རྗེས་དྲན་དད་པའི་ལྷ་རྫས།

 

 ཟླ་སྤྲུལ་གཟུགས་སྐུ་རྐང་གཉིས་ཚུལ་བཟུང་ནས།།

 ཁྱུང་ཡུལ་ནོར་འཛིན་དཔལ་གྱི་དགེ་ལྡན་དུ།།

 མཚན་དཔེ་ཟླ་བ་གཞོན་ནུ་མངོན་པར་འཛུམ།།

 བསྟན་འགྲོའི་མཛད་བཟང་གངས་རི་ལྗོངས་ལ་རྒྱས།།

 

 ཁྱུང་ཆེན་ཟླ་བ་དཀར་པོའི་འོད་སྟོང་སྟེ།།

 སྙན་པས་གྲགས་པ་སྲིད་གསུམ་ཁྱོན་དུ་བདལ།།

 རྒྱལ་བསྟན་རིན་ཆེན་བསླབ་གསུམ་སྲོག་ལྟར་གཅེས།།

 འཆད་རྩོད་རྩོམ་པས་ཕུན་ཚོགས་འདོད་རྒུས་ཕྱུག།

 

 སྐུ་ཡི་གཟི་མདྭངས་འདུས་སྡེའི་དབུས་ལ་སྤ།།

 གསུང་གི་བདུད་རྩི་སྐྱེ་འགྲོ་རྣམས་ལ་སྦྱིན།།

 ཐུགས་ཀྱི་དགོངས་པ་ནམ་མཁའི་ཀློང་དབྱིངས་སུ།།

 ཡོན་ཏན་མི་ཟད་སྒྱུ་སྐར་འོད་ཟེར་སྤྲོས།།

 

 འཕྲིན་ལས་མ་འགག་འགྲོ་ལ་ཐར་བདེ་སྟེར།།

 བྱང་ཆུབ་སེམས་དཔའ་མི་ཡི་རོལ་གར་བཞེངས།།

 དུས་འགྱུར་རླུང་དམར་ཁྲོད་ཀྱི་རྒྱལ་སྲས་ཁྱེད།།

 གློ་བུར་ཞི་བར་གཤེགས་པ་ཅི་ཡི་དོན།།

 

 བསྟན་འགྲོའི་དོན་ཆེན་རྫོགས་པས་རྟགས་མཚན་ནམ།།

 དམ་ཅན་སྲུང་མས་བར་ཆད་མ་བསལ་ལམ།།

 རྗེས་འཇུག་དྭ་ཕྲུག་བསོད་ནམས་ཟད་པ་འམ།།

 རང་ཉིད་སྡུག་གིས་མནར་བ་ཐེངས་གཅིག་མིན།།

 

 སྙིགས་དུས་མུན་སྨག་སེལ་བྱེད་ཟླ་གཞོན་ཉིད།།

 འགོག་མེད་ལས་དབང་བཙན་པོས་ནུབ་རི་སྒར།།

 ཐོས་པའི་བསྐལ་ངན་ཤར་བས་དུས་སྐབས་ལ།།

 དྲན་སེམས་ཀུན་ད་དཀར་པོ་ཁེར་རྐྱང་ལུས།།

 

 སྐྱོ་གདུང་མིག་ཆུ་ལྷུང་བཞིན་གདུང་མཆོད་ཕུལ།།

 རེ་བའི་མིག་ཞག་སྐྱབས་བཞི་དག་ལ་སྐྱོལ།།

 ངག་ནས་སྨོན་ལམ་སྣ་ཚོགས་ཡང་ཡང་བཏབས།།

 དད་སེམས་དངོས་འབྱོར་ཡིད་སྤྲུལ་མཆོད་བཤམས་ནས།།

 

 ཁྱེད་ལ་དད་པའི་བླ་མཁན་གྲངས་མེད་ཀྱིས།།

 གདུང་མཆོད་ཕེབས་ནས་ཚོགས་ཀྱི་འཁོར་ལོ་སྐོར།།

 ཁྱེད་ལ་དད་པའི་གྲྭ་བཙུན་ཁྱུ་ཚོགས་ཀྱིས།།

 ཕྱི་མཆོད་རྣམ་པ་ལྔ་ཡི་མཆོད་སྤྲིན་ཕུལ།།

 

 ཁྱེད་ལ་དད་པའི་མི་ཚོགས་གྲངས་མེད་ཀྱིས།།

 མིག་ཆུ་ལྷུང་བཞིན་སྒྲོན་མེའི་འོད་སྣང་སྤར།།

 ཁྱེད་ལ་དད་པའི་དྭ་ཕྲུག་ཤུལ་ལུས་ཀྱིས།།

 རྣམ་དཀར་དགེ་རྩ་གང་མཆིས་ཁྱེད་ལ་འབུལ།།

 

 ཡོངས་སྲིད་ཁྱུང་གི་དུང་ཟླ་གཞོན་ནུ་ཉིད།།

 མི་འཇོང་མྱུར་བར་ནམ་མཁའི་དབྱིངས་ཀློང་དུ།།

 ཤར་བས་སྐལ་བཟང་དགེ་བའི་དུས་སྟོན་དེར།།

 གཤེན་བསྟན་ནོར་གྱི་གླིང་དུ་མྱུར་ཕེབས་སྨོན།།