ཁྲི་སེར་འཇམ་དཔལ་ལགས་ནི། སྤྱི་ལོ་༡༩༧༧ལོར་མཚོ་སྔོན་ཁྲི་ཀ་རྫོང་སེར་བརྒྱ་གྲོང་ཚོ་རུ་སྐྱེས། བྱིས་པའི་དུས་ཀྱི་བག་ཡངས་རྩེད་འཇོའི་ཁྲོད་ནས་རང་བཞིན་ལྷན་སྐྱེས་ཀྱི་རིག་པ་གསལ་ཞིང་ལག་སོར་གྱི་འགྱུ་བ་བདེ་བས་ཀུན་གྱིས་བུ་ཆུང་ལག་བདེ་ཞེས་འབོད། རང་ལོ་བརྒྱད་ཀྱི་སྟེང་སྐྱེས་ཡུལ་གྱི་སློབ་ཆུང་འགྲིམས་ཤིང་དགེ་རྒན་དམ་པའི་བརྩེ་ཆེན་གྱི་ཐུགས་ཁུར་འོག་དབྱངས་གསལ་སོ་བཞིའི་སྦྱོར་ཀློག་གི་དབྱངས་རྟ་དང་བསྡོངས་ཏེ་ཡེ་ཤེས་ཚོགས་ཀྱི་ས་བོན་རང་ཆས་སུ་ཐུགས་རྒྱུད་ལ་བརྙེས། སློབ་མཐར་ཕྱིན་རྗེས་སྔོན་གོམས་ཀྱི་བག་ཆགས་བཟང་པོའི་མཐུ་ལས་དྲང་སྲོང་གནས་བརྟན་འཛིན་པ་དུ་མའི་དྲུང་ནས་རབ་ཏུ་བྱུང༌། ཁོ་རང་ལྔ་རིག་གཟི་འོད་འཕྲོ་བའི་དགོན་སྡེ་དང་ཤེས་རིག་བདུད་རྩི་འཐུང་བའི་སློབ་གླིང་དུ་འགྲིམས་པའི་གོ་སྐབས་མ་བྱུང་ན་ཡང༌། དད་སེམས་དགེ་སྦྱོར་རྩེ་གཅིག་གིས་གཞོལ་ཞིང་ངོ་མཚར་རི་མོའི་མཛེས་ཉམས་ཕྱོགས་སུ་སྦྲོན་པའི་ཞོར་དུ་རླུང་འཕྲིན་རྒྱང་སྒྲོག་དང༌། སྙན་རྩོམ་དུས་དེབ། ཚགས་པར་སྣ་ཚོགས་ནི་ཁོ་བོའི་བསམ་བློའི་གོ་རྟོགས་འབྱེད་པའི་ལྡེ་མིག་དང་བརྩེ་སེམས་དྭངས་མ་ལྷུག་པོར་བརྗོད་པའི་བློས་ཐུབ་ཀྱི་གྲོགས་པོར་གྱུར།
༡༩༩༨ལོ་ནས་བཟུང་གསར་རྩོམ་གྱི་ལས་ལ་ཞུགས་ཏེ་སྙན་ངག་དང༌། ལྷུག་རྩོམ། དཔྱད་བརྗོད། སྒྲུང་གཏམ་སོགས་རྩོམ་ལུས་འདྲ་མིན་སུམ་བརྒྱ་ལྷག་བརྩམས་ཤིང་སྔ་ཕྱིར་ཞིང་ཆེན་ཕྱི་ནང་གི་དུས་དེབ་ཁག་དང༌། རྒྱང་སྒྲོག་ལེ་ཚན། ཚགས་པར་སོགས་སུ་རྩོམ་ཡིག་བདུན་ཅུ་ལྷག་སྤེལ་བ་དང༌། དེདག་ལས་སྙན་རྩོམ་འགའ་ཤས་དང་རི་མོ་ཡིག་གཟུགས་ཁག་ཅིག་ལ་གཟི་བརྗིད་དཔང་ཡིག་དང་ཕུལ་བྱུང་བྱ་དགའ་ཐོབ་མྱོང༌།
ཁོང་གིས་མི་ཚེ་ཧྲིལ་བོར་ལྷ་རིས་སྒྱུ་རྩལ་དང་རྩོམ་རིག་གསར་རྩོམ་གྱི་ལས་ཀ་གཉེར་ཞོར་ཤེས་ལྡན་མི་སྣ་བསྐྱེད་བསྲིང་བྱས་ཤིང་བོད་ཀྱི་སློབ་གསོའི་ཐད་བྱས་རྗེས་མི་དམན་པ་ཞིག་བཞག་ཡོད། ཁོ་རང་སློབ་གསོ་ལ་དགའ་ཞིང་རང་རིགས་ལ་ཞེན་པ་དང་རིག་གནས་ལ་བརྩོན་ཞིང་སྙན་ངག་ལ་དུངས་པའི་མོད་ཕ་ཡུལ་གྱི་ཞིང་གྲོང་ན་འཚོ་བའི་བོད་རིགས་གཞོན་ནུ་ཕོ་མོ་རྣམསཀྱི་ཡིག་རྨོངས་སེལ་བའི་ཐབས་དང་རྩོམ་རིག་གིས་འདོད་བློ་ཡོངས་སུ་སྐོང་བའི་ཆེད་དུ། ༢༠༠༠ལོ་ནས་བཟུང་〈ཞིང་གྲོང་གི་འགྱུར་ཁུགས〉ཞེས་པའི་ཚགས་པར་འདི་ཉིད་རང་སྟེང་ནས་མ་དངུལ་གྱིས་མཐུན་རྐྱེན་སྦྱར་ཞིང་གཙོ་འགན་རྩོམ་སྒྲིག་གི་འགན་ཡོངས་སུ་ཕྲག་ཏུ་བླངས་ནས་ད་ལྟའི་བར་འདོན་ཐེངས་བརྒྱད་ཙམ་འགྲེམས་སྤེལ་བྱས་པ་མ་ཟད། རང་རྫོང་ལ་མཚོན་ན་བོད་ཡིག་གི་ཚགས་པར་ཞིང་གྲོང་ནས་སྤེལ་བ་ཆེས་ཐོག་མ་ཡིན་པས་ཞང་དང་རྫོང་རིམ་པའི་འགོ་ཁྲིད་མི་སྣའི་གཟེངས་བསྟོད་དང་གདེང་འཇོག་ཚད་མཐོན་པོ་བྱས།
ཁོ་བོའི་སྐབས་རེར་གཤིས་ཀ་མཐུན་པའི་གྲོགས་ལ་འདི་སྐད་གླེང་མྱོང༌། （ཁོའི་སྙན་ངག་གིས་གཞན་སེམས་འགུགས་ཐུབ་པའི་ནུས་པ་མེད་ན་ཡང་ཇི་སྲིད་ཟག་ཕུང་གི་སྒྱུ་ལུས་མ་འཇིག་བར་དུ། རང་སེམས་རང་གིས་གསོ་ཕྱིར་སྒྱུ་འཕྲུལ་གྱི་ཞིང་ཁམས་འདི་ནས་སྙན་ངག་མཛེས་མའི་བསླུ་བྲིད་ཀྱི་འཛུམ་མདངས་འཚོལ་བའི་གླེན་རྟགས་དེ་ནམ་ཡང་མཚམས་འཇོག་བྱེད་མི་སྲིད་）ཟེར། ཡིད་ཆེས་དང་དམ་བཅའ་བརྟན་པོ་བཞག་པའི་གོ་རིམ་ཁྲོད། འཕྲིན་ལས་ཀྱི་འོད་སྣང་ཕྱོགས་བཅུར་འཕྲོས་ཤིང་མཚན་སྙན་གྱི་བ་དན་མཁའ་རུ་བསྒྲེངས་ན་ཡང་སྐྱེ་བའི་མཐའ་མ་འཆི་བ་དང་ཚེ་ཡི་སྙིང་པོ་མཐའ་ཅན་དུ་ངེས་པ་མེད་ཕྱིར་རང་ལོ་ཉེར་དགུ་སོན་པ་ཤིང་མོ་བྱ་ལོའི་ཆོ་འཕྲུལ་ཟླ་བའི་དུས་ཚེས་དགེ་བར་ཚེ་ཡི་འདུ་བྱེད་ཀློང་དུ་བསྡུས་པའོ།།
གཟི་བྱིན་གྱི་མར་མེ།
―ངའི་བརྗེད་མེད་ཀྱི་ཁུ་བོ་ཀེང་དཀར་འདས་ནས་ཞེ་དགུ་ལོན་པའི་ཉིན་མོར།－
ཁྲི་བསོད་བསྟན།
མར་མེ། མུན་ནག་གི་ཟབ་ས་ནས།
སྤོབས་པ་དང་ལ་རྒྱ་ཡི་གཟི་བྱིན་སྤྲས་ཏེ།
འོད་ལམ་ལམ། རང་བྱུང་གི་འོད་ཀྱིས་འཚེར།
མར་མེ། གངས་ལ་དགའ་ཞིང་རིགས་ལ་ཞེན་པས།
འོད་སྣང་ཡང་། གངས་ལ་འཐིམ་ཞིང་རིགས་ལས་མཆེད།
མར་མེ། གསེར་འདོག་གི་མར་མེ་འདིས།
ལྷག་བསམ་དང་དུངས་ཞེན་གྱི་མངའ་ཐང་བསྣམས་ནས།
རང་བྱུང་གི་ཁོར་ཡུག་ནས།
ཞིང་གྲོང་འདིར། བླ་མེད་ཀྱི་སྙིང་སྟོབས་བསྒྲེངས་ཡོད།
སྨྱུག་ཤོག་གི་དགའ་ཚལ་ནས།
མི་ཡུལ་འདིར། ཡལ་མེད་ཀྱི་སྣང་བརྙན་བསྐྲུན་ཡོད།
ད་ལོའི། དཔྱིད་ཟླ་ར་བར།
སྲིད་པའི་འཁོར་ལོར་མི་རྟག་པའི་ནད་ཡམས་ལྡང་བྱུང༌།
ནད་ཡམས་དེ། དཔྱིད་རླུང་བཞིན་ཤུགས་ཆེན་གྱིས།
ངའི་སྣོད་བཅུད་ཀྱི་འདབ་ལོ་བསྙིལ་བྱུང༌།
ངའི་གཟི་བྱིན་གྱི་མར་མེ་བཅིལ་བྱུང༌།
མར་མེ། སེམས་ཁོང་གི་ཁྱོད།
ངའི་ཞེ་ཁོང་ནས་བརྡོལ་དེ།
བར་དོའི་འཕྲང་ལམ་རིང་མོར་ཁད་ཀྱིས་བཞུད་པས།
ང་ལ་འཁྱག་སིབ་སིབ་ཀྱི་གཏམ་རྒྱུད་བསྩལ་བྱུང༌།
གཏམ་རྒྱུད་དེ། རྨུ་ཐག་ལྟར་བརྒྱུས་ཏེ།
ཡུལ་མི་ཚོར། བཟོད་དཀའ་བའི་མྱ་ངན་དང་འོ་དོད་བསླངས་བྱུང༌།
མར་མེ། ངའི་མིག་མཐར་འཁྱིལ་ཐེངས་རེ་ལ།
ངས་མེ་ཡི་གཟི་བྱིན་དང་འོད་ཀྱི་ཞབས་རྗེས་དག་དྲན་འོངས།
དུས་ཚིགས་འདིའི་རླུང་ཁ་ནས།
གྱེས་བྲལ་གྱིས། ངའི་རང་སེམས་ལ།
མདུང་མོ་བཞིན་ཟུགས་ཏེ་རྨ་ཁ་ཞིག་བཟོས་སོང༌།
ངའི་གཟི་བྱིན་གྱི་མར་མེ། བདེ་བར་མཛོད།
ཞུམ་པ་མེད་པར། ང་དང་ཞིང་གྲོང་གི་སྨྱུག་ཚོགས།
འོད་སྣང་གི་ཞབས་རྗེས་བསྙེགས་ཏེ།
ཟོལ་མེད་གཞུང་དྲང་གིས། བདེན་འཚོལ་སྙིང་སྟོབས་ཀྱིས།
<ཞིང་གྲོང་གི་འགྱུར་ཁུགས་>ལ་ནམ་ཡང་གླུ་ཡིས་བསྟོད་ངེས།
གངས་རིའི་བདེ་སྡུག་ལ་གཞར་ཡང་དཔུང་དུ་འགྱིང་ངེས།
―ཉིས་སྟོང་ལྔ་ལོའི་ཟླ་ལྔ་བའི་ཚེས་གཅིག་ཉིན་ལྷ་སར།
