ཁྲི་འབུམ་ལོ་ཡི་གོང་གི་བོད་རིགས་ཀྱི། སྐྱབས་ཀྱི་ཐོག་མ་གཡུང་དྲུང་བོན་ཆོས་ལས། བསྒྱུར་དང་བཅོས་ནས་འཆོས་པས་དམ་པའི་ཆོས། གངས་རིའི་ལྗོངས་འདིར་དར་བས་བོད་རྒྱུད་ཆོས། འདི་ཡིས་ཕུང་དཀྲུགས་བྱས་ཚད་བཤད་མི་ལོང་། ཁྲི་སྲོང་ཡན་གྱི་བོན་རྒྱལ་རིམ་བྱོན་གྱིས། གཤེན་རབ་བསྟན་པར་གུས་བཀུར་བྱས་འབྲས་སུ། རྒྱལ་འབང་བདེ་སྐྱིད་ལྡན་པའི་ལོ་རྒྱུས་དེ། བོན་བན་རྒྱལ་རབས་ཆོས་འབྱུང་ཀུན་ལས་གསལ། ལྷག་པར་ཁྲི་བདུན་འཇའ་ལུས་དེངས་པས་ཚུལ། རྒྱལ་རབས་ཀུན་ལས་གསལ་ཕྱིར་འདིར་མི་སྨྲ། མཁན་སློབ་ཆོས་གསུམ་བེ་རོ་ཙ་ན་ཡིས། ངན་གཡོ་ལྐོག་ཇུས་ཐེངས་མང་བྱས་ནས་སུ། བོན་གྱི་བླ་གྲྭ་ཚང་མ་བཙན་བཀུགས་ཀྱི། དམག་མིས་མཐའ་བསྐོར་བོན་གཞུང་དཔེ་ཆ་ཀུན། ཁོ་ཚོར་རྩིས་འབུལ་དགོས་པའི་བཙན་བཀའ་ཕབས། གཡུང་དྲུང་བོན་གཞུང་ཁོ་ཚོས་བཙན་གྱིས་འཕྲོགས། བོན་གཤེན་རྒྱང་འབུད་བོན་བློན་དམར་བསད་བཏང་། བོན་ཆོས་ཕལ་ཆེར་ཆོས་སུ་མིང་བསྒྱུར་བྱས། བོན་གྱི་ལྷ་སྐུ་ཡི་གེ་མཆོད་རྟེན་སོགས། རྟེན་གསུམ་མཐོང་ཚད་མེ་བསྲེགས་ཆུ་ལ་སྐུར། བོན་གཤེན་རེ་འགས་སྲོག་རྡོས་ལྐོག་ཉར་བོན། སྨོན་ལམ་བཏབས་ནས་གཏེར་ལ་སྦས་སྐུང་ལས། ཕ་ཆོས་ཉར་ཚགས་མི་ཕོད་དུས་སྐབས་སུ། བན་ཆོས་རྐུན་ཁོམ་རྐུ་རྒྱུ་རྙེད་སྲིད་དམ། དཔེར་ན་རིག་གནས་གསར་བརྗེའི་དུས་སྐབས་སུ། བན་བོན་རྟེན་གསུམ་མེ་བསྲེགས་ཆུ་སྐུར་སྐབས། གཞན་ཆོས་རྐུ་བས་བསམ་པ་འཁོར་སྲིད་དམ། དམག་སྲིད་དབང་འཛིན་མཁན་སློབ་ཆོས་གསུམ་གྱིས། གཡུང་དྲུང་བོན་དཔེ་བཙན་འཕྲོགས་བྱེད་པའི་དོན། ཐུབ་པའི་ཆོས་ལ་ཐེག་དམན་སྒྲ་བཅོམ་ལས། ཡང་དག་སངས་རྒྱས་ཐོབ་བྱེད་མེད་མཐོང་ནས། བོན་གཞུང་ཐེག་པའི་ཡོངས་རྩེ་རྫོགས་ཆེན་སོགས། རྐུ་བཤུ་བསྒྱུར་བཅོས་བྱེད་བསམ་མ་ཡིན་ནམ། མ་གཞི་བོད་རྒྱུད་བན་དེའི་ཐུབ་ཆོས་འདི། ཐེག་ཆེན་ཚད་མ་ཞང་ཞུང་རྐུས་ལུས་ལ། སྔགས་གཞུང་མུ་སྟེགས་ལས་རྐུན་མགོ་བོ་སྦྱར། རྫོགས་ཆེན་བོད་ནས་རྐུན་དེ་གློ་རྙིང་བྱས། བོད་ཀྱི་རིག་གནས་ལྔ་ཡི་ཡན་ལག་བཏགས། ར་མགོ་ལུག་སྦྱར་ཐུབ་ཆོས་མིང་ཙམ་ལས། ཤཱཀྱའི་ཆོས་ལུགས་ལྟ་གྲུབ་མིང་ཡང་མེད། ཚད་མ་ཐེག་ཆེན་རྒྱན་དྲུག་མཆོག་གཉིས་ཀྱིས། ཞང་ཞུང་བོན་ལས་ཤཱཀྱ་འདས་རྗེས་རྐུན། བོད་མི་ལོ་ཙྪ་ཟེར་བའི་ཁྲམ་པ་ཚོས། སྔ་ཕྱིར་སྔགས་གཞུང་མུ་སྟེགས་པ་ལས་བསྒྱུར། པད་འབྱུང་བེེ་རོ་ཁྲི་སྲོང་ལྡེ་བཙན་གྱིས། རྫོགས་ཆེན་བོད་ཀྱི་བོན་ལས་རྐུ་འཕྲོགས་བྱས། མ་ཚད་རིག་གནས་ལྔ་སོགས་བོན་གཞུང་ལས། རྒྱ་གཞུང་མེད་པས་རང་རྐུབ་རང་རྡོལ་གསལ། སྙན་ངག་མེ་ལོང་རྒྱ་གཞུང་མུ་སྟེགས་ཅན། དེ་ཕྱིར་བོད་འདིར་ཤྭཀྱའི་བསྟན་པ་མེད། བལ་དང་རྒྱལ་གར་ཤར་བྱང་ལྷོ་རྒྱུད་སོགས། རྒྱལ་ཁབ་འགའ་ལ་ཡོད་པའི་ཤཱཀ་ཐུབ་ཆོས། ཉན་ཐོས་ཐེག་དམན་སྒྲ་བཅོམ་ཐོབ་བྱེད་ལས། སྔགས་རྫོགས་ཐེག་ཆེན་མེད་པ་མཐོང་ཆོས་ལ། བོད་འདིར་བོན་དང་ཐུབ་ཆོས་མུ་སྟེགས་གཞུང་། གང་ཡང་བསྲེས་པས་བོད་རྒྱུད་ཕུང་གསུམ་ཆོས། མཁན་སློབ་ཆོས་གསུམ་རྗེས་སུ་བོད་ལ་དར། དེ་ཕྱིན་རྒྱ་ལ་དཔེ་བྱས་རྡོ་རིང་བཞེངས། ཕས་རྒོལ་དམག་དཔོན་ཤྭཀྱའི་དགེ་སློང་བྱས། སྲོག་ཁྲིམས་གཅོད་པས་དཔོན་པོའང་དགེ་སློང་བྱས། དགེ་བཅུ་ཆོས་བཤད་མཁན་པོའང་དེ་ཚོ་ཡིན། དེས་ན་རྡོ་རིང་བོན་སྐོར་བཀོད་སྲིད་དམ། རྙིང་མ་ས་སྐྱ་བཀའ་རྒྱུད་དགེ་ལྡན་སོགས། ལྟ་གྲུབ་ཀླུ་ཐོག་གཉིས་ལ་ཐུག་པ་བདེན། ཁོང་གཉིས་རྒྱུད་ཁུངས་ལྷ་ཀླུར་གཏུགས་པ་ལས། ཤྭཀྱའི་སྲས་ལ་མི་གཏུགས་ཅི་ཡི་ཕྱིར། རྙིང་མའི་སྔགས་རྫོགས་ཤྭཀྱར་མི་གཏུགས་པར། ཇོ་མོའི་བྱིས་པར་གཏུགས་དོན་ཅི་ཡི་ཕྱིར། འགོ་ཁུངས་གཡུང་དྲུང་བོན་ལ་ཐུག་པའི་ན། བཤད་འདོད་མེད་ནས་གསང་བ་མ་ཡིན་ནམ། མདོར་ན་ཤྭཀྱ་ཐུབ་པས་མ་གསུང་པའི། ཐེག་ཆེན་རྫོགས་ཆེན་ཐེག་པ་རིམ་དགུ་སོགས། ཚང་མ་གཡུང་དྲུང་བོན་ལས་རྐུ་འཕྲོགས་ཆོས། ཁྱོད་ཚོས་རང་མཚང་རྫུན་རྐུབ་བརྡོལ་དོག་གིས། བོན་པོར་ནང་པའི་བོན་གཞུང་ནང་པའི་གྲལ་ནས་ཕུད། དུས་རབས་ཉེར་གཅིག་མ་ཤར་སྔོན་ཆད་ལ། བོན་གཞུང་མ་མཐོང་མུན་པའི་མཛུབ་སྟོན་གྱིས། བོན་པོར་འཚེ་བས་ཆོས་ཞེས་ཅལ་འདྲོག་གཏམ།། སྲོག་ཁྲིམས་གཅོད་མཁན་ཤྭཀྱའི་དགེ་སློང་འགས། ཆབ་སྲིད་སླད་དུ་བོན་ལ་ཞྭ་མོ་བཀབས། གཅིག་ལ་གཅིག་བཤད་བོད་ཁམས་ཀུན་དུ་གྲགས། བ་གླང་རྫི་བོ་ཡན་གྱི་བོན་པོ་ལ། བོན་ནག་ཞེས་ཟེར་ཁ་ལག་མི་བསྲེ་དོག ཉེར་གཅིག་དུས་རབས་འདི་ཡི་གོང་རོལ་ན། འཛམ་གླིང་མཁས་པའི་གཙུག་རྒྱན་སྨན་རི་བའི། ཡོངས་འཛིན་སློབ་དཔོན་བསྟན་འཛིན་རྣམ་དག་མཆོག འཛམ་གླིང་བོན་གྱི་གཙུག་རྒྱན་སྨན་རི་བའི། ཁྲི་འཛིན་མཁན་ཆེན་བསྟན་པའི་ཉི་མ་གཉིས། སྔ་རྗེས་མཚན་དཔེ་བཞད་པས་ཐུགས་བསྐྱེད་ལས། བོན་བསྟན་ཉི་ཟླའི་འོད་ཟེར་མཁའ་མཐར་སྤྲོས། གོ་ལའི་ཕྱོགས་བཅུར་བོན་བསྟན་རྒྱལ་དར་གཙུགས། སྨིན་གྲོལ་གྲྭ་སློབ་ཡང་སློབ་བསྟན་འཛིན་གཤེན། ཁྲི་འབུམ་བྱེ་བས་གླིང་བཞིར་བོན་བསྟན་སྤེལ། བོན་དཔེ་པར་སྐྲུན་བོན་གཞུང་ངོ་སྤྲོད་དེ། བོན་འདི་འཛམ་གླིང་ཡོངས་ལ་ཁྱབ་སྤེལ་དྲིན། མི་རིགས་མང་པོའི་བོན་དཔེ་ཀུན་མཐོང་རྗེས། ནང་པ་སངས་རྒྱས་གཡུང་དྲུང་བོན་ཞེས་པ། གཤེན་གྱི་བསྟན་པ་སངས་རྒྱས་ལག་འཆང་ཞིག འཛམ་གླིང་བོད་དཔྱོད་ཡོངས་ཀྱིས་བརྟགས་ཞིབ་ཀྱིས། མི་ལོ་ཁྲི་ཕྲག་གོང་ནས་གཡུང་དྲུང་བོན། ཡོད་པ་མཐོང་ཐོས་བྱུང་རྗེས་ཕྲག་དོག་གིས། སྟོན་པ་གཤེན་རབ་གཡུང་དྲུང་བོན་ཞེས་པ། ཉི་ཟེར་ལག་པས་འགེབ་ལྟར་མེད་པར་སྨྲ། དེ་ནི་བན་གཟུགས་ཆབ་སྲིད་ཁོག་འཆང་འགའ། སྙིང་ནས་བྲེད་སྐྲག་སྐྱེ་བས་རྟགས་མཚན་ཡིན། རྒྱུ་མཚན་བོད་རྒྱུད་བན་ཆོས་བོན་གཞུང་ལས། རྐུ་འཕྲོགས་བྱས་པ་དངོས་ར་འཕྲོད་པས་སོ། དཀར་པོ་འཚོལ་གྱིས་རྒྱུད་སྐུར་རྫུན་ཧམ་ཚིག བོན་ཆོས་འབྱུང་ཁུངས་ཞེས་པས་ཡི་གེ་ལ། ལན་གྱིས་ཚུལ་དུ་ཐོས་ཆུང་བླུན་པོ་དེ། ཉུངས་དཀར་ཟེར་བས་ཤར་མར་བྲིས་ནས་སྤྲིངས།། །།