འཕྱོང་ལ་འཕང་བའི་མདའ་མོ།
ཆོས་ལྡན་བླ་མས་རང་ཆེའི་ཆེད་དུ་ཆོས་གྲོགས་བཙོན་ལ་བཅུག་ལ་ཁད། །
དབང་ལྡན་དཔོན་པོས་གོ་སའི་ཆེད་དུ་ཨ་མ་ཁྲིམས་ལ་སྦྱར་ལ་ཁད། །
དད་ལྡན་བཙུན་པས་ལ་རྒྱའི་ཆེད་དུ་རྩ་བཞིའི་སྡོམ་པ་ཤོར་ལ་ཁད། །
འབྱོར་ལྡན་ཚོང་པས་སྒོར་མོའི་ཆེད་དུ་ཨ་ཕའི་ཕོར་པ་བཙོང་ལ་ཁད། །
དགའ་བའི་གངས་ལྗོངས་མཐོང་ཐེངས་རེ་རེར་མིག་ཆུའི་ཐིག་ཕྲེང་ལྷུང་ལ་ཁད། །
རྒན་ཡུལ་ལོ་ལོ་སྒོར་མོས་མྱོས་ཏེ་ན་ཆུང་བག་མ་བསུ་ལ་ཁད། །
མགོ་དཀར་མ་རྒན་ཆང་གིས་མྱོས་ཏེ་བུ་ཆུང་མག་པ་ཉོ་ལ་ཁད། །
ཕ་བཟང་བུ་ཚ་དགའ་བས་མྱོས་ཏེ་ཕ་གཞིས་ཁྲོམ་ལ་བསྐྱལ་ལ་ཁད། །
སྒེག་ལྡན་བུ་མོ་ལང་ཚོས་མྱོས་ཏེ་རང་ལུས་འདོམ་གང་བཙོང་ལ་ཁད། །
སྐྱིད་པའི་གངས་ལྗོངས་དྲན་ཐེངས་རེ་རེས་སྨྲེ་ངག་དགུང་ནས་ཐོན་ལ་ཁད། །
གཟའ་དགུའི་ཕ་རྒན་ཁྱིམ་གཞི་བཞག་ནས་མ་ཀའི་རྒྱ་གྲོང་ཉུལ་ལ་ཁད། །
དྲུག་ཅུའི་མ་རྒན་བརྟན་ཆོ་བཞག་ནས་བག་མའི་དུས་སྟོན་བཤམ་ལ་ཁད། །
ཆོས་ལྡན་བཙུན་པ་འགྲོ་བྱེད་རྒོད་ནས་མཛངས་མའི་ཁྲིམས་ལ་སྦྱར་ལ་ཁད། །
ལྔ་གསུམ་བུ་མོ་ལང་ཚོ་རྒྱས་ནས་མངལ་གྱི་འབྲས་བུ་སྨིན་ལ་ཁད། །
དེང་སང་གངས་ལྗོངས་དྲན་ཐེངས་རེ་རེ་ངོ་ཚའི་བ་མོ་ཞུ་ལ་ཁད། །
དགེ་ལྡན་བོད་མིས་ཆོས་བྱེད་ཟེར་ཡང་གསེར་སྐུ་ཕྱི་ལ་བཙོང་ལ་ཁད། །
རིག་ལྡན་ཁ་བའི་ལོ་རྒྱུས་སྨྲ་ཡང་རང་ཁུང་གཞན་ལ་བཅོལ་ལ་ཁད། །
གངས་ཅན་ལྗོན་འདིར་ནོར་གྱི་ཁེངས་ཀྱང་གཏེར་ཁ་མི་ལ་ཚོང་ལ་ཁད། །
ཞལ་ནས་སྡིག་སྤང་དགེ་སྒྲུབ་ཟེར་ཡང་དགུན་འབུ་སེར་པོ་བརྐོ་ལ་ཁད། །
དེང་དུས་གངས་ལྗོངས་སྤྱོད་པ་མཐོང་ན་བོད་མི་རང་མཚོན་སྡུལ་ལ་ཁད། །
