི་གཤེན་ཆུང་གོ་བོ་དང་།
སྟོན་པའི་སྐུ་དུས་སུ་གཤེན་ཆུང་གོ་བོ་གཉིས་ཁ་ཁར་ཡིན་གསུངས་བཞག་པ་ཞིག་ཡོད་འདུག་དེའི་བར་ཁྱེད་ལ་དགོངས་ཚུལ་ད་ལྟ་འདི་དང་མཐུན་མི་མཐུན་ཡོད་དམ།
 
 
Re:བོན་གྱི་སྲུང་མ་རྣམས་ཀྱི་ངོ་སྤྲོད་དང་བྱུང་རབས།
[ 2014-12-27 04:37:58 | By: སྐུ་མགྲོན་I41Ph7(སྐུ་མགྲོན) ]
 
སྐུ་མགྲོན་I41Ph7(སྐུ་མགྲོན)སྤྱིར་སྟངས་སྲུང་མའི་སྐོར་ལ་འདི་ལྟར་བྲིས་པ་ཡག་པོ་ལོས་ཡིན། ཡིན་ནའང་རང་ས་རང་ཡུལ་གྱི་ལོ་རྒྱུས་ལྡན་པའི་བོན་པོ་ཚང་གི་ཞང་བོད་སྲིད་པའི་ལྷ་རིགས་དེ་ཚོ་མང་ཆེ་བ་འདིར་བཀོད་མི་འདུག་པས་རྒྱུ་མཚན་གང་ལ་ཐུག་པ་ཡིན་ནམ།
 
 
དཔྱད་གཏམ་སྤེལ་བ།
སྒྲིག་འཇུག...
Powered by Oblog.