ཁྱུང་གི་རུ་ཐུར
 
ཟིན་བྲིས་ལི་ཐོ།
སྒྲིག་འཇུག...
སྤྱི་བསྒྲགས།
སྒྲིག་འཇུག...
ཆེད་སྒྲིག་རྣམ་དབྱེ།
སྒྲིག་འཇུག...
ཟིན་ཐོ་གསར་བ།
སྒྲིག་འཇུག...
དཔྱད་གཏམ་གསར་བ།
སྒྲིག་འཇུག...
ཆེམས་གསར་བ།
སྒྲིག་འཇུག...
འཚོལ་བཤེར།
སྦྲེལ་མཐུད།
ཟིན་བྲིས་སྤྱི་བསྡོམས།
སྒྲིག་འཇུག...


 
མཐོ་རྒྱག་དམའ་རྒྱག
[ 2013/10/10 11:15:00 | By: ཁྱུང་བཟང་། ]
 


མཐོ་རྒྱག་དམའ་རྒྱག

--- རང་གིས་རང་ལ་སྨྲས་པ། 


ལ་སྐེད་ནས་ཕྱི་མིག་འཕེན་དུས། ཁྱོད་ཀྱི་ཐུགས་ལ་ཅི་ཞིག་ཤར་སོང་།

ལམ་བར་ནས་རྐང་སྣེ་ཐོགས་སའི་རྡོ་བ་དེ་དང་དེ་ལ་འཁོར་བའི་ཞེ་སྡང་གི་སྟོབས་ལ་གད་མོ་ཞིག་ཨེ་ཤོར། ཡང་ན་རང་གི་ནང་མིར་བསམ་མྱོང་བའི་ཁྱི་གུ་དེས་ཟུག་ཟུག་གནང་བར་ཡི་མུག་ཅིག་ཨེ་སྐྱེས།

 

ལ་སྐེད་ནས་ཕྱི་མིག་འཕེན་དུས། ཁྱོད་ཀྱི་ཐུགས་ལ་ཅི་ཞིག་ཤར་སོང་།

ཁོམ་དུས་སེམས་ཀྱིས་གཉོར་བའི་མེ་ཏོག་གི་འདབ་མར། སེར་ཐིག་ཆུང་ཆུང་ཞིག་ལྷུང་བར་སེར་སྣ་རེ་ཨེ་བྱུང་། ཡང་ན་ཚོད་ཚོད་དུ། སེམས་པ་ཤོར་མྱོང་བའི་མྱི་དེའི་གྱེས་ཕྱག་ལ་ཞེན་ཆགས་ཤིག་ཨེ་ལངས།

 

ཀྱེ།  ད་ནི་མདུན་དུ་སྐྱོད་ཅིག   ཁྱོད་ཀྱི་ལམ་ནི་མདུན་ཕྱོགས་ཁོ་ནའོ།།

         འདས་བྱས་ཐམས་ཅད་ནི་མི་རྟག་པའོ།། ཆོས་ཐམས་ཅད་ནི་སྒྱུ་མ་ལྟ་བུའོ།། ལས་འབྲས་ནི་མི་བསླུ་བའོ།།

ཁྱོད་ཀྱིས་འདི་ཐམས་ཅད་གྲུབ་མཐའ་ཞིག་དང་དད་མོས་རྐྱང་དུ་འདོད་ན་ཁྱོད་རང་འཁྲུལ་ཏེ། སྔོན་གྱི་དུས་སུ་ཁྱོད་ཀྱིས་ཤ་ཐང་ཐང་དུ་འབད་ཅིང་འབུངས་མྱོང་བ་དེ་དག་གིས་ཁྱོད་ལ་ཅི་ཞིག་བྱས་སོང་། དཔེར་ན་ཁྱོད་ཉིད་དགའ་མྱོང་བའི་མི་དེས། ཁྱོད་ཀྱིས་བསྟུན་མྱོང་བའི་མི་དེས། ཁྱོད་ཀྱིས་བཀུར་མྱོང་བའི་མི་དེས། ཐ་ན་ཁྱོད་ལ་ཐོབ་མྱོང་བའི་དངོས་པོ་དེ་དང་ལོངས་སྤྱོད་ཀྱི་ཚོགས་དེ་དག་གིས་ཀྱང་། ཁྱོད་ལ་ཅི་ཞིག་བྱས་སོང་། ད་རུང་མིག་རིག་རིག་དང་དབུགས་ཧལ་ཧལ་གྱིས་བསྙེགས་ཤིང་བརྩད་མྱོང་བ་དེ་དག་གིས་ཀྱང་ཅི་བྱས་སོང་ཨང་།

ཀྱེ། དེ་དག་གིས་ཁྱོད་ཀྱི་བྱེའུ་ཕྲུག་དམར་རྗེན་ལྟ་བུའི་ཉམ་ང་ལ་ཅི་ཞིག་བྱས་སོང་། ཁྱོད་ཀྱི་དཀར་འཇམ་ཤོག་བུ་ལྟ་བུའི་དྭངས་གཙང་ལའང་ཅི་ཞིག་བྱས་སོང་། དོན་དམ་པར་དེ་དག་གིས་ཁྱོད་ལ་ཅི་ཞིག་བྱས་ཡོད།   

 

དེ་བས་ན། ཁོ་རེ། འདས་བྱས་ཐམས་ཅད་ཀྱི་མདོ་ནི་མི་རྟག་པའོ།། ཆོས་ཐམས་ཅད་ཀྱི་རང་བཞིན་ནི་སྒྱུ་མ་ལྟ་བུའོ།། ལས་ཀྱི་འབྲས་བུ་ནི་མི་བསླུ་བ་ཉིད་དོ།།

           སྐབས་རེར་ཁྱོད་ཀྱིས་མགོ་ཁྲིད་དེའམ། གྲོགས་པོ་དེའམ། མཛའ་མོ་དེའམ། ཡང་ན་ནང་མི་གང་ཞིག་ནི་རྒྱུད་བཙོག་པ་དང་། བློ་གཏད་མེད་པ་དང་། འཁོས་ཀ་ཞན་པ་དང་། ཕྱི་ཐག་ཐུང་བ། ཁོག་རྒྱ་དོག་པ་སོགས་སུ་མཐོང་ཞིང་དེ་ལྟར་དུ་སྒྲོག་ཀྱང་ངེས་ཏེ། དོན་ལ་དེ་ཐམས་ཅད་ནི་ཁྱོད་ཀྱི་རྣམ་རྟོག་གི་འཕྲོ་འདུ་ཙམ་སྟེ། མཐར་གཏུག་ན་དེ་ནི་ཁྱེད་ལ་འབྲེལ་ཅིང་མ་འབྲེལ་བའི་ཚོགས་དེའོ།།

             དེ་དང་དེས་ཁྱོད་རང་སྤམ་སོང་བ་དང་ལྟུང་ཞིང་ཉེས་སོང་བར་སྨྲ་བ་ཐམས་ཅད་ནི་དོན་ལ་ཁ་གཡོར་བ་ཙམ་སྟེ། ནམ་རྒྱུན་ཁ་གཡོར་ས་འཚོལ་བར་དགའ་བའི་མིའི་རིགས་ནི་མི་ཡུལ་གྱི་ཆེས་རེ་བ་མེད་པའི་མིའུ་དག་ཡིན་པ་ཁྱོད་ཀྱིས་མི་མཁྱེན་པ་ག་ལ་སྲིད།

 

ཁོ་རེ། སེམས་པ་ནང་ལ་སྐོར་ཅིག  རང་གི་ལྷ་རྗེ་ནི་རང་ཉིད་འབའ་ཞིག་སྟེ། ཁྱོད་ལ་མནར་གཅོད་གཏོང་མཁན་དག་ཀྱང་དོན་ལ་ཁྱེད་ཉིད་བཙོ་སྦྱངས་བྱེད་སྤྱད་ཀྱི་སླ་ང་ཆེན་པོ་དེ་ལགས།

             རང་གིས་མི་འཇོན་པ་གོས་ཆེན་གྱིས་འཇམ་པོར་གཅུད་དེ། ཕྱུག་པོ་མཐོང་དུས་སྣ་གཉེར་དང་། མཁས་པར་ཐུག་ན་མཆུ་གཡུག དཔོན་པོ་རིག་ཚེ་སྡང་མིག མིང་ཅན་ཐོས་ན་མིག་སེར་ལངས་ཀྱིན། ཁ་གོར་མོ་དམངས་གཙོ་དམངས་གཙོ་ཟེར་བའི་ཚིག་ཚོན་པོ་ཞིག་ལ་ལོབས་ཤིང་གོམས་འདུག་པ་དེ་སུ་རེད། འདི་ནི་རིག་གཞུང་གང་ཞིག་གི་དམིགས་བསལ་དགོངས་པ་དང་རིགས་པ་གང་ཞིག་གི་ཡང་དག་པའི་སྒྲུབ་ངག་ཡིན་ནམ།

ཀྱེ་མ། ད་རུང་མང་མང་གི་ཕྱི་ལ་བཀྱེད་དེ་ཡིན་མདོག་སྟོན་པ་དེ་ཨ་མཚར།

             རྒྱ་ཡན་དང་རང་དབང་ནོར་ཞིང་འཛུགས་བསྐྲུན་དང་གཏོར་ཞིག་ནོར་བའི། ཁེ་དབང་སྐད་པ་ཡང་རང་ཁོ་ནའི་དེ་རུ་འདོད་ཅིང་། གཞན་ནི་གཞན་ཏེ་གཞོམ་བྱ་དང་བརླག་བྱ་དང་དགྲའམ་ཐན་དུ་ལྟ་བའི་བསམ་བློ་ཅི་བྱུང་རྣམས། རུས་ཞེན་དང་ལ་རྒྱ་རུ་འདོད་པ་དེའང་གང་ནས་གང་ཞིག་ཏུ་འགྲོ་བའི་ལམ་བུ་ཡིན་ནམ། ཡང་ན་གང་ནས་གང་ཞིག་ཏུ་མཆེད་པའི་ནད་ཡམས་ཡིན།

ཡོད་ཚད་ཅིག་གི་ཁོངས་སུ་བསྡུ་འདོད་པའམ། ཡོད་ཚད་ཅིག་ཤོས་ཁོ་ནས་ལན་སོང་བར་འདོད་པའམ། གསར་བས་རྙིང་བ་བཤིག་ཅིང་། རྙིང་བས་གསར་བ་བཀག་སྟེ། གཡག་ར་སྒྱེ་ནང་ནས་གཟེངས་པ་དག  རང་དབང་ངམ་དམངས་གཙོ་དངོས་དང་བར་ཐག་ག་ཙམ་གྱིས་ཆོད་ཡོད་དམ། སོ་སོས་ཨུ་ཚུགས་ཀྱི་རྐང་ལག་གང་དགར་བརྐྱངས་ཏེ། ལམ་ཁ་གང་ཞིག་ན་གདོང་བ་དམར་ནག་གིས་འགྱིང་བ་འདི་ཡང་ཅིས་ཉེས་སོང་།

ཁ་བཤད་ལས་ལག་ལེན་མེད་པའམ་མངོན་སུམ་ལས་ལྐོག་གྱུར་ལ་དུངས་ཆེ་བ་འདིས་ཀྱང་། ཚོགས་སྤྱི་གང་འདི་གང་ནས་གང་ཞིག་ལ་ཁྲིད་སྲིད་དམ།

 

ཀྱེ། རི་བོའི་ཕར་ངོགས་སུ་ཅི་ཡོད་ལ་སྟོང་འདང་སྐོར་བ་ལས། རྐང་བ་འདི་གང་ལ་ཇི་ལྟར་སྤོ་བར་ཤུགས་བརྒྱབ་པས་མི་ཡོང་ངམ། ལ་རྩེ་རུ་འབྱོར་ན་ཕ་རོལ་དུ་བསམ་མྱོང་བ་དེ་ཡང་ཕ་རོལ་མ་ཡིན་ནོ།།

 

༢༠༡༣  ༡༠  ༩

 
 
Re:མཐོ་རྒྱག་དམའ་རྒྱག
[ 2014/8/16 20:26:42 | By: གང་ལྷ་མཏོག་(སྐུ་མགྲོན) ]
 
གང་ལྷ་མཏོག་(སྐུ་མགྲོན)ཁྱུང་རིགས་རུས་བཟང་པོའི་བུ་ཕྲུག་དེ
རྩོམ་རྣམ་དཔྱོད་རིག་པ་མེ་ལྟར་འབར
བཟང་ལས་རིགས་ཀུན་ལ་ལྷག་སེམས་ལྡན
མཆེད་གྲོགས་པོའི་བློ་ཁ་ཁྱེད་ལ་ཕྱོགས
 
 
Re:མཐོ་རྒྱག་དམའ་རྒྱག
[ 2014/8/16 20:12:51 | By: ཁང་ནང་(སྐུ་མགྲོན) ]
 
ཁང་ནང་(སྐུ་མགྲོན)ཁང་ནང་གི་མི་དེ་
སེམས་ཁམས་ནི་ཆ་སྙམ་
མཐོ་དམན་གྱི་དགའ་སྡུག
རེ་དོག་ནི་བྲལ་འདུག
 
 
Re:མཐོ་རྒྱག་དམའ་རྒྱག
[ 2013/11/18 18:33:19 | By: gangjian333 ]
 
gangjian333སེམས་ཞིབ་མོས་བཀླགས་ཡོད།
 
 
Re:མཐོ་རྒྱག་དམའ་རྒྱག
[ 2013/10/10 20:46:52 | By: khyung ]
 
khyungབལྟས་ཟིན།
 
 
Re:མཐོ་རྒྱག་དམའ་རྒྱག
[ 2013/10/10 12:45:51 | By: tenzin3909 ]
 
tenzin3909ཡག་པོ་འདུག
 
 
Re:མཐོ་རྒྱག་དམའ་རྒྱག
[ 2013/10/10 11:47:04 | By: རིན་སྤུངས་ཚུལ་བསྟན། ]
 
རིན་སྤུངས་ཚུལ་བསྟན།གྲོགས་མཆོག་སྙན་ངག་པ་ཁྱུང་བཟང་ལགས་ནས་ལེགས་རྩོམ་སྤེལ་བར་སྙིང་ནས་དགའ་བསུ་ཞུ་ཞུ། ད་རུང་མུ་མཐུད་ནས་གང་མང་སྤེལ་བའི་རེ་བ་ཞུ་ཞུ།
 
 
དཔྱད་གཏམ་སྤེལ་བ།
སྒྲིག་འཇུག...
Powered by Oblog.