དྲུག་པ།

དྲུག་པ་བྲུ་སྟོན་བསོད་རྒྱལ་ཞེས། །མ་འོངས་ལུང་གིས་ཟིན་ཚུལ་ནི། །སྲིད་པ་རྒྱུད་ཀྱི་ཁ་བྱང་ལས། །ཚེ་དབང་རིག་འཛིན་བྱིན་རླབས་ལ། །བྲུ་སྟོན་བསོད་ནམས་རྒྱལ་བའི་མཚན། །འཕྲིན་ལས་བཞི་ཡིས་འགྲོ་བ་འདྲེན། །ཞེས་སོགས་གསུངས་པ་བཞིན་བླ་ཆེན་འདི་ནི་ས་ཐོབ་ཀྱི་གཡུང་དྲུང་སེམས་དཔའ་ཆེན་པོ་འགྲོ་དོན་དུ་དགོངས་ནས་བྱོན་པ་ཉིད་ཡིན་ལ། ཁོང་ནི་བྲུ་ཤ་འདུལ་བ་གཡུང་དྲུང་གི་སྲས་སུ་འཁྲུངས་ཤིང་། བྲུ་རྒྱལ་བ་གཡུང་དྲུང་དང་། བྲུ་ཤ་ནམ་མཁའ་འོད་ཟེར་སོགས་ཀྱི་ཞབས་ལ་གསང་བ་བསེན་ཐུབ། གབ་པ་སོགས་ཕྱི་ནང་གསང་བའི་བོན་སྡེ་ལ་སྒྲོ་འདོགས་བཅད་ཅིང་། དག་པའི་རི་ལ་གཅིག་པུར་བཞུགས་ཏེ་མི་དང་འབྲེལ་བ་བཅད་ནས། རྩེ་གཅིག་ཡེངས་པ་མེད་པར་སྒོམ་སྒྲུབ་མཐར་ཕྱིན་མཛད་པས། རང་བྱང་ཡེ་ཤེས་ལྷག་གེར་ཤར། ཀུན་ཏུ་བཟང་པོའི་ཞལ་མངོན་དུ་གཟིགས་པ། ནམ་མཁར་གོམ་པ་བོར་བ། སྣང་སྲིད་ས་ལེར་དུས་གཅིག་ཏུ་གཟིགས་པ། དཀར་ཕྱོགས་ལྷ་ཀླུས་ཞབས་ཏོག་བསྒྲུབ་པ། ནག་ཕྱོགས་འབྱུང་བོ་ཟིལ་གྱིས་གནོན་པ། སྐུ་ལུས་སུམ་སྣང་དུ་མཛད་ནས་མ་དག་ཐམས་ཅད་ཐབས་དང་ཐུགས་རྗེས་འདུལ་བ་སོགས་བློ་ཡིས་མི་དཔོག་ཅིང་བརྗོད་ཡུལ་ལས་འདས་པའི་རྫུ་འཕྲུལ་དང་གྲུབ་པའི་གོ་འཕང་བརྙེས་པ། བསྟན་དང་འགྲོ་བར་བཀའ་དྲིན་བླ་ན་མ་མཆིས་པ་ལགས།

བདུན་པ།

བདུན་པ་ནང་སྔགས་ལུགས་ལྟར་ན་ཤེས་རབ་ལྷ་མཆོག་སྨྲ་བའི་སེང་གེ་མཆོག་ནི་རིགས་ཀྱི་བདག་པོ་དངོས་ཡིན་ཞིང་། སྐྱེས་རབས་ཀྱི་རིམ་པ་ནི། ལྷ་ཀླུ་མི་ཡུལ་དུ་སུམ་སྣང་གི་སྤྲུལ་བ་མཛད་པ། རྒྱལ་མཁར་བ་ཆོད་གནས་མཆོག་ན། །རྒྱལ་གཤེན་མི་ལུས་བསམ་ལེགས་ཞེས། །མི་རྗེ་ཁྲི་རྒྱལ་འོད་ཀྱི་སྲས་སུ་སྐུ་འཁྲུངས་ནས་མི་ལུས་ལྷའི་ཡུལ་དུ་ཕེབས་ཏེ། ཡུམ་སྲས་གཤེན་གསུམ་དང་སྟག་ལྷ་དང་ལྷ་བོན་ལོ་དྲང་སྲོང་རྒྱལ་བ་སོགས་ལ་བསྟེན་ནས། གསང་སྔགས་རྒྱུད་གསུམ་དང་ཐེག་རྩེའི་ལུང་ཞུས་ཏེ་རྒྱ་མཁར་མཆོད་དུ་སྒྲུབ་པས། གྲུབ་པའི་རྟགས་སུ་མཁའ་འགྲོ་ཀྱེ་མ་འོད་མཚོའི་ཞལ་གཟིགས་ཤིང་། དགུན་ཁར་མེ་ཏོག་གི་ཆར་བབས་པ། འཇའ་འོད་ཀྱི་གུར་ཕུབ། རྒྱ་མཚོའི་གཏིང་དུ་མཆོད་རྟེན་བརྕིགས་པ་སོགས་ངོ་མཚར་དུ་མ་དང་ལྡན་ལ། མགོ་ནག་མིའི་ཡུལ་དུ་བོན་འཁོར་ལོ་རྒྱ་ཆེར་བསྐོར་བར་མཛད་དོ། །གཉིས་པ་ཆུ་མིག་བརྒྱད་བཅུའི་དབུས། །ཤེལ་གུར་དཀར་པོའི་ནང་ཤེད་ན། །ཀླུ་བོན་ཡེ་ཤེས་སྙིང་པོ་ཞེས། །བྲམ་ཟེ་མཛས་ལྡན་དང་།  ཡུམ་བཟང་ཟ་དང་། གསང་བ་འདུས་པ། སྟག་ལྷ་སོགས་མིའི་གཤེན་པོ་རྣམས་ལས་གསས་མཁར་རིན་པོ་ཆེ་སྤྱི་སྤུངས་ཀྱི་མན་ངག་ཞུས་ཤིང་བསྒྲུབས་པ་དང་། ངེས་དོན་སོགས་དཔྱིས་ཕྱིན་པ་སྒོམ་པས་གྲུབ་པའི་གོ་འཕང་མཐོན་པོར་བརྙེས་ཏེ། གྲུབ་རྟགས་སུ་ནམ་མཁའ་ལས་མེ་ཏོག་གི་ཆར་བབས་ཤིང་། སྐུ་ལུས་འོད་ཟེར་དུ་སྤྲུལ་བ་སོགས་མཚར་བའི་ལྟས་དུ་མ་དང་ལྡན་པ། ཀླུ་རྣམས་དབང་དུ་བསྡུས་ནས་ཀླུ་ཡུལ་དུ་གཡུང་དྲུང་བོན་གྱི་འཁོར་ལོ་མཐའ་ཡས་པ་བསྐོར་བར་མཛད་དོ། །རི་རྒྱལ་ལྷུན་པོའི་རྩེ་མོ་ཡི། །གསེར་མཁར་མཛེས་པའི་དབུས་དཀྱིལ་དུ། །ནམ་མཁའ་སྣང་བ་མདོག་ཅན་ཞེས། །ཡབ་ལྷ་རྒྱལ་བ་རབ་འོད་དཀར་རྗེ་བྱ་དང་། ཡུམ་ཕྱི་ལྕམ་ཁྲི་ནི་ཏིང་བཙུན་གཉིས་ཀྱི་སྲས་སུ་མཚན་ལྟས་བཟང་པོ་དང་བཅས་ཏེ་སྐུ་བལྟམས། དེ་ལ་འཆི་མེད་ཡུམ་སྲས་གཤེན་གསུམ་དང་། ལྷ་ཀླུ་མི་ཡི་གཤེན་པོ་རྣམས་བསྟེན་ནས། སྔགས་ཕྱོགས་ཀྱི་ལུང་མ་ལུས་པར་གསན། རི་རྒྱལ་ལྷུན་པོ་རུ་སྒྲུབ་པས་གྲུབ་པའི་གོ་འཕང་ཐོབ་སྟེ། མུ་སྟེགས་པ་ཚར་ཐག་བཅད་པ་དང་། བོད་ཡུལ་དུ་བསྟན་པ་སྤེལ་བར་དགོངས་ནས་ལྷ་རི་གྱང་ཐོར་བབས། བོད་རྒྱ་ཐོག་མ་གཉའ་ཁྲི་བཙད་པོའི་དབུ་བླར་མཛད་དེ་བོད་ལ་ཐམས་ཅད་དབང་དུ་བསྡུས། གྲུབ་རྟགས་སུ་ལྷ་རྣམས་ཀྱིས་མཆོད་བཀུར་བྱེད་ཅིང་གསོལ་ཟས་འདྲེན་པ། མེ་ཏོག་གི་ཆར་འབེབས་པ་སོགས་ངོ་མཚར་གྱི་ལྟས་དུ་མ་དང་ལྡན་ལ་རྒྱལ་གཤེན་བསྟན་པ་ཉམས་གསོ་མཛད་ནས་འགྲོ་ཁམས་བདེ་བར་བཀོད་པ་ལགས།