ཚེས་༡༨་ཉིན། རྫོང་ཆོས་དོན་ཅུས་ནས། པེ་ཅིན་ནང་བསྟན་སློབ་གླིང་ལ། ཕྲན་སློབ་སྦྱོང་འགྲོ་དགོས་པས། བརྡ་ཐོ་འབྱོར་བས། དགོན་པའི་བླ་གྲྭ་རྣམས། ཚོགས་འདུ་སྐོང་འཚོགས་བྱས་ཏེ། གྲོས་བྱས་པས། བླ་གྲྭ་སུ་གཅིག་ཕྲན་སློབ་སྦྱོང་འགྲོ་རྒྱུ་བློ་མི་བབས་པས། མ་ཚད། སྒྲུབ་གྲྭ་བ་ཐམས་ཅད་ཀྱིས། ཕྲན་ལ་མཐེ་འོང་སློང་སྟེ། ཁྱེད་བྱོན་མི་འགྲོ་བར། ངེད་སྒྲུབ་གྲྭ་བ་ཚོར། དཔེ་ཁྲིད་བྱེད་དེ། ཡོན་ཏན་སློབ་རོགས་ཟེར་བ་དང་། གྲྭ་རྒན་ཚུལ་འོད་ཀྱིས། བླ་མ་ཁྱེད་སློབ་སྦྱོང་བྱོན་སོང་ན། སྒྲུབ་གྲྭ་ལ་སུས་འགན་ཁུར་འོང་རེད། དགོན་པ་སྦོ་རྒྱུ་སུས་འགན་ཁུར་འོང་རེད། ཁྱེད་སློབ་སྦྱོང་ལ་བྱོན་སོང་ན། དགོན་པར་རྒྱུན་ལྡན་བཞུགས་མཁན་སུ་ཡོད་རེད། མཁན་པོ་ནི་ཉིན་རྟག་པར། མར་གྲོང་གསེང་དུ། བྱོན་འགྲོ་གདའ། སྒྲུབ་གྲྭ་ལ་སུས་དཔེ་ཁྲིད་ཆད་མེད་བྱེད་འོང་རེད། ཁྱེད་མ་བཞུགས་ན་སྒྲུབ་གྲྭ་འཐོར་འགྲོ་རྒྱུ་གཏན་འཁེར་རེད་ལ། དགོན་པ་འདི་དེ་སྔ། བླ་མ་ཁྱེད་ཀྱིས་འགན་ཁུར་་ནས། དགོན་པ་ཉམས་རྒུད་ལས་སྒྲོལ་ཏེ། གང་ལ་གང་འཚམས་ཀྱི། དགོན་པ་དར་རྒྱས་བྱུང་བ་རེད། ད་ཁྱེད་བྱོན་སོང་ན། སྒྲུབ་གྲྭ་མ་འཐོར་བ་དང་། དགོན་པ་སྤོ་རྒྱུ་སོགས། འགོ་ཚོས་མཁན་སུ་ཡོད་རེད། ང་ཚོ་གྲྭ་རྒན་གསུམ་ཀྱང་བླ་མ་ཁྱེད་ཀྱི་བཀའ་ལ་ཉན་ནས། དེ་སྔ་ལོ་བརྒྱད་དགུ་ལ་དགོན་པ། འདིར་བསྡད་པ་ཡིན་ལ། ད་རུང་ཁྱེད་ལ་ཡིད་ཆེས་དང་། ཁྱེད་ལ་རེ་བ་བཅོལ། ཁྱེད་ལ་བརྩི་སྲུང་ཞུས་ཏེ་བསྡད་ཡོད་ལ།  ཁྱེད་ཀྱི་བསམ་བློ་ཐོངས་དང་། བླ་མ་ཁྱེད་ཀྱིས་དགོན་པའི་འགན་ཁུར་ཏེ། དགོན་པར་མ་བཞུགས་པར་བྱོན་སོང་ན། ཁྱེད་ཀྱི་དེ་སྔ་ལོ་མང་པོ་ལ། དགོན་པའི་དོན་དུ་ཕྱག་དཀའ་ལས་རྒྱབ་པ་སྟོང་ཟད་དུ་འགྲོ་རྒྱུ་རེད་ལ། དེ་ནས་དགོན་པ་སྤོ་ཐུབ་རྒྱུ་ཕར་ཞོག་ སྔོན་མ་ནང་ལྟར་དགོན་པ་ཉམས་རྒུད་འགྲོ་རྒྱུ་རེད་ལ། སྒྲུབ་གྲྭའང་འཐོར་འགྲོ་རྒྱུ་རེད། ང་ཚོ་གྲྭ་རྒན་བཞི་ཡང་། དགོན་པར་སྡོད་རྒྱུ་མིན་ལ། སོ་སོའི་མཚམས་ཁང་ནང། དགེ་སྦྱོར་ཅི་འགྲུབ་བྱེད་ངེས་ཡིན་ཟེར་བ་དང་། གྲྭ་རྒན་བཞི་དང་གྲྭ་ཆུང་འགའ། མི་ཆུའང་ཤོར་བྱུང་བས། དེར་ཕྲན་དགོན་པ་དང་སྒྲུབ་གྲྭའི་འགན་ཁུར་ཏེ། དགོན་པར་བསྡད་པ་ལས་གར་ཡང་། མི་འགྲོ་རྒྱུའི་ཁས་བླང་པ་ཡིན་ལ། སེམས་ནང་གྲྭ་རྒན་ཚོས་རེ་བ་ཆེན་པོ་དང་། ཡིད་ཆེས་བྱས་པ་ངས་སྟོང་ཟད་དུ་མི་གཏོང་བར། སེམས་ཐག་གཙང་བཅད་ཀྱི། རང་ནུས་ཡོད་རྒུ་རྩལ་དཀྲུགས་ཀྱིས། མ་ཤི་བར་དུ་ཞབས་ཞུར་བརྩོན་སྙམ་པས། བློ་སྟོབས་སྐྱེས་བྱུང་། ཚེས་༢༨་་ཉིན། བྱང་སེམས་བརྒྱ་རྩ་པ་ཁྲིད་པ་དང་། གྲྭ་རྒན་རྣམས་ཀྱི་རེ་འདུན་བཞིན། སྒྲུབ་གྲྭ་ཚོར་བྱང་སྡོམ་ཕུལ། སྤྱི་ཟླ་༦་་པའི་ཚེས་་༥་་ཉིན། དཔལ་མཆོག་དང་ཀུན་འགའ་གཉིས་ཀྱི་སྤུ་ཐོག་འབུ་་༣༣༧་་བྱུང་བ་གྲྭ་རྒན་གསུམ་ལ་རྩིས་སྤྲད། དེ་རྗེས་ཚུལ་ཉི་དང་ལུང་རྟོགས་གཉིས་ཀྱི། ཁྲ་ལྕམ་ཝ་གསུམ་ སྒོར་༢༠་་བྱུང་བ་དང་འབུ་༧༡༩་་བྱུང་བ་གྲྭ་རྒན་གསུམ་ལ་རྩིས་སྤྲད། དེ་རྗེས་བསམ་དགེ་དང་སྨོན་ཕུད་གཉིས་ཀྱི། སྦ་ཆེན་ནས་སྒོར་་༦༠༤༡་་བྱུང་བ་དང་འབུ་་༧༩༧་་བྱུང་བ། གྲྭ་རྒན་གསུམ་ལ་རྩིས་སྤྲད། དེ་རྗེས་ཚུལ་བློ་དང་རྒྱལ་ཚུལ་གཉིས་ཀྱི། འབོ་དམུ་གཡམ་གསུམ་ནས། སྒོར་་༦༧༠༤་་བྱུང་བ་དང་འབུ་་༡༧༦༠་་བྱུང་བ་གྲྭ་རྒན་གསུམ་ལ་རྩིས་སྤྲད། དེ་ནས་ཚེས་་༡༡་ཉིན། འཆར་གཞི་ལྟར་ན། བསམ་དགེ་དང་ངེད་གཉིས་ཀ། རྫོང་དཔོན་གསར་པ་བྱམས་པ་བརྩོན་འགྲུས་དང་། ཧྲུའུ་ཅི་ལུའུ་ཏྲིམ་མིན་བཅས་ལ། རེ་འདུན་ཡི་གེ་ཕུལ་ཏེ། དགོན་པ་གནས་སྤོས་ཀྱི། ཆོག་མཆན་ཞུ་ལ། འགྲོ་རྒྱུ་བྱས་ཀྱང་། བསམ་དགེའི་དང་པོ་ཁྱིམ་ལ་བྱོན་དགོས་ཟེར་ནས། སྔོན་ལ་བྱོན་སོང་བ་དང་། ངས་རྫོང་དུ་ག་ཚད་སྒུགས་ཀྱང་མ་སླེབས་པས། ཁོང་ལ་ཁ་སྤར་རྒྱབ་ཀྱང་། ཁ་སྤར་སྒོ་རྒྱབ་འདུག་པ་དང་། ཁྱིམ་ལ་ཁ་སྤར་རྒྱབ་པས། ཁོང་བྱོན་མ་འགི་ཟེར། དེ་ནས་ཕྱི་དྲོ་ཆུ་ཚོད་བཞི་པ་བར། ངས་སྒུགས་བསྡད་པ་ཡིན། དེ་ནས་ཁ་སྤར་རྒྱབ་པས། བསམ་དགེའི་ང་ད་ལྟ་དམར་པོ་ཐང་ལ། ཆང་འཐུང་བཞིན་ཡོད། འགོ་ཁྲིད་ལ་ཆང་དྲི་བྲོ་ན་མི་ལེགས་པས། རྫོང་དཔོན་མཇལ་ལ། ཁྱེད་འགྲོ་རོགས་གྱིས་ཟེར་བྱུང་། དེ་ནས་ངས་ཚུལ་ཉི་ལ་ཁ་སྤར་རྒྱབ་སྟེ། ངས་རྫོང་དཔོན་དང་ཧྲུའུ་ཅི་མཇལ་ལ། ཁྱེད་རོགས་པ་འོང་རོགས་ལབ་པས། ཚུལ་ཉིས་ཁོང་བ་གླང་གི་རྫི་བོ་འགྲོ་བཞིན་ཡོད་པས། མི་ཁོམ་ཟེར། དེར་མཁན་པོ་བསམ་དགེའི་གཅུང་པོ། གྲྭ་ཉི་མ་ལ་ཁ་སྤར་རྒྱབ་སྟེ། རོགས་པ་འོང་རོགས་ལབ་པས། གྲྭ་ཉི་མས། ངས་ད་ལྟ་འབུ་ཉོ་ཚོང་བྱེད་སྒང་ཡིན་པས། མི་ཁོམ་ཟེར་བས། དེར་ངས་རྫོང་དཔོན་དང་། ཧྲུའུ་ཅི་མཇལ་བ་ཡིན་པས། དེར་ཆོས་དོན་ཅུས་ནས་སྐད་བསྒྱུར་འགྲོ་མཁན་རྙེད་པས། དེས་ཧྲུའུ་ཅུ་ལ་ཞུས་པས་གྲོས་བྱེད་ཆོག་ཟེར། རྫོང་དཔོན་གྱིས། ཁྱེད་ཚོའི་དགོན་པ་སྤོ་རྒྱུ་ཐད། ང་ཚོ་རྫོང་ཨུད་ཀྱི་སང་ཉིན་གནང་ཉིན་ལས། མ་འཕྱི་བར་གྲོས་བྱེད་འོང་། སྤྱིའི་ཆ་ནས་གྲོས་འགྲིགས་རྒྱུ་རེད། དེ་ནས་ཆབ་མདོར་ཡར་ཞུ། གང་སྔ་གང་མགྱོགས་བྱེད་འོང་གསུང་། དགོན་པ་འགྱེལ་གྲབ་བྱེད་བཞིན་འདུག་པས། ང་ཚོ་བླ་གྲྭ་རྣམས། གནས་སྐབས་སྡོད་ས། ཁང་པ་ཁ་ཤས་ལས་ཆོག་པ། ཞིག་ཅི་དྲག་ཞུས་པས། ཆོག་མཆན་མ་ཐོབ་པར། ཁང་པ་རྩ་བ་ནས་མ་ལས། ལས་ཆོག་མ་རེད། དགོན་པའི་བླ་གྲྭ་རྣམས་གནས་སྐབས་སྡོད་ས། ངེད་ཀྱི་རྫོང་དམངས་སྲིད་ཅུས་ལ། གུར་ཆེན་ཁ་ཤས་གཡར་རོགས་གྱིས། ལབ་འོང་གསུང་བྱུང་བས། དེར་ཕྲན་ནས་ལགས་སོ་ཞུས་པ་དང་། ཕྱི་ཉིན་ ངེད་ཚོ་བླ་གྲྭ་འགའ་དམངས་སྲིད་ཅུས་ལ་སོང་བས། གུར་ཆེན་སྤུས་ལེགས་ལྔ་གཡར་བྱུང་། ཚེས་་༡༨་་ཉིན། དཔེ་ཁྲིད་ཚར་ནས། བཀྲིས་མདོར་སོང་བས། ཕྲན་དང་བསམ་དགེ ་ཡས་རབ། ཚུལ་བློ་བཅས་ངེད་བཞིའི། དགོན་པའི་བཟོ་དབྱིབས་དང་། གྲྭ་ཤག ་གཉེར་ཚང་། ཐབ་ཚང་བཅས་བཟོ་ལུགས་ཀྱི། ས་བཀྲ་ལ་གྲོས་བསྡུར་བྱས། སྨར་ཁམ་ལ་ཁར་སེང། དགོན་པ་རྙིང་བཅོས་བྱེད་འཆར་བྱས་ཏེ། གཏའ་མ་སྒོར་༥༠༠༠་་ སྤྲད་པ་དེ་ཚུར་བླང། ཆོག་མཆན་ཐོབ་ནས། གྲོས་འགྲིག་ན། དགོན་པ་གསར་པ་བཟོ་རྒྱུ་སྤྲད་འཆར་བྱས། དེ་ནས་ཁྱུང་རྫོང་གྲོང་དུ་གཤེད་འདུར་འདོན་ལ་སོང་། དེ་སྐབས་གྲྭ་དཔལ་ལྷའི་ཆབ་མདོ་ནས་ཁ་སྤར་རྒྱབ་སྟེ། ང་གར་ཡོད་ཟེར་བས་དགོན་པར་ཡོད་ལབ་པ་ཡིན། མཁན་པོ་གར་འདུག་ཟེར་བས་ཤེས་མ་སོང་ལབ་པ་ཡིན། དེ་མཚམས་གྲྭ་དཔལ་ལྷའི་ཁ་སྤར་གློག་མེ་ཟད་དེ། ཁ་རྒྱབ་སོང་བས་ངས་སྐད་ཆ་ཞིམ་ཕྲ་བཤད་ས་མ་རྙེད། དེ་རྗེས་ངས་ཁ་སྤར་རྒྱབ་རྒྱུ་མ་བྱུང་། ཚེས་་་༡༩་ཉིན་ང་དགོན་པར་ཉིན་གུང་འབྱོར་བས། གྲྭ་རྒན་སྐལ་ཐར་ན་འདུག་པས། དེ་སྨན་ཁང་དུ་བསྐྱལ་ནས་ཕྱི་དྲོ་དགོན་པར་འབྱོར་བ་དང་ལྷན་དུ། མཁན་པོ་བསམ་དགེའང་དུས་རྒྱུན་ནང་ལྟར། ཆང་སྦྱིག་དུམ་གང་ཁུར་ཏེ་དགོན་པར་བྱོན་འདུག་ དེ་སྐབས་ཁོང་ཆང་གི་ར་གཟི་འདུག་པས། ང་ལ་བླ་མ་ཁྱོད་ཀྱི་དཔལ་ལྷ་ལ་གང་བཤད་པ་ཡིན་ཟེར་བས། ངས་གང་བཤད་མེད་ལབ་པས། བསམ་དགེས་ཁྱོས་བདེན་པ་ཁྱད་བསད་བྱེད། དགོན་པར་མེད་ཀྱང་དགོན་པར་ཡོད་བཤད། ང་དགོན་པར་ཡོད་ཀྱང་མ་མཐོང་བཤད། ཅི་བཤད་ལེ་ཟེར་ངོ་ནག་པོར་གྱུར་ཏེ་ཁྲོས་འདུག་ལ། ངས་ཁོག་སྟོད་ལ་ཐུག་ཐུག་ཐིང་འགའ་བྱས་བྱུང་ལ། བསམ་དགེས་ཁ་ནས་ཆང་གི་དྲི་མ་ཁ་རླངས་དང་མཉམ་དུ། ཕྱུར་བཞིན་འདུག་པས། ངས་མཁན་པོ་ལགས་དགོང་པ་མ་འཚང་། དེ་སྐབས་ངས་ང་དགོན་པར་ཡོད་ལབ་པ་ཡིན་ལ། ངས་མཁན་པོ་མཐོང་མ་བྱུང་ལབ་པ་ལས། དེ་མིན་གང་ལབ་མེད། དེ་ནས་ཁ་སྤར་གློག་མེ་ཟད་དེ། སྐད་ཆ་བཤད་མ་ཐུབ་མ་སོང་ལབ་པ་ཡིན། དེར་ད་རུང་བསམ་དགེའི་ཁྱོད་ཀྱིས། དེ་ལྟར་རྫུན་བཤད་ཅི་དགོས་སོགས་ཟེར་བས། དེ་ནས་ངས་མ་གཞི་མཁན་པོ་ཁྱེད་ཀྱིས། སྒྲུབ་གྲྭར་དཔེ་ཁྲིད་བྱེད་པ་དང་སྒྲུབ་གྲྭར་འགན་ཁུར་ནས། དགོན་པར་བསྡད་དགོས་ཀྱང་ཁྱེད་ཧ་ལམ་ཉིན་ལྟར། གྲོང་གསེང་དུ་ཆང་གི་རྗེས་སུ་འཕྲུལ་རྟ་ཞོན་ནས་བྱོན་འགྲོ་གདའ་ལབ་པས། བསམ་དགེའི་ངས་སྐབས་རེད། མ་གཏོགས་དཔེ་ཁྲིད་ཐིང་རེ། མ་ཆད་པར་བྱས་ཡོད་ཟེར་བས། ངས་བསམ་དགེ་ཁྱེད་ཀྱི་ཞོག་པའམ་ཕྱི་དྲོ་ནམ་ཁོམ་ལ། ཁྲལ་ལྟ་བུ་དཔེ་ཁྲིད་ཐིང་རེ་བྱེད། དེ་ནས་ཉིན་ལྟར་འདི་ནས་བྱོན་འགྲོ་བ་རེད། དེ་ནས་སྒྲུབ་གྲྭ་བ་ཚོར་ཉིན་གང་བོར་ཕྲན་མེད་ན། སུའང་བལྟ་སྐྱོང་བྱེད་མཁན་ཡོད་མ་རེད། འདི་ལྟར་མཁན་པོ་ཁྱེད་གྲོང་གསེབ་ལ་བྱོན་དགོས་དོན། མང་ཆེ་བ་ནི་ཆང་རག་རེད། སྐབས་རེ་ལ་སྡེ་ནང་ལ་བྱོན་དགོས་དོན་ལོས་ཡོད་དེ། འདི་ལྟར་བྱས་བསྡད་ན་མཁན་པོའི་མིང་། མ་ཁུར་ན་འགའ་ས་གདའ་ལབ་དགོས་བྱུང་། ཚེས་༢༠་ཉིན། གྲྭ་སྨོན་ལམ་ཚུལ་ཁྲིམས། རྩེ་དྲུག་ཏུ་མ་བསྡད་པར། ནག་རུ་དགོན་དུ་སྒྲུབ་གྲྭར་བསྡད་བཅུག་ཅེས། རེ་འདུན་བྱས་བྱུང་བས། དེ་ཡང་སྒྲུབ་གྲྭར་བཞག་དེ་མཚམས་ཚེས་༢༤་ཉིན། ཚུལ་ཁྲིམས་བློ་གྲོས་ཀྱིས། གྲྭ་གཤེན་བསྟན་འོད་ཟེར། ནག་རུ་དགོན་གྱི་སྒྲུབ་གྲྭར། བཞག་དགོས་གསུང་པ་ལྟར་བཞག་པ་དང་ ཚེས་༢༦་ཉིན་གྲྭ་གཙུག་ཕུད་རྒྱལ་མཚན། ནག་རུ་དགོན་པའི་སྒྲུབ་གྲྭར་ཞུགས་རྒྱུ་རེ་འདུན་ལྟར། དེ་ཡང་སྒྲུབ་གྲྭར་བཞག་པས། སྤྱི་ཟླ་་༧་་པའི་ཚེས་་༦་ཉིན། འགའ་རེའི་སྔར་སྲོལ་ལྟར། རྣམ་རྒྱལ་དང་སྨོན་ལམ་མཐའ་ཡས། བརྔན་བཅས་སྟོན། མང་ཆེ་བས་སྲིད་རྒྱལ་དྲིལ་ནག་ལ། ཁྲི་ཚོགས་ཕུལ། དེ་ཡང་སྲིད་རྒྱལ་ཐུགས་སྒྲུབ་དང་། སྲིད་རྒྱལ་བསྐང་ཆེན། ཁྲི་གཅིག་དང་། ཕྲན་གྱིས་བྲིས་པས། ཚོགས་བསྡུས་དང་། བསྐང་བ་འདི་གཉིས་༼་་ ༄༅ །། སྲིད་རྒྱལ་ཚོཌ་བསྡུས་བཞུཌ། རྃ་ཡཾ་མཾ་ཨ་ཨྰོྃ་ཧུྃ། བསྭོ་སྲིད་གསུྃ་དབང་དུ་བསྡུས་པའི་གསས་མཁར་གྱི། སྣང་བ་ཁྲག་མཚོ་འཁྱིལ་པའི་རྦ་ཀློང་ནས། མ་ཅིག་སྲིད་རྒྱལ་དབུ་བརྒྱ་ཕྱག་སྟོང་མ། རྒྱལ་མོ་རྣམ་གསུྃ་དུས་ དྲུག་མ་མོ་འབུྃ། གཟེ་གྱད་བྱིན་ཏེ་གྱད་དམག་རྒྱལ་ཆེན་སོཌ། ཡེ་ཤེས་རྫུ་འཕྲུལ་ལས་ཀྱི་དབལ་མོ་རྣྃས། བོན་བསྟན་སྲུང་ཞིང་སྒྲུབ་གཤེན་སྐྱོབ་པ་དང་། སྡང་དགྲ་གནོད་བགེཌ་རྡུལ་དུ་བརླག་པས་ཕྱིར། ཞལ་ཟས་ཚོཌ་ ལ་སྤྱན་འདྲེན་གཤེགསོུལ། དངོས་འབྱོར་ཡིད་སྤྲུལ་འདོད་ཡོན་ཚོཌ་མཆོད་འབུལ། ཐྱེས་དགོངས་ལ་དབྱིངས་ནས་ བཞེསོུལ། མི་དགེ་སྡིག་དང་སྡོམ་གསུྃ་ཉེས་ལྟུང་རྣྃས། ལོངསྱོད་ཚོཌ་ཀྱི་མཆོད་པའི་བསྐང་ཞིང་བཤཌ། བོན་ལ་ གནོད་ཅིང་བདག་ལ་སྡང་བ་ཡི། ཡིད་ལ་རྣག་པའི་དགྲ་འདྲེ་གདོན་བགེཌ་རྣྃས། དབལ་མོ་སྤྲུལ་པ་བཅས་པའི་ མྱུར་དུ་ཁུག། སྲོག་ཆོད་སྙིང་ཕྱུང་ཤ་ཁྲག་ཞལ་དུ་སྟོབས། མ་གཡེལ་སྲིད་རྒྱལ་གཙོ་འཁོར་སྤྲུལ་པ་བཅས། སྨན་རག་གཏོར་མ་ཚོཌ་ཀྱི་ཐྱདྃང་། གཡུང་དྲུང་བོན་གྱི་བསྟན་པ་གཉེན་པོ་སྲུང་། སྒྲུབ་གཤེན་ཡོན་བདག་ཚེ་ སྲིང་མི་ནོར་སྤེལ། བསྃ་དོན་སྒྲུབ་ལ་རྐྱེན་ངན་བར་ཆོད་ཟློག། ཚེ་དབང་མཐུ་ཡི་དངོས་གྲུབ་བདག་ལ་རྩོལ། བཅོལ་པའི་ཕྲིན་ལས་མྱུར་དུ་གྲུབ་པར་མཛོད།བསྭོ་མ་མ་ཛ་མུ་ཡེ་ཐུན་བྷྱོ།རྃ་ཐུན་བྷྱོ།ཨ་དཀར་མུ་ཡེ་ཤག་ཐུན་བྷྱོ་བྷྱོ་བྷྱོ་བྷྱོ་བྷྱོ་བྷྱོ་བྷྱོ།  ཅེས་བསམ་གཏན་གླིང་དུ་ཚོཌ་ཁྲི་འབུྃ་འབུལ་སྐབསུ་ཁྱུང་ནག་འོད་རྒྱས་པས་བྲིས་པ་དགེའོ།