གོང་མཐུད། བཤད་སྒྲུབ་ཚད་ལྡན་ལས་ཐོན་པས་དཔེ་ཆ་བ་ལགས།

ཁྱེད་ཚོས་ངལ་བ་ཆེན་པོས་བསླབ་པས་ཤེས་ཡོན་དེས་སེམས་ཅན་རྣམས་ལ་ སྒོ་གསུམ་གྱིས་ཕན་ཅི་ཐོགས་གང་ཐོགས་བྱ་དགོས། བོན་འཆད་ཉན་གྱི་སྒོ་ནས་ སེམས་ཅན་རྣམས་ལ་ཕན་ཐོགས་ན་བསྟན་པའི་སྲི་ཞུའང་དེ་ཉིད་ཡིན་ཏེ་ བསྟན་པ་འཇིགས་རྟེན་ཁམས་སུ་གནས་པའི་དགོས་ཆེད་སེམས་ཅན་རྣམས་ འཁོར་བ་ལས་སྒྲོལ་བ་དེ་ག་ཡིན་པའི་ཕྱིར་རོ། བསྟན་པ་འཛིན་སྐྱོང་སྤེལ་བར་བྱས་ན་སེམས་ཅན་ལ་ཕན་འདོགས་པའང་ དེ་ཉིད་ཡིན་ཏེ། བསྟན་པ་གནས་ན་དེའི་དབང་གིས་སེམས་ཅན་བགྲང་གིས་མི་ལང་བ་ཞིག་ ཐར་པ་འཐོབ་པར་འགྱུར་བའི་ཕྱིར་རོ།  དེའང་ཡུལ་གང་སྐྱིད་དང་སྙེད་པ་གར་ཡོད། ཐོབ་གོ་ས་གཏམ་སྙན་གྲགས་སོགས་རང་གི་དོན་ལ་མི་སེམས་པར། བོན་གྱི་ཕོངས་ཤིང་འབྱོར་བ་མེད་པའི་ས་ཕྱོགས་རྣམས་སུ་སོང་ནས་ བོན་གྱིས་སེམས་ཅན་ལ་ཕན་གདགས་པ་ལ་བརྩོན་པར་བྱ་དགོས་སོ།  སངས་རྒྱས་ཀྱི་བསྟན་པ་གནས་པའི་ཐབས་བྱེད་ནའང་ མིའི་སེམས་ནང་དུ་གནས་ཐབས་བྱེད་དགོས་ཞེས་གསུང་པས་ འདི་ངེས་པར་དུ་ཐུགས་ལ་འཛིན་པ་ཞུ། རང་རེའི་བོན་པོ་ཡོངས་ཀྱི་གཙུག་ནོར་སྐྱབས་རྗེ་མཁན་སློབ་རྣམ་གཉིས་ཀྱིས་གཙོས་ དགེ་བའི་བཤེས་གཉེན་མང་པོས་ཕྱི་གླིང་གི་ཡུལ་གྲུ་མང་པོར་བྱོན་ནས་ གང་ས་གང་དུ་བོན་བསྟན་སྤེལ་བས་སྙིང་སྟོབས་དང་མཛད་བཟང་དར་སྤེལ་དང་ ཁྱབ་གདལ་དུ་གཏོང་དགོས་པས་མ་ཚད་དེ་དག་གི་མཛད་པས་སྲོལ་བཟུང་འོས་སོ།  དེ་ལྟར་ན་དཔེ་ཆ་བ་སྐྱེས་བུ་ལྷག་བསམ་ཅན་རྣམས་པས་ཐེག་པ་ཆེན་པོས་ ཤེས་རབ་དང་སྙིང་སྟོབས་ཁུར་དུ་ཁྱེར་ཏེ་ཡུལ་ལུང་ཁུག་གི་གཙང་དགོན་དང་ སྔགས་དགོན།སེར་ཁྱིམ་པའི་དགོན་པ་དང་ཞིང་འབྲོག་ཡུལ་སྡེ་སོ་སོརསོང་སྟེ། མང་ཚོགས་ཀྱི་གསེབ་ཏུ་ཞུགས་ནས་་གཡུང་དྲུང་བོན་གྱི་ཤེས་ཡོན་དར་སྤེལ་གཏོང་དགོས། དེའང་མཐུན་རྐྱེན་ཚོགས་པ་ན། དགོན་པ་དང་། གྲོང་གསེབ། གྲོང་ཁྱེར། རྣམས་སུ་ཡུན་རིང་ཐུང་ཅི་རིགས་པའི་རིག་གནས་སློབ་གྲྭ་དང་། སྔགས་རྫོགས་སྒྲུབ་གྲྭ གང་རུང་འཛུགས་པར་བྱེད་དགོས། དེང་སྐབས་རོང་ཡུལ་དང་བྱང་འབྲོག་གི་ཡུལ་ལུང་མང་པོར་རི་ཁྲོད་དང་། ལྷ་ཁང་། དགོན་པའི་བཟོ་ལྟ་མང་ཡང་གཡུང་དྲུང་བོན་གཤའ་མ་ཤིན་ཏུ་དཀོན། དེ་དག་རང་ཡུལ་ལ་གཡུང་དྲུང་བོན་ཉམས་སུ་ལེན་མཁན་གྱི་བླ་གྲྭ་དང་། བོན་འཆད་པའང་མེད། ཡུལ་གཞན་ནས་རང་མོས་ཀྱི་བླ་གྲྭ་ཤེས་ཡོན་ཅན་འོང་བའང་མེད། གདན་ཞུ་བྱེད་པའི་ཆ་རྐྱེན་ཡང་མེད་པས། མི་མང་ཆེ་བས་གཡུང་དྲུང་བོན་ལེགས་པོ་ཞིག་སྒྲུབ་མི་ཤེས། དེས་ན་ལུང་ཁུག་གི་དབུལ་པོ་ཉམས་ཆུང་བོན་འཆད་ཉན་མེད་པའི་ ཡུལ་དེ་དག་ཏུ་རང་མོས་ཀྱི་སོང་སྟེ། ཕན་སེམས་ཁོ་ནའི་གཡུང་དྲུང་བོན་འཆད་སྤེལ་བྱ་དགོས།  མདོར་ན་བསམ་པ་དང་སྦྱོར་བ་དྲི་མ་མེད་པས་སེམས་ཅན་ལ་ ཕན་འདོགས་པར་འདོད་པའི་ལྷག་བསམ་རྣམ་པར་དག་པ་ཁོ་ནའི་ ཐོག་མཐའ་བར་གསུམ་དུ་ཟིན་པར་བྱེད་དགོས། དེ་ལྟར་གཞན་ཕན་གྱི་བསམ་པ་ཁྱད་པར་ཅན་གྱིས་ཀུན་ནས་བསླངས་ཏེ་ སེམས་ཅན་རྣམས་ལ་རང་འདོད་མེད་པའི་བོན་གྱི་སྦྱིན་པ་བྱིན་ན་ གཡུང་དྲུང་བོན་གྱི་སྐྱེ་བོ་མང་པོ་ལ་ངེས་པ་དོན་གྱི་ཕན་ཐོག་པར་འགྱུར་ཞིང་ བསྟན་པའང་རིང་དུ་གནས་པར་འགྱུར་རོ།། །། ཅེས་པའི་བསམ་ཚུལ་འདི་དག་ཕྱོགས་ཀྱི་མཁས་དབང་མང་པོའི་ཞལ་གསུང་ལས་སློབ་གསོའི་སྐོར་རྣམས་ཕྱོགས་བསྡུས་སུ་བྱས་ནས་བསྒྲིགས་སོ།