༑༑༑ རང་ལོ་ཉེར་དགུ་པ། ༢༠༠༠ལྕགས་འབྲུག་ལོའི་བོད་ཟླ་དང་པོའི་ནང་ཡབ་དམ་པའི་ཞེ་དགུ་གྲོལ་མཚམས་གཅེན་པོ། ཡར་རི་ཁྲོད་དུ་ཕེབས་ཏེ། གདུང་རུས་དང་གདུང་ཐལ་ཚང་མ། སཙྪཱ་གདབ་ནས་དབལ་མོ་འབྲོང་རིའི་རྩེར། བྲག་ཕུག་ཏུ་བཞུགས་སུ་གསོལ། དེ་མཚམས་དཔྱིད་ཀར་ཕྲན་གྱིས། གཅེན་པོ་ལ། གསོལ་བ་བཏབ་པའི་ངོར། བཀའ་འགྱུར་དང་བརྟེན་འགྱུར། བཞན་ཡི་གེ་ཁ་ཐོར་སྤར་མ་པོད་གྲངས། ཉིས་བརྒྱ་ལྷག་གི་དཀར་ཆག་དང་མཛད་བྱང་། ལེའུ་གྲངས་རྩིས་རྒྱ་བཅས་མཛད་དོ།  དེའི་སྔ་རྗེས་སུ། འགོ་ཁྲིད་རྣམ་རྒྱལ་དང་གཤོང་བསོད་ནམ། དགོན་པའི་འགན་ཁུར་མཐའ་ཞུ་བླ་མ། གཡུང་དྲུང་གྲགས་པ། ཚུལ་ཁྲིམས་ཉི་མ། དབུ་མཛད་ཡེ་ཤེས་རབ་གསལ། ཕྲན་རང་བཅས་ཀྱི་དགོན་པའི། དབུ་བླ་མཛད་རོགས་ཞེས། ཨུ་ཚུགས་ཀྱི་རེ་འདུན་ཞུས་པས་ངོར། ཞལ་བཞེས་གནང་བ་དང་། ཟླ་བ་བཞི་པའི་ཚེས་བཅུ་གསུམ་ཉིན། ཡུལ་དགོན་ཚང་མས་ ཁྱུང་ནག་དགོན་བསམ་གཏན་་གླིང་དུ། གདན་དྲངས་ཏེ། དགོན་པའི་དབུ་བླར་མངའ་གསོལ་དང་། ཁྲི་འདོན་སོགས་རྟེན་འབྲེལ་ཟབ་རྒྱས་བྱས་པ་དང་། འཇའ་ལུས་ཤར་རྫ་པའི། འདས་མཆོད་ཉིན་བཞི་ཚོགས་གནང་མཛད། སྐབས་དེར་ཁོང་གིས་བཀའ་སློབ་གསུང་དོན། ཁྱེད་བླ་མ་མཁན་སློབས། རྟོགས་ལྡན་གྲྭ་བཙུན་རྣམ་པས། རང་ཁྲིམས་རང་གི་བསྡོམ་སྟེ། སངས་རྒྱས་བསྟན་པའི་རྐང་འཛིན་ནས། གཞན་གྱི་མིག་ལྟོས་ངན་པའི། དབང་དུ་མ་ཤོར་བ་མཛད་རོགས་ཞེས། ངའི་རེ་བ་ཡིན། སངས་རྒྱས་ཀྱི་བསྟན་པ་ནི་ཚུལ་ཁྲིམས་ཡིན། ཚུལ་ཁྲིམས་ནི་དགེ་འདུན་གྱི་སྡེ་ལ་རགས་ལས་པའི། ཁྱེད་འགྲོ་འདྲེན་ལ་རེ་བ་རྣམ་པའི་དབུ་ཁྲིད་དེ། དགོན་པར་བཞུགས་ནས། ཡང་དག་ཐར་པའི་ལམ་མ་ནོར་བ། བཤད་སྒྲུབ་སྒོམ་གསུམ་དང་། འཆད་རྩོད་རྩོམ་གསུམ་གྱི་སྒོ་ནས། འགྲོ་རྣམས་ཐར་པའི་ལམ་ལ་བཀྲི་ནས། བསྟན་པ་འཛིན་སྐྱོང་སྤེལ་གསུམ་མཛད་དགོས་པ་ལས། བོན་ལ་སྦྱང་བརྩོན་བྱས་པ་ཚང་མ། སྤྱོད་ཡུལ་གྲོང་དུ་མཛད། མི་ཚེ་དཀོར་ནག་ལ་འབག་ན། འདི་ཕྱིའི་དོན་གང་ཡང་མི་འགྲུབ་པས། ཅིས་ཀྱང་མི་མཛད་རོགས་གྱིས། ཁ་རྒྱབ་གཉིས་ནི་ཉམ་ཆུང་བྱིའུས་ཀྱང་སོས་པས། ཁྱེད་འགྲོ་འདྲེན་ལ་རེ་བ་རྣམ་པས། དུས་རྒྱུན་བཞུགས་ས་དགོན་པར་མཛད་དེ། སངས་རྒྱས་བསྟན་པའི་ཆེད་དུ། བཤད་སྒྲུབ་ཀྱི་སྲོལ་ཚུགས་ཐུབ་མཛད་ནས། ཡུལ་སྡེ་དང་སྦྱིན་བདག་རྣམ་པའི། རེ་ལྟོས་མ་ཤོར་བ་རེ་བ་ཆེ། ཞེས་དང༌། སྤྱིར་ལྷ་སྐུ་གསེར་གདུང་ལས་སོགས། དད་རྟེན་བཞེངས་དགོས་ཀྱང༌། སྙིགས་དུས་འདིར། ཡུལ་དུས་ཀྱི་འཕོ་འགྱུར་ཆེ་བས། གཙོ་བོ་ནི་བཤད་སྒྲུབ་ཀྱི། བསྟན་པ་ཚུགས་ཐབས་མཛད་ནས། མ་འོངས་གཞོན་ནུ་གྲྭ་བཙུན་ཡར་ཚར་རིགས་ལ། ཐོས་བསམ་ཡོན་ཏན་ལྡན་པ་བྱ་རྒྱུ་དེ། གལ་ཤིན་ཏུ་ཆེ་བར་མཐོང་ངོ༌། ཞེས་ཡང་ཡང་གདམས་པ་མཛད་དོ། དེ་སྐབས་འགོ་ཁྲིད་རྣམ་པས། གཅེན་པོ་དགོན་པའི་འདུ་ཁང་ནང་། བཞུགས་རོགས་ཞུས་པས། བཞུགས་རྒྱུ་ཞལ་བཞེས་གནང་སྟེ། བཞུགས་འཆར་མཛད་ཀྱང་། དགོན་པའི་འགན་འཛིན་པ་བསམ་དགེའི། ད་ལོ་དགོན་པའི་ཁང་པ། མཛོད་ཁ་ཞབས་དྲུག་བརྒྱབ།  བཞུགས་ས་ཁང་པ་ཐོན་་ཚར་བ་དང་། བླ་མ་དགོན་པར་བཞུགས་རོགས་ཞུ་རྒྱུའི། འཆར་གཞི་ཡོད་ལུགས་ཞུས་པས། དེར་གཅེན་པོ་གཟི་ཀིས་ལ་ཡར་ཕེབས་ཏེ། སྔར་ལྟར་ཉིན་མཚན་བར་མེད་པར། དགེ་སྦྱོར་ཆུ་བོའི་རྒྱུན་ལྟར། སྒྲུབ་བཞིན་བཞུགས། ལོ་དེའི་བོད་ཟླ་ལྔ་པའི་ཚེས་༡༥་ཉིན། གཟི་ཀིས་རི་ཁྲོད་དུ། ཚེ་སྒྲུབ་ཀྱི་དབང་གནང་བས། དར་དང་སྒོར་སྟོང་ཕྲག་ཁ་ཤས་བྱུང་བ། དགོན་པར་ཕུལ་བ་དང་། དད་ལྡན་སྦྱིན་བདག་རྣམས་ཀྱིས་ཕུལ་བས། ཟང་ཟིང་དང་དངུལ་སོགས། རྒྱུ་ནོར་གང་ཡོད་གཏོང་མཛད་པ་དང་། ཕྲན་ནས་ཀྱང་དངུལ་བརྒྱ་ཕྲག་ཁ་ཤས་བཏང་སྟེ། ཇོ་འབུམ་བརྒྱ་དང་བརྒྱད་ཅུ་བསླུས་ཏེ། འཁོར་ཆེན་གཉིས་བཞེང་རྩིས་མཛད། བཀྲི་བྱེད་རས་དཀར་སྤྱི་ཁྲེ་བཞི་བརྒྱ་ལ། ཡིག་བརྒྱ་པར་གདབ་པ་དང་གཡག་ཀོ། སྲོག་ཤིང་ལྕགས་མདའ་སྦུ་གུ་སོགས། ཆ་ཚང་གྲབ་ཚགས་སུ་ཚུད་པར་མཛད་ནས། ལོ་དེའི་སྟོན་ཁར་གཅུང་པོ་འོད་རྒྱས་ཚུར་འཁོར་མཚམས། དགོན་པར་འཁོར་ཆེན་འདི་གཉིས། འཛུགས་ཐུབ་པ་བྱེད་དགོས་གསུང་འདུག་ ཕྲན་ཧོར་ཟླ་བཞི་པའི་ཚེས་༢༡ཉིན། ལྷ་སར་ཕྱིན་ནས་རྩེ་ཕོ་བྲང་པོ་ཏ་ལ་དང་། ར་མོ་ཆེའི་ལྷ་ཁང་། སེ་འབྲས་དགའ་གསུམ་བཀྲ་ཤིས་ལྷུན་པོ་བཅས་ལ། མཆོད་ཐིགས་བརྒྱབ། གཡུང་དྲུང་གླིང་དང༌། སྨན་རི། གཤེན་ཚང༌། ཞུ་ཚང༌། རྨེའུ་ཚང་བཅས་ལ་བསྔོ་འབྲེལ་ཕུལ་ལ་སོང་ནས། ཧོར་ཟླ་ལྔ་པའི་ཚེས་ལྔ་ཉིན།  ལྷ་སར་འབྱོར་བས་དེར། ལུང་དཀར་དགོན་པའི་གྲྭ་པ། སྔར་སྟོབས་ཀྱི་རྒྱལ་པོའི་ཞབས་ཕྱི། རང་གི་མཆེད་གྲོགས། གྲྭ་ཚུལ་ཁྲིམས་ཟེར་བ་དང་། འཕྲད་པའི་དེ་དང་མཉམས་དུ། རག་ཤི་རྟོགས་ལྡན་རིན་པོ་ཆེ་མཇལ་དུ་སོང་ནས། དེར་ཟླ་བ་གཅིག་ལྷག་བསྡད་དེ་བོན་ཞུས། དེ་ནས་ཕུར་ནག་དགོན་དུ་སོང་ནས། ཕུར་ནག་དགོན་པའི་བླ་མ། རྨེའུ་བསྟན་རྒྱལ་དྲུང་ནས། གེ་ཁོད་གཞུང་སོགས། གེ་ཁོད་ལས་མཐའ་ཆབ་ཚང་གི་ལུང་དང་། གེ་ཁོད་དབང་བཅས་ཞུས་ཏེ། ཧོར་ཟླ་བརྒྱད་པའི་ཚེས་ཉི་ཤུ་ལྔ་བར། གེ་ཁོད་བསྙེན་སྒྲུབ་བྱས། ཕུར་ནག་དགོན་པར་ལོ་ལྟར་རེ་བཞིན། ལོ་ཡར་གེ་ཁོད་དབལ་ཆུ་བཀོལ། ལོ་ཡར་གེ་ཁོད། སྦྱིན་བསྲེགས་བླུག་སྲོལ་ཡོད་འདུག་པའི། སྔ་ལོ་དབལ་ཆུ་བཀོལ་བས། འདི་ལོ་སྦྱིན་བསྲེགས་བླུག་འཆར་འདུག་ཀྱང་། ཕྲན་གྱིས་དབལ་ཆུ་བཀོལ་རྒྱུའི། རེ་བ་བཏོན་པ་ལྟར། དབལ་ཆུ་བཀོལ་སྐབས། ཕྲན་གྱི་དབལ་ཆུའི་ཛྭ་ཁྲིད་ཐོབ།   དེ་མཚམས་རང་ཡུལ་དུ་འཁོར་སྐབས། གཟི་ཀིས་རི་ཁྲོད་དུ། མཚམས་པ་ཤེས་རབ་ཚུལ་ཁྲིམས་དང་༎ ཨ་མཚོ་རྣམ་རྒྱལ་སོགས་ཀྱི། གཅེན་པོར་དབྱིངས་རིག་མཛོད་ཀྱི་ཁྲིད་ཞུས་ཏེ། སྟོད་ཆ་ཁྲིད་ཚར་ཞིང་། སྨད་ཆ་ཁྲིད་བཞིན་འདུག་པས། ཕྲན་གྱིས་ཀྱང་མཉམ་དུ་ཉན། འཇུག་ཏུ་བདེར་འདུས་དང་སྐུ་གསུམ་རང་ཤར་གྱི། སྒོ་ནས་དབང་བཞི་གནང་བ་ཐོབ། དེ་སྐབས་སྨན་པ་རྣམ་རྒྱལ་དྲུང་ནས། གེ་ཁོད་ཀྱི་ལུང་ཆབ་ཚང་ཐོབ། དེ་མཚམས་གཅེན་པོ་ཚུལ་ཡེ་དང་། ཚ་བུ་ཉི་མ་འོད་ཟེར་དང་མི་ནུབ། གྲྭ་བཙུན་དཔལ་ལྷ་ཕྲན་རང་བཅས་ཀྱི། གཟི་ཀིས་དུ་གེ་ཁོད་ཟླ་བ་གསུམ་སྒྲུབ་སྟེ། གཅེན་པོ་ཚུལ་ཡེ་དང་། མཚམས་པ་ཤེས་རབ་ཚུལ་ཁྲིམས་ཕྲན་བཅས་ཀྱི། དབལ་ཆུ་བཀོལ་དེ་སྐབས། ཤེས་རབ་ཚུལ་ཁྲིམས་དྲུང་ནས། གེ་ཁོད་ཀྱི་ལུང་ཆབ་ཚང་ཐོབ། དེ་མཚམས་འཁོར་ཆེན་དེ་གཉིས། འཛུགས་ཆོག་ཆོག་གི་ གྲ་བསྒྲིགས་ཐོན་མཚམས།  རང་དགོན་བསམ་གཏན་གླིང་དུ། འཛུགས་པར་དགོངས་ནས། དགོན་པའི་ཀྲུའུ་རིན་གཞོན་པ་བསམ་དགེ་ལ། གཅེན་པོ་ཚུལ་ཡེ་མཆོག་གིས། ངས་ཤི་གསོན་གྱི་དཀོར་ཟས་འདི་དག་གིས། འཁོར་ཆེན་གཉིས་བཞེངས་ཡོད་པ་འདི། ནག་རུ་དགོན་པར་འཛུགས་ནས། འཁོར་ལོ་བསྐོར་མཁན་ལ་འཚོ་བ་དང་། ལྕི་ཤིང་སོགས་ངས་བཏང་འཆར་ཡོད་གསུང་པས། དེ་སྐབས་འགན་འཛིན་བསམ་དགེ་ཡིས། འཁོར་ཆེན་འཛུགས་སའི་ཁང་པ་མེད་གསུང་། གཅེན་པོ་ནས་འཁོར་ཆེན་འཛུགས་སའི་ཁང་པ། ཕྲན་གྱི་རྒྱབ་འོང་གསུང་པས། བསམ་དགེས་དགོན་པ་ཡོད་ས་འདིར། འཁོར་ཆེན་ཁང་རྒྱབ་ན། བསམ་བསམ་གྱི་ས་ཆ་མི་གདའ། གལ་སྲིད་ས་ཆ་ཐབས་ཆག་ཞིག་ཡོད་ནའང་། གྲྭ་པ་ཚོའི་ས་ཆ་མང་ཆེ་བ། གྲྭ་ཤག་རྒྱབ་ས། ས་ཆ་བདག་པོ་རྒྱབ་ཚར་འདུག་ཟེར་བས། ངས་ས་ཆ་གྲྭ་པའི་བདག་ཡོད་ན། ངས་རེ་འདུན་རྒྱབ་ནས་ས་ཆ་ལོན་ཐབས་བྱེད་ཆོག་ལབ་པས། བསམ་དགེ་ནས་དགོན་པའི་ཉེ་བསྐོར་འདིར། འཁོར་ཆེན་ཁང་ཞིག་རྒྱབ་ཆོག་མིན་མི་ཤེས་པས། རྫོང་ཆོས་དོན་ཅུས་ལ་ཞུ་དགོས་རྒྱུ་རེད་ཟེར། གཅེན་པོའི་དེ་འདྲ་ཡིན་ན། འདི་ནས་འཁོར་ཆེན་ཁང་པ་ལས་རྒྱུ་ལ། དགོན་པའི་མོས་མཐུན་ཡི་གེ་ཞིག་ཁྱེད་ཀྱི་འབྲི་རོགས། དེ་ནས་ཆོས་དོན་ལས་ཁང་ལ། ཞུ་ཆོག་གསུང་སོང་བས། བསམ་དགེའི། ཡ་འོ་ཟེར་མ་སོང་ལ། མིན་ཟེར་མ་སོང་ལ།   འདི་གྱིས་དེ་གྱིས་ཀྱི། ལེན་མ་ཕུལ་བར་བསྐྱུར་སོང་།  དེར་གཅེན་པོའི་ཕྲན་ཆོས་དོན་ལས་ཁང་ལ། སོང་ནས་ཆོག་མཆན་ཞུས་ཤོག་གསུང་བྱུང་བས། དེ་ནས་ཕྲན་རྫོང་ཆོས་དོན་ལས་ཁུང་ལ་སོང་ནས།  དེ་སྐབས་འཐབ་ཕྱོགས་གཅིག་འགྱུར་པུའུ་ཡི་པུ་ཀྲང་། ནག་རུ་རིན་ཆེན་དབང་གྲགས་ལ་ཞུས་པས། རིན་ཆེན་དབང་གྲགས་ཀྱིས། ད་ལྟ་དགོན་པའི་ཀྲུའུ་རིན་རྒན་པ། ཞིང་ལ་ཕེབས་ཚར་བས། ཀྲུའུ་རིན་གཞོན་པ། བསམ་དགེའི་མོས་མཐུན་མ་བྱས་ན། འདི་ནས་ཆོག་མཆན། གནང་ཆོག་མ་རེད་གསུང་། གང་ལྟར་དགོན་པར། འཁོར་ཆེན་འཛུག་མ་བཅོལ་བར། གནས་སྐབས་ལུས་སོང་བ་དང་། གཅེན་པོ་ཚུལ་ཡེ་མཆོག་ལ། སྡེ་དང་འགོ་ཁྲིད་གྲྭ་མང་ཚོགས་བཅས་ཀྱི། དགོན་པར་བཞུགས་རྒྱུའི་རེ་འདུན་ཆེ་བས།  དགོན་པའི་འགན་ཁུར་ཚོའི། ཁ་ཡི་དགོན་པར་བཞུགས་རོགས། མ་ཞུས་ཐབས་མེད་བྱུང་བ་ལས། དོན་དུ་དགོན་པར་བཞུགས་སའི། ཁང་པ་མེད་པར་ཁ་གཡར་ཏེ། དགོན་པར་བཞུགས་མ་བཅོལ་བར་འགོར་འགྱང་དང་། བཀག་འགོག་བྱས་སོང་།   ༑༑༑ རང་ལོ་སུམ་ཅུ་པ། ༢༠༠༡ལྕགས་སྦྲུལ་ལོར། ཕྲན་ནི་དགོན་པའི་འགན་ཁུར་ཚོའི། ལས་འགན་དང་སྡོད་ས་སོགས། བཀོད་བསྒྲིགས་གང་ཡང་མ་བྱས་པས། དགོན་པར་ཞབས་ཞུ་སྒྲུབ་མ་ཐུབ་པར། གྲོང་པར་སྐུ་རིམ་ཞབས་བརྟེན་དང་། ཤི་དགེ་གསོན་དགེའི་དཀོར་རྗེས་སུ་སོང་བ་དང་། བར་བར་ཁོམ་སྐབས་སུ། གཅེན་པོའི་དྲུང་དུ་གཟི་ཀིས་རི་ཁྲོད་ལ་བསྡད། དེའི་བསྐོར་གཅེན་པོ་མཐའ་ཞུ་བླ་མ་ཚུལ་ཁྲིམས་ཡེ་ཤེས་མདུན་ནས། གསང་སྔགས་རྣམ་བཤད། ལྷ་གཉེན་ཤེལ་སྒོང་དང་ཟུར་རྒྱན་གྱི་ཁྲིད། ཨ་ཁྲིད་ཐུན་མཚམས་བཅོ་ལྔ་པའི་ཁྲིད།  བྱང་སེམས་བརྒྱ་རྩ་པ་དང་ལྔ་བཅུ་པའི་ཁྲིད་དང་། བྱང་ཆུབ་སེམས་དཔའི་སྡོམ་པ་བཅས་ཐོབ། མིང་གཞན་ཕན་བདེ་ཆེན་སྙིང་པོ་ཡེ་ཤེས་རང་གྲོལ་རྩལ་ཞེས་གནང་།  ལོ་དེའི་སྤྱི་ཟླ་དྲུག་པར། དགོན་པའི་བླ་གྲྭ་མཁན་སློབ་རྣམས་ལས། དབུ་མཛད་ཡས་རབ་སོགས། ཁག་གཅིག་ནི། ཁང་མཁན་བྱེད་པ། ཤིང་གཞོག་པ། ཤིང་ཚོན་བཏང་བ་སོགས་སོ་སོ་སྒེར་གྱི། ཡོངས་འབེབས། བསགས་པས་ལས་ལ་བྲེལ། འགའ་ཞིག་ནི་གསོན་གྱི། དབྱར་རིམ་སྟོན་རིམ་དང་། ཞེ་དགུ་སོགས་ཡོན་བདག་གི་ ངོ་སྲུང་བས་ལས་ལ་བྲེལ། མཁན་པོ་བསམ་དགེ་དང་། གྲྭ་མི་འགྱུར། ཀུན་དགའ། ཉི་མ། དཔལ་ལྷ། སྨོན་ལམ། གཡུ་ལྷ་སོགས། འགའ་ཞིག་ནི། མཁན་པོ་བསམ་དགེའི་ཁྱིམ་གྱི་ཟུར་དུ། གུར་ཕུབ་ནས་དེར་བཞུགས་ཏེ། ཆང་བཙོས། སྦུ་རག་དང་། ཤ་སོགས་ཉོས་ནས། དགའ་སྤྲོ་བཏང་བཞིན་བཞུགས་བསྡད་པས། དགོན་པར་བླ་གྲྭ་བཞུགས་མཁན་མེད་པས། ག་དུས་འགྱེལ་བ་མ་ཤེས་པར། དགོན་པའི་འདུ་ཁང་ཕུག་གི་གྱང་འགྱེལ།  སྟོན་ཁར་འགོ་ཁྲིད་རྣམ་རྒྱལ་སོགས་ཀྱི། རི་ཁག་བཞི་པ་ཨར་པོ་རྒྱབ་སྟེ། འདུ་ཁང་གྱང་ཡར་བརྡུང་ཀྱང་། མཁན་པོ་བསམ་དགེ་དང་། དབུ་མཛད་ཡས་རབ་སོགས་དགོན་པའི་འགན་ཁུར་རྣམས། ན་སོ་དར་ལ་བབས་པས། དགོན་པར་མི་བཞུགས་པར། གྲོང་གསེབ་དང་། ཁྱིམ་དུ་བཞུགས་པས། གྲྭ་བཙུན་གཞན་ནི་དགོན་པར་ག་ལ་བཞུགས། དེར་བརྟེན་དགོན་པར་བླ་གྲྭ་བཞུགས་མཁན་མེད་པའི། དགོན་པར་བདག་སྐྱོང་བྱེད་མཁན་མེད་སྟབས། སླར་ཡང་འདུ་ཁང་གྱང་མར་འགྱེལ་འདུག་ གཅེན་པོ་ཚུལ་ཡེ་ནི། གཟི་ཀིས་རི་ཁྲོད་དུ། ཟླ་བ་དགུ་པའི་ཚེས་གཅིག་ཉིན་ནས། འབྲུག་གསས་རྩ་སྒྲུབ་ཀྱི། སྐུ་མཚམས་ལ་བཞུགས། སྔ་ཕྱི་སྐུ་མཚམས་ནམ་བཞུགས་ཀྱང་ཉི་རྭ་ཆུང་ངུ་ལས། སྒོ་ཕྱིར་བྱོན་མྱོང་མེད་ཅིང་། སློབ་གཉེར་བ་མ་གཏོགས་མཇལ་ཁ་མི་གནོང་ཞིང་། བསྙེན་པ་བགྲང་དུས། གཞན་དང་ངག་མི་བསྲེ་བར། སྨྲ་བ་བཅད་དེ། དགེ་སྦྱོར་ལ་སྙིང་རུས་དང་། བརྩོན་འགྲུས་ཤིན་ཏུ་ཆེན་པོ་མཛད་པ་ནི། རྒྱུས་ཡོད་དང་ཉེ་གནས་ཀུན། ཡིད་རང་དད་པའི་གནས་སུ་གྱུར་བར་མཛད་དོ། བསྙེན་མཚམས་བཞུགས་ནས་ཟླ་བ་བཞི་སོང་བའི། ལྕགས་སྦྲུལ་དགུན་ཟླ་བཅུ་གཉིས་པའི། ཚེས་བཅུ་གསུམ་ཉིན། ཧོར་ལུང་དཀར་དགོན་པའི་རྣལ་འབྱོར་བ། བློ་གྲོས་ཡེ་ཤེས་དབལ་མོ་འབྲོང་རིར། བསྐོར་བ་བྱོན་སྐབས། ཁ་དོག་རྣམ་པར་བཀྲ་བའི་འཇའ་ཤར་ཏེ། འཇའ་སྣེ་བླ་མའི་གཟིམ་ཁང་ལ་ཟུག་འདུག་གསུངས། ཡང་ཕྱི་ཉིན་ཚེས་བཅུ་བཞི་ཉིན། འཇའ་འོད་ཀྱི་གུར་ཁང་ལྟ་བུ། ཉེར་སྐོར་ཀུན་ཏུ་འཁྲིགས་པ་ཚང་མའི་མཇལ་བས། ཉེ་གནས་རྣམས་ཀྱི་ ཅི་ཡིན་ནམ་སྙམ་པ་བྱུང༌། ཚེས་བཅོ་ལྔ་ཉིན། ཡང་ལྷོ་ཕྱོགས་ནས་འཇའ་འོད་དཀར་སེར་དམར་ལྗང་། རྣམ་པར་བཀྲ་བའི་འཇའ་སྣེ། གཟིམ་ཁང་སྟེང་ཟུག་འདུག་པ་ཚང་མས་མཇལ། ཞོགས་པ་དང་ཕྱི་དྲོ། ཁ་བའི་མེ་ཏོག་འདབ་ལྔ་ལྡན་དང་དྲུག་ལྡན་བཅས། མངོན་པར་བབས། ཚེས་བཅུ་དྲུག་ཉིན། ཞོགས་པ་མེ་ཏོག་གི་ཆར་པ། རྒྱུན་མ་ཆད་པར་བབས་ནས། འཇའ་འོད་ཀྱི་གཅེན་པོའི་མཚམས་ཁང་གི་ཕྱོགས་ཡོངས་ནས། བསྐོར་ཏེ་འཇའ་འོད་ཀྱི་གུར་ཕུབ་པ་ལྟ་བུ་ཚང་མས་མཇལ། དམ་པ་མཆོག་ཕྱི་དྲོ་ཆུ་ཚོད་གསུམ་པར། གློ་བུར་དུ་སྙུན་ནས་དབུགས་ཀྱི། རྒྱུ་བ་མ་ཡལ་ཙམ་མ་གཏོགས། ཞལ་གྲགས་རྒྱུ་མེད་པ་གྱུར་སོང༌། ཉེ་གནས་སློབ་མ་རྣམས་ཀྱིས། ཕྲན་འབོད་དུ་བཏང༌། ཆུ་ཚོད་ལྔ་པ་ཙམ་ནས་སྤྱན་གཟིགས་ཏེ། ཞལ་ཅུང་གྲགས་རྒྱུ་འདུག་པས་ཁྱེད་ཚོས། ང་ལ་མ་འཐམས་པར་མར་སྡོད་གསུངས། དེ་ནས་ག་ལེན་སྙུང་བསྲེང་སྟེ། སྐུ་ཁམས་སྔར་ལྟར་བསྟན་མཛད་ནས། སློབ་མ་རྣམས་དང་ཉེ་གནས་ཀུན་ལ། གཅེན་པོ་མཆོག་གི་ཞལ་ནས། སྔོན་རྫོགས་པའི་སངས་རྒྱས། སྟོན་པ་གཤེན་རབ་མི་བོ་ཡང་། སྐུ་མི་རྟག་མྱ་ངན་ལས། འདས་པས་ཚུལ་བསྟན། དེ་བཞིན་རྒྱལ་སྲས་གཡུང་དྲུང་སེམས་དཔའ་ལ་སོགས། གྲུབ་ཐོབ་གཤེན་པོ་རིམ་བྱོན། རྣམས་ཀྱང་སྐུ་ཞི་བར་གཤེགས། དེ་ལྟར་མཐོ་རྒྱལ་པོ་ནས། དམའ་སྤྲང་སློང་འབྱོར་ཕྱུག་བཙན་ཉམས། ལས་སོགས་སྐྱེ་འགྲོ་སྲོག་ཆགས། དབུག་ཐོབ་ཚང་མ། འཆི་བ་ལས་མ་ཐར། དེས་ན་ཚང་མ་འགྲོ་ས་འདི་ལས་མེད་པས། ང་འཆི་བ་ལ་བློ་འགྱོད་དང་། སེམས་ཁྲལ་ཅུང་ཙམ་ཡང་མེད། ང་ཕོ་ལོ་བཅོ་ལྔ་ནས། ད་ལྟ་བར་དུ་དགེ་སྒྲུབ་སྡིག་སྤང་ཅི་ནུས་བྱས་པ་ཡིན། ཁྱེད་ཚོས་མི་ཚེ་ཡུད་ཙམ་འདི་ལ། ཕྱི་ཚུལ་ཙམ་དང་། གཏམ་སྙན་གྲགས། ཁ་རྒྱབ་ལྟོ་གོས་བཅས་ཀྱི་ཆེད་དུ་མ་སོང་བར། མཆོག་གསུམ་དཔང་པོ་བཞག་སྟེ། རང་གི་རང་ལ་མ་ཁྲེལ་བར། དགེ་བ་མཚན་བཅས་མཚན་མེད་གང་སྒྲུབ་ཀྱང་། སྦྱོར་དངོས་རྗེས་གསུམ་ཚང་བར། འབད་བརྩོན་ལྷོད་མེད་བྱས་ཏེ། ཚེ་ལྷག་གང་ཡོད་དགེ་སྦྱོར་གནད་དུ་འཁེལ་བར། མཛོད་དང་ང་བློ་བདེ་བ་ཡིན། ཁྱད་པར་དུ་ང་བླ་མར་བརྩི་མཁན་རྣམས་ལ། ངའི་རེ་བ་ཆེ་ཤོས་ནི་ངོ་ལྐོག་མེད་པའི། སྡོམ་པ་དམ་ཚིག་མིག་འབྲས་བཞིན་སྲུང་བས། རེ་བ་ཤིན་ཏུ་ཆེ། བདག་ཅག་གི་སྟོན་པ་འཁྲུངས་འདས་ཀྱི། དུས་ཆེན་སོགས་ཟླ་བའི་དུས་ཆེན་ཁག་དང་། ཟླ་རེའི་ཉ་སྟོང་ཚེས་བརྒྱད་ཉེར་གཉིས་རྣམས་ལ། བསྙེན་སྙུང་གི་སྡོམ་པ་སྲུང་ན། ཕན་ཡོན་བསམ་བརྗོད་ལས་འདས་པ་ཡོད། དེ་མིན་ཉ་ཁྲིམས་སྐབས། ཤ་ཆང་སྒོག་གཙོང་ལས་སོགས་མི་དགེ་བ་སྤང་ན་ཐུབ་ཡང་། ཕན་ཡོན་ཆེན་པོ་ཡོད་གསུངས་སོ།