སེམས་ལ་ན་ཟུག་ཞིག་གཏོང་གི་འདུག

ལྷོ་རྒྱལ་འཛམ་བུ་གླིང་གི །

མ་རིག་མུན་པ་སེལ་མཁན། །

ལམ་སྟོན་གསལ་བའི་སྒྲོན་མེ། །

གློ་བུར་གཟིམ་ལ་ཕེབས་སོང་། །

འགྲོ་དྲུག་སེམས་ཅན་ཡོང་གི །
དྲིན་ཅན་ཕ་ལོ་མ་ལོ། །
ཁྱེད་རང་གློ་བུར་བྱོན་ཐལ། །
བདག་མེད་དྭ་ཕྲུག་ལུས་སོང་། །

འགྲོ་བ་མི་ཡི་བསོད་བསྐལ། །
གློ་བུར་བ་མོས་བཅོམ་སོང་། །
སྡུག་བསྔལ་མུན་པ་འཁྲིག་སོང་།
ཡ་ཆུང་སྡུག་གི་ཁེངས་ཡོད། །

བོན་ཆོས་རེས་མེད་སྐྱོང་མཁན། །
བསྟན་པའི་གསེར་གྱི་སྲོག་ཤིང་། །
གློ་བུར་གས་ཆགས་ཤོར་དུས། །
དབང་མེད་མིག་ཆུ་ཟག་སོང་། །

རང་ཡུལ་ཁྱུང་པོའི་ཉི་ཟླ། །
ནུབ་རིའི་འཕགས་ལ་ཡོལ་སོང་། །
རང་ཡུལ་ཁྱུང་པོའི་ལུང་པ། །
མུན་པའི་ཁོ་ནས་གཡོག་སོང་། །

སེམས་ཀྱི་ཉི་ཟླ་ཆ་འགྲིག། །
འགྲོ་དྲུག་སེམས་ཅན་དོན་དུ། །
མྱུར་དུ་འཆར་བའི་སྨོན་ལམ། །
ཡང་ནས་ཡང་དུ་ཞུས་ཡོད།

2014/2/15 ཉིན་སྤེལ།